Abakinnyi babiri b’ikipe y’igihugu Amavubi, Haruna Niyonzima na Meddy Kagere, bari mu bakinnyi 25 bakomoka mu karere k’Afurika y’iburasirazuba n’iyo hagati (CECAFA) bakurikirwa cyane ku mbuga nkoranyambaga.
Aba basore bombi bakina muri shampiyona ya Tanzania, gusa mu makipe abiri atajya imbizi. Haruna akina muri Young Africans, mu gihe Kagere akina muri mukeba Simba Sports Club. Bigeze gukinana, ubwo Kagere yavaga muri Gor Mahia yo muri Kenya agasanga Haruna muri Simba.
Kuba aba basore bombi bitwara neza haba muri shampiyona ya Tanzania ndetse no mu kipe y’igihugu Amavubi, ni byo bibashyira mu myanya y’imbere mu gukundwa cyane ku mbuga nkoranyambaga.
Haruna Niyonzima aza ku mwanya wa karindwi mu gukurikiranwa na benshi muri Cecafa, aho afite abamukurikira 298, 589. Barimo abarenga 256,000 bamukurikira ku rubuga rwa Instagram na 42,589 bamukurikira kuri Facebook. Nta Twitter akoresha.
Kagere amukurikiye ku mwanya wa munani n’abamukurikira ku mbuga nkoranyambaga 270, 570. Barimo 229,000 bo kuri Instagram na 41, 570 bo kuri Facebook. Kagere na we nta compte ya Twitter agira.
Uza ku isonga mu gukurikirwa cyane ku mbuga nkoranyambaga muri aka karere, ni umunya-Tanzania Mbwana Ally Samatta ukinira Aston Villa yo mu Bwongereza. Akurikirwa na 1,670,219. Barimo 1,400,000 bo kuri Instagram, 73,219 bo kuri Facebook na 197,000 bo kuri Twitter.
Samatta akurikiwe na Victor Wanyama, umunya-Kenya ukinira Tottenham yo mu Bwongereza. Uyu musore w’i Nairobi afite abamukurikirana ku mbuga nkoranyambaga barenga 933,000.
Tanga igitekerezo