bwiza.com
Ahabanza » Gicumbi: Umukwabu wo koza abafite umwanda
Amakuru Utuntu n'utundi

Gicumbi: Umukwabu wo koza abafite umwanda

Mu mpera z’icyumweru gishize mu karere ka Gicumbi haramukiye umukwabu wo koza abantu bagaragaraho umwanda aho ubu buyobozi buvuga ko bubangamiwe nacyo.
Nyuma y’uko ikibazo cy’abaturage b’abanyamwanda kigaragajwe nka kimwe mu bibangamiye umujyi wa Gicumbi, kuwa gatandatu tariki ya 15 hakozwe umukwabu wo gufata abatiyuhagira, bajyanwa ku karere biyuhagira bahagarikiwe.
Gufata abaturage bafite umwanda bagategekwa gukora isuku bahagarikiwe ni umwe mu myanzuro yafashwe na Njyanama y’akarere ka Gicumbi, hagamijwe guhashya umwanda wabaye akarande kuri bamwe.
Uwo mwanzuro washyizwe mu bikorwa kuwa gatandatu, abagera kuri 30 barafatwa bajyanwa ku karere, aho bahawe ibikoresho by’isuku bakajyanwa mu bwogero gukora isuku ku buryo bukomeye.
umwanda
Bamwe mu buhagiwe bavuga ko n’ubusanzwe batanga gukora isuku ku mpamvu zabo, ahubwo ngo biterwa n’ubushobozi buke butuma batabona ibisabwa ngo bisukure.
Rufayire uzwi cyane mu mujyi wa Gicumbi ku ngeso yo gusabiriza yabwiye itangazamakuru ati “Bagiye bampereza isabune n’ibindi nabonye byiza byo gukoresha isuku, najya nyikora rwose.”
Mujawamariya Therese, umuyobozi wungirije ushinzwe imibereho myiza y’abaturage mu karere ka Gicumbi yasabye aba baturage kujya biyitaho, kuko nta na rimwe umunyamwanda azihanganirwa.
Yagize ati “Uyu munsi dutangiye kurwanya abantu bafite isuku nke n’undi wese utafashwe mu mubwire ko ubutaha ariwe uzatahira, ariko nanone tubasabe mukwiye kugira isuku ku mubiri wanyu, n’ibyo mwambara bigacya.”
thereza
Aba baturage bahatiwe kwiyuhagira barekuwe bakeye, kabone n’ubwo bongeye kwambara imyambaro bahozemo idafite isuku.
Ubuyobozi bw’akarere ka Gicumbi buvuga ko iyi ari intangiriro ya gahunda yo gutoza abaturage kugira isuku, kugeza ubwo buri wese azayigira umuco, aho kuyigira ayihatiwe.
Kanda hano ujye ubona amakuru yihuse kandi kugihe kuri Facebook no kuri twitter
Alphonse Munyankindi / Bwiza.com

Izindi wakunda

Bwiza.com