Abaturage bo mu Karere ka Rwamagana barasaba ubuyobozi kubakiza abashakira imibereho mu gucuruza amasengesho bitwaza ubuhanuzi kandi babashakamo indonke. 

Bemeza ko bamwe gusenga babigize umwuga, ndetse bakabifata nko kwihangira imirimo, bakarara basenga mu nzu z’abaturanyi babo, ibyo bavuga ko bibangamira umutekano wabo.

Umuturage utuye mu mudugudu wa Kabuye, agira ati “ntabwo twanga abantu basenga ariko umuturanyi wacu aratubangamira, abantu baraza bakarara basenga, twumva bavuga ko abahanurira kandi yabigize ubucuruzi, niko kazi kamutunze, ariko ntabwo inyungu z’umuntu umwe zikwiye kubangamira abaturage,  bahaza bavuga ngo bagiye kwa ‘Maniravuga’ ariko ntabwo ari urusengero ruzwi”.

Utuye mu kagari ka Sibagire, na we agira ati “Mu mudugudu wacu hari umugabo bakunda kwita Papa Irahari, ariko gusenga yabagize umwuga ku buryo iwe yahagize icyumba cy’amasengesho, yaretse imirimo yo gupagasa avuga ko azajya atungwa n’umurimo wo gusenga, usanga huzuye abantu bagiye kuhasengera ngo abahanurire, nibadahagarikwa mbona bizateza ibibazo”.

Ushinzwe irangamimerere akaba n’umusigire w’umunyamabanga Nshingwabikorwa w’umurenge wa Kigabiro, Mikebanyi Emmanuel, avuga ko akajagari mu nsengero muri uyu murenge bagahagurukiye.

Agira ati “Uyu munsi twakoze igenzura ku nsengero ariko twanabanje gukorana inama n’abayobozi b’imidugudu, baduhaye amakuru ku hantu hasengerwa hose,  abo bafite ibyumba by’amasengesho tubafata nk’abitwara nk’idini, ababikora turabasaba kubihagarika bakabanza kwaka ibyangombwa bibemerera gukora kandi bakubaka insengero, turasaba abaturage kuduha amakuru ahantu hose hasengerwa tukabasaba kubahiriza amabwiriza”.

Mu nama yabaye ku wa Mbere tariki ya 5 Werurwe 2018ihuza ubuyobozi bw’Akarere ka Rwamagana n’abayobozi b’amadini akorera muri aka karere. Yigaga ku mikorere y’amadini n’amatorero, hagamijwe gukosora ibitagenda byagaragajwe n’ubugenzuzi bwakozwe n’akarere, umuyobozi w’akarere, Mbonyumuvunyi Radjab, yasabye abahagarariye amatorero n’amadini kubaka insengero nziza zijyanye n’igihe, by’umwihariko idini cyangwa itorero ridafite icyangombwa ryose rigomba guhagarara n’ahari icyapa cyaryo hose kigakurwaho.

Mu bugenzuzi bwakozwe n’ubuyobozi bw’Akarere, byagaragaye ko insengero 352 muri 427 arizo zifite ibyangombwa.

Kanda kuri SUBSCRIBE ujye ubona ibiganiro n’indirimbo bishya

Musubize:

Tanga igitekerezo
Andika amazina