bwiza.com
Ahabanza » 1973-1994: Bimwe mu byaranze Ingoma ya Perezida Habyalimana
Amateka Politiki

1973-1994: Bimwe mu byaranze Ingoma ya Perezida Habyalimana

Abakurikiranira hafi amateka politiki y’ u Rwanda bemeza ko ubutegetsi bwa Habyarimana Juvénal bwaranzwe n’ ivangura ry’amoko, uturere, ivangura mu kazi kuva mu 1973 kugeza mu 1990, ubwicanyi uko bucyeye n’uko bwije bwagiye bukaza umurego.
Umugore wa Habyarimana, Agatha Kanziga, yigize umujyanama w’umugabo we, yivanga mu kazi k’imiyoborere y’igihugu, Habyarimana arabyemera.
Icyo gihe ni bwo abantu batangiye kwicwa, abari baremeye kutiga, kutagira akazi bakora, noneho batangira kwicwa no gufungwa; ibyitso birafatwa birafungwa, abandi baricwa.
Ikindi kandi cyaranze umwaka wa 1990, ni uko abanyarwanda b’impunzi bari barahungiye ishyanga, nyuma yo gutakamba basaba gutaha mu mahoro, bakabwirwa kenshi ko ikirahure cyuzuye kera, kandi ko haramutse hongewemo andi mazi arimo yameneka.
Ibi byatumye abari impunzi bahitamo gutaha ku ngufu, kuva ubwo harota intambara kuva mu 1990. Aha habaye isibaniro mu Rwanda, ingabo za Mobutu zirahurura, iz’Abafaransa na zo ziyongeraho, inzirakarengane mu gihugu zipfa amanzaganya ngo ngaho ni ibyitso by’Inkotanyi.

habyalimana (1)
Habyarimana Juvenal wahoze ari Perezida wa Repubulika y’u Rwanda

Kuva mu 1990 kugeza mu 1993, u Rwanda rwarimo intambara, abapfa barapfa, abafungwa barafungwa, amagerenade hirya no hino mu gihugu aca ibintu.
Ubwicanyi mu gihugu buhitana abatari bake za Bugesera, Bicumbi, Murambi, Kanzenze; ngiyo imyigaragambyo mu Umujyi wa Kigali, igihugu cyose kiba akajagari, mbese agahenge kaje mu 1993 ubwo Perezida Habyarimana yemeraga imishyikirano ya Arusha.
Ihanurwa rya Habyarimana
Tariki ya 6 Mata 1994, indege yo mu bwoko bwa Falcon 50 yari itwaye Habyarimana yararashwe igwa hafi y’ urugo rwe i Kanombe. Iby’iraswa ry’iyo ndege ntabwo tubitindaho, kuko kugeza ubu impande zose zitana bamwana, abahezanguni bo muri MRND na raporo y’ umucamanza w’ umufaransa Jean Louis Burguiere bemeza ko yarashwe n’abasirikare ba FPR, FPR na yo ikemeza ko yarashwe n’ intagondwa z’ abahutu zashakaga ubutegetsi no gushyira mu bikorwa umugambi wa Jenoside yari yarateguwe, ndetse na Raporo yitiriwe Mucyo ni uko ibivuga. Amakuru aturuka mu rukiko mpanabyaha rwa Arusha ( TPIR/ICTR ) na yo arabigaragaza.
Raporo y’ impuguke z’ Abafaransa, Marc na Poux n’ ubwo na yo igaragaza ko bagikomeje ikusanya ry ’ amakuru, yagaragaje ko ibisasu byahanuye indege ya Perezida Habyarimana byaturutse mu gace gaherereyemo ikigo cya gisirikare cya Kanombe kandi ako gace kakaba kari kazwiho kurindwa n’ abasirikare ba Leta y’ icyo gihe.
Ku rundi ruhande, Kayumba Nyamwasa wahoze ari umugaba mukuru w’ ingazo z’u Rwanda nyuma agahunga igihugu ubu akaba atavuga rumwe na Leta y’u Rwanda, we ubwe ashinja FPR-Inkotanyi na we yabarizwagamo, ko ari bo bahanuye iyi ndege yari itwaye abakuru b’ ibihugu babiri; uw’ u Rwanda n’ u Burundi.
Urupfu rwa Perezida Habyarimana Juvénal rwakurikiwe n’ubwicanyi ndengakamere, aho inzirakarengane zirenga miliyoni zishwe, bityo Umuryango w’Abibumbye ukemeza ko mu Rwanda habaye Jenoside yakorewe abatutsi; umukuru wa Guverinoma yayikoze, Jean Kambanda wamaze guhabwa igifungo cya burundu, abyemerera urukiko mpanabyaha rwa Arusha.
Ishyingurwa rya Perezida Yuvenali Habyarimana
Umurambo wa Perezida Habyarimana wakuwe i Kanombe ujyanwa i Gisenyi aho avuka, uhamara ibyumweru bisaga bitatu aho bari bategereje kumushyingura mu cyubahiro nk’ uko tubikesha inkuru yasohotse mu kinyamakuru Umwezi gikorera mu Rwanda, muri numero yacyo ya 81 yasohotse ku wa 30 Gicurasi 2011.
kinani
Perezida Habyarimana nyuma y’aho umurambo unaniwe gushyingurwa watwitswe n’abahinde

Ntibyashobotse kuko muri biriya bihe intambara yari irimbanyije kandi ingabo za FPR zihuta mu buryo butangaje. Umuryango wa Habyarimana waje gusaba uwari Perezida wa Zaire, RDC y’ ubu, Mobutu Seseko, kuba abitse umurambo wa Habyarimana by’agateganyo, kuko bateganyaga kuzamugarura mu Rwanda agashyingurwa mu cyubahiro.
Nibwo Mobutu ajyanye umurambo wa Perezida Habyarimana aho avuka i Gbadolite, ahashyingurwa by’ agateganyo kuko Mobutu yijeje umuryango wa Habyara ko azashyingurwa mu Rwanda ko azamuhambisha.
Tariki ya 12 Gicurasi 1997, ubwo Kabila Laurent Désiré yarwanyaga Mobutu, agiye gufata Umujyi wa Gbadolite, umurambo wa Habyarimana wakuwe i Gbadolite mu ndege ya Cargo ujyanwa i Kinshasa, ngo kuko Mobutu yumvaga ingabo za Kabila zidashobora kuhagera.
Umurambo wageze i Kinshasa tariki ya 13 Gicurasi 1997. tariki ya 16 Gicurasi 1997, nyuma hasohoka amakuru avuga ko mbere y’ uko Mobutu ava i Kinshasa, ngo yategetse Abahinde bo mu bwoko bwa Hindu babaga muri uwo mujyi gufata umurambo wa Habyarimana ugakorerwaho imihango, barangiza bakawutwika.
Kugeza magingo aya, urujijo rukaba rukiri aho, hibazwa iby’ uwarashe indege y’ uwari umukuru w’ u Rwanda; dore ko ifatwa nk’ imbarutso ya Jenoside yakorewe abatutsi muri Mata 1994, igatwara ubuzima bw’ abasaga miliyoni.
Kanda hano ujye ubona amakuru yihuse kandi kugihe kuri Facebook no kuri twitter
Nzirambahari Nzibonera-Bwiza.com

Izindi wakunda

Bwiza.com
error: Ntibyemewe