Guverineri w’Intara y’Amajyaruguru avuga ko mu Ntara abereye umuyobozi, Siporo iri mu byashyizwe imbere, bitewe n’uburyo ifitiye sosiyeti akamaro mu buryo butandukanye.

Guverineri Gatabazi JMV, avuga ko Intara y’Amajyaruguru ikora siporo rusange kabiri mu kwezi, ifite amakipe ari mu kiciro cya mbere cy’umupira w’amaguru, amakipe yo mu mashuli abanza n’ayisumbuye, imikino y’intoki n’iy’abamugaye… iyo mikino yose ngo ikinwa mu rwego rwo kwidagadura no guhuza abaturage.

Mu kiganiro yagiranye na radiotv10, Guverineri Gatabazi, ashishikariza abatuye iyi Ntara gukomeza kugira umuhate mu kwiteza imbere, banagira akanya ko kwidagadura bakora siporo.

Agira ati “Turifuza kugira abakinnyi beza bavuye mu Ntara y’Amajyaruguru, muri diviziyo zose zitandukanye,…. Nk’umuntu ukunda siporo, uzi akamaro ka siporo,… siporo tuyibonamo ibintu byinshi, guhuza abaturage, kuba bafite morali, bishimye bafite ubuzima bwiza ariko hakazamo n’ayo mafaranga yo kugura abakinnyi, ariko n’abantu bakabona ko banezerewe, igihugu gifite umutekano, igihugu gifite ibyishimo,…”.

Akomeza avuga ko intego bafite ari uko buri muturage w’Intara y’Amajaruguru yiyumvamo siporo, ati “Turashaka ko bijya mu buzima bw’abaturage b’intara y’Amajyaruguru, ku buryo buri mudugudu babikora kabiri mu kwezi abaturage bose bakagenda muri iyo misozi y’iwabo barangiza bagahurira ahantu hamwe baba bateganyije hakaba ikiganiro bakabasobanurira ibijyanye n’isuku, ubuzima, imirire, ibi kandi bizanadufasha kugabanya ibiyobyabwenge,…”.

Nk’uko mu Mujyi wa Kigali hakorwa siporo rusange kuri buri wa Gatandatu w’icyumweru cya mbere cy’ukwezi, no mu Ntara y’Amajyaruguru batangiye iyi gahunda.

Guverineri Gatabazi ati “siporo rusange mu Ntara y’Amajyaruguru twarayitangije, ubundi tuyita Car free day, twebwe uko tubyumva, twumva ko abantu bagendaga n’ibinyabiziga babireka bakagenda n’amaguru, twayitangije mu Ntara y’Amajyaruguru muri rusange mu karere ka Musanze nyuma dukomereza no mu turere twose, twahereye Musanze, dukurikizaho Gicumbi, Rulindo, Burera na Gakenke, hanyuma turangije twatangiye gusubira aho twatangiriye,…”.

Kuba nta kipe y’abatwara amagare ikipe ya Musanze yari yagira kandi ariho abawukina bajya kwitoreza, Gatabazi avuga ko n’ubwo bataratangira kwitabira amarushanwa, ariko ko ikipe ihari.

Ati “ntabwo bari bagira ikipe ngo itangire amarushanwa, ariko baratangiye, barahari abana, batangiye kwirukanka bakoresha amagare asanzwe, turashaka ko muri bIje y’ubutaha hashakwamo abantu bashyigikira umukino w’amagare n’abaterankunga, kuko burya amagare arahenda”.

Abajijwe ku kuba hari abantu batagishyigikira Ikipe ya Gicumbi FC kubera ko itakitwa Zebre FC, na Musanze FC kuko itakitwa Mukungwa FC, Guverineri avuga ko icyo ari ikibazo cy’imyumvire.

Ati “Ni ikibazo cy’imyumvire kandi burya impinduka zigenda zizamo buhoro buhoro kandi burya bigenda bijyana na jererasiyo (generation), ubu umwana wo muri pirimeri azi Gucumbi FC, azi Musanze FC, abatekereza Mukungwa barimo gusaza, n’abatekereza Zebre nabo bari gusaza, rero ntabwo izina ry’ikipe ariryo ritsinda, hatsinda ubushake bw’abakinnyi, hatsinda ubushobozi igihugu kiba cyashyizemo,…. Ikipe yishakira abafana, ikipe nitsinda neza abafana bazazifana,…”.

Akomeza avuga ko Intara y’Amajyaruguru ifite gahunda yo kugira ikipe ya Handball, bakifuza ko aho kujya kugura abakinnyi ahandi, ahubwo batangira gutegura abana bato bafite impano, aho bari mu mashuli abanza n’ayisumbuye.

Ikindi, Intara y’Amajyaruguru ngo ishyize imbere gahunda yo guteza imbere abafite impano zo gusiganwa n’amaguru mu bilometero bitandukanye.

Ati “muri Atletisme turashaka amakipe yo muri diviziyo ya mbere, turashaka amakipe ya mbere, dufite imisozi, dufite abaturage bafite imbaraga, bafite ibyo kurya, bafite umwuka uhagije mu misozi, bafite igihaha, nabyo biro mu byo twahise imbere ya Minisitiri w’umuco na siporo”.

Guverineri Gatabazi unavuga ko na we yabaye umukinnyi mu mikono ya Vollyball na football, avuga ko intego bafite ari iy’uko buri karere kagize Intara y’Amajyaruguru, kagira ikipe ikomeye mu mukino runaka.

Kanda kuri SUBSCRIBE ujye ubona ibiganiro n’indirimbo bishya

 

Musubize:

Tanga igitekerezo
Andika amazina