Komini Kirambo ni imwe mu makomini y’icyari perefegitura ya Cyangugu mu gihe cya Jenoside yakorewe abatutsi  yabereyemo amarorerwa akomeye cyane y’ubwicanyi ndengakamere bigizwemo uruhare rukomeye cyane n’uwari Burugumesitiri wayo,  Mayira Mathias, cyane cyane ko ngo bakekaga ko inkotanyi zifashe ubutegetsi bamwe mu Batutsi b’iyi komini bari barize bavamo uba perefe wa perefegitura ya Cyangugu.

Ngo byatumaga bahora bikanga cyane bamwe mu Batutsi b’abanyabwenge bari batuye agace ka Kibogora kari karimo amashuri, ibitaro n’ibindi byatumaga abantu bahashaka akazi barimo n’Abatutsi, guhora Burugumesitiri abikangamo  abashobora kuba abayobozi igihe inkotanyi zafata igihugu, bikaba biri mu byatumye bo batangira kwicwa no gutotezwa bikomeye kuva mu 1992 ari bwo aba mbere muri bo bishwe.

Nzasabayesu Enock, umwe mu barokokeye ku kibuga cy’imbere y’ibiro by’iyari komini Kirambo aho Abatutsi benshi batikiriye bicishijwe intwaro gakondo, avuga ko bari bahahungiye ari benshi cyane bizeye gukira, ariko ngo ubugome bw’abayoboraga iyo komini bwatumye  babica nabi babanje kubabarura no kubandika ngo hatagira izina na rimwe ribacika.

Yagize ati’’ Burugumesitiri  Mayira Mathias ubu duhangayikishijwe no kutamenya aho aherereye nyuma yo kurangiza igihano cy’igifungo cy’imyaka 20 yari yarakatiwe, yategetse abakozi be kudukusanyiriza hamwe mu biro bya komini barabanza baratwandika nta n’uruhinja basiga, barangije badusohora ku kibuga imbere y’ibiro batugotesha interahamwe zirenga 300 zidutikiriza aho.’’

Yakomeje agira ati’’ babonye imivu y’amaraso imaze kuba myinshi kuri icyo kibuga, abataricwa dushyirwa ku murongo bavuga ko batujyanye kutwicira ku mugezi wa karundura,tugezeyo jye ndabacika, abenshi bajugunywa muri uwo mugezi no ku nkengero zawo, tukaba dukomeje gushengurwa n’uko bamwe mu barokotse batashoboye kubona imibiri y’ababo ngo ishyingurwe mu cyubahiro,cyane cyane ko bamwe mu bazi aho iri bakomeje kuryumaho.’’

Uku kudatanga amakuru y’aho imibiri iri byanagarutsweho n’uhagarariye Ibuka mu Karere ka Nyamasheke, Bagirishya JMV, uvuga ko hari imwe mu mibiri ikomeje kuboneka ahagenda hakorwa ibikorwa remezo nk’imihanda, amazi, ahashingwa amapoto y’amashanyarazi n’ibindi , nyamara hatuye abantu, bamwe ugasanga barabicecetse nkana, agasaba ubuyobozi bw’akarere n’abaturage gukomeza ubufatanye, iyi mibiri ikaboneka.

Ubwo hibukwaga by’umwihariko Abatutsi biciwe muri uyu murenge wa  Kanjongo, aho imibiri igera ku 4996 ishyinguye mu rwibutso rwa Jenoside rwa Kibogora, umuyobozi w’aka karere wungirije ushinzwe imibereho myiza y’abaturage, Madame Mukamana Claudette, yavuze ko akarere katazahwema gusaba abakomeza kwinangira kwerekana aho imibiri itarashyingurwa iri ngo ishyingurwe mu cyubahiro, cyane cyane ko kuba hari ikiboneka n’uyu munsi, bigaragaraza ko hari n’indi ihari, ariko abazi aho iri bagakomeza kwinangira kuherekana.

Depite Kankera Marie Josée, yasabye  abatuye Kanjongo  guharanira gukomeza  kunga ubumwe barwaniriza hamwe icyagarura amacakubiri mu banyarwanda, bahangana n’ingengabitekerezo ya Jenoside n’ubundi bugome nk’ubwo, anasaba abakeka ko kwerekana aho imibiri itarashyingurwa mu cyubahiro iri byabagira ho ingaruka kuva ku izima bakayerekana na yo igashyingurwa mu cyubahiro.

BAHUWIYONGERA Sylvestre

 

Musubize:

Tanga igitekerezo
Andika amazina