Abasirikare b’u Rwanda bari mu mahugurwa yo kubungabunga amahoro yiswe ‘Shanti Doot-4’ (Intumwa y’amahoro ya Bangla), mu gihugu cya Bangladesh kiri ku mugabane wa Aziya, bagarutse mu Rwanda.

Ni amahugurwa amaze ibyumweru bitatu, yatangiye ku wa 26 Gashyantare,  asozwa ku wa Mbere tariki ya 12 Werurwe 2018, akaba yaritabiriwe n’ingabo zigera kuri 780 zirimo ba Ofisiye n’abasirikare bato baturuka mu bihugu 24.

Abasirikare b’u Rwanda bakaba bari bayobowe na Lt Col Theodore Gakuba,  kikaba aricyo gihugu cyonyine gituruka muri Afurika cyitabiriye iyi myitozo n’ingabo zigera kuri 39. Ibindi bihugu byitabiriye, ibyinshi bikaba byaraturutse muri Aziya na Amerika.

Bicishijwe ku rukuta rwa Twitter rwa Minisiteri y’ingabo mu Rwanda, bagize bati “Umutwe w’ingabo z’u Rwanda wagarutse mu rugo uvuye gusoza imyitozo mpuzabihugu yo kugarura amahoro muri Bangladesh”.

Mu gusoza, Umujyanama wa Minisitiri w’Intebe wa Bangladesh mu bijyanye n’ububanyi n’amahanga, Prof. Dr Gawher Rizvi yasabye izi ngabo zasoje amahugurwa, gukomeza ubucuti zihakuye ndetse no gukomeza gusangizanya ubumenyi n’imyitozo.

Intego nyamukuru y’aya mahugurwa, kwari ukubaka ubushobozi bw’abasirikare baturuka  mu bihugu bitanga ingabo mu bikorwa byo kubungabunga amahoro bya Loni  no kugaragaza umuco w’ibihugu bakomokamo.

Kanda Subscribe ujye ubona Video zigezweho 

 

Musubize:

Tanga igitekerezo
Andika amazina