bwiza.com
Ahabanza » U Rwanda rugiye guha akazi abantu barugabaho ibitero hakoreshejwe ikoranabuhanga
Amakuru Politiki

U Rwanda rugiye guha akazi abantu barugabaho ibitero hakoreshejwe ikoranabuhanga

Minisitiri w’ikoranabuhanga Jean Philbert Nsengimana aravuga ko leta y’u Rwanda ikomeje urugamba rwo guhangana n’ibitero by’ikoranabuhanga bigera ku 1000 birugabwaho buri munsi. Iyi Minisiteri ikaba yarateguye umushinga w’itegeko rishinzwe umutekano w’ikoranabuhanga aho ngo bashobora kuzaha akazi abagaba ibyo bitero bazwi nka hackers.
Jean Philbert Nsengimana Minisitiri w’Urubyiruko n’Ikoranabuhanga ejo kuwa mbere yagejeje ku nteko ishinga amategeko , Umushinga w’itegeko rishyiraho Urwego rw’igihugu rushinzwe umutekano w’ibijyanye n’ikoranabuhanga, rikanagena inshingano, imiterere n’imikorere byarwo.

nsengimana
Jean Philbert Nsengimana Minisitiri w’urubyiruko n’ikoranabuhanga

Mu mutekano w’ikoranabuhanga, hari inshingano zisanganywe n’Ikigo cy’igihugu cy’Iterambere, RDB, Ikigo cy’igihugu kigenzura imirimo imwe n’imwe ifitiye igihugu akamaro, RURA n’inzego z’umutekano zirinda amakuru yazo y’ibanga.
Minisitiri Nsengimana yavuze ko ubwo bushobozi butuma bimenya mbere amakuru yagira akamaro mu guhangana n’ibyaha byifashishije ikoranabuhanga, urwego rugiye gushyirwaho rukazajya ruyahuriza hamwe rukanagaragaza ufite inshingano n’ubushobozi bwo kugira icyo ayakoraho.
Yagize ati “Ubu ibitero tugabwaho buri munsi, birenga 1000 ku munsi nk’igihugu, birahagarikwa.”
Nsengimana yavuze ko byagorana ko umuntu umwe ku giti cye agira ububasha bwose ku buryo yakwifasha umutekano w’ikoranabuhanga, ndetse ngo polisi “izakomeza kubaka ubushobozi kugira ngo ibashe kugenza ibyaha bikoreshejwe ikoranabuhanga.”
Hari ishoramari u Rwanda rwakoze
Minisitiri ushinzwe ikoranabuhanga yavuze ko hari ibikorwa remezo by’ubwirinzi byamaze kubakwa, “kuko ibyaha byinshi babanza kwiba ibiranga umuntu akaba aribyo bakoresha bakora ibyaha, noneho uzajya gukora iperereza yagira ngo afashe umunyabyaha ugasanga afashe umuntu udafite aho ahuriye n’ibyo bintu.”
Yakomeje ibyo bikorwa remezo bifasha ku buryo bitakabaye bihagije kugira ngo umuntu agende akwiyitirire yandikishe nka Sim card nyuma ayikoreshe ibyaha.
Minisitiri Nsengimana yanavuze ko hariho n’ikindi kigo gishinzwe guhangana n’ibitero by’ikoranabuhanga, ku buryo hagize ikiba, hari ahantu amakuru ashobora kubikwa nk’aya leta n’andi y’ingirakamaro.
Aba ‘Hackers’ bashobora kuzahabwa akazi
Minisitiri Nsengimana yatanze urugero ko nko mu Bwongereza, aho umwana yafunzwe azira kwinjira mu mabanga y’ikigo gishinzwe iby’Ubumenyi bw’ikirere muri Leta zunze ubumwe za Amerika, NASA, akayashyira hanze, ku buryo ngo byagaragaye ko umuntu umwe ashobora gushyira hasi igihugu yifashishije ikoranabuhanga.
Ati “Aha rero birasaba ko iki kigo kizagira ubushobozi buhagije, kikagira abantu b’inzobere, abo ngabo bita aba ‘Hackers’, byaba na ngombwa kikanabegera kikabakoresha, niba hari abo dufite mu Rwanda.”
Yanagaragaje impungenge ko akenshi ari abantu bato batahabwa akazi ko kwirirwa bicaye, uretse ko ku giti cyabo banabyikorera nijoro. Yavuze ko batarashobora kumva neza uburyo bakorana n’aba Hackers, ku buryo iyo udakoranye nabo bakurwanya ugasanga ni imbaraga zipfa ubusa.
Nta buryo mpuzamahanga buhari bwo kurwanya ibi byaha kuko Umuryango Mpuzamahanga w’Itumanaho, ITU, wabigerageje bikanga, bisaba ko ibihugu byirwanaho. U Rwanda ariko rufatanya n’ibihugu by’akarere mu guhanahana amakuru ku bitero by’ikoranabuhanga bikorerwa mu gihugu kimwe, bibangamiye ikindi.
Kugeza ubu 35% by’Abanyarwanda nibo bakoresha internet, 95 % bakayigeraho bakoresheje telefoni zigendanwa.
Ishingiro ry’Umushinga w’itegeko rishyiraho Urwego rw’igihugu rushinzwe umutekano w’ibijyanye n’ikoranabuhanga, rikanagena inshingano, imiterere n’imikorere byarwo wemejwe, ukazashyikirizwa komisiyo ibishinzwe kugira ngo iwusuzume mu buryo bwimbitse.
Kanda hano ujye ubona amakuru yihuse kandi kugihe kuri Facebook no kuri twitter
Alphonse Munyankindi / Bwiza.com
 
 

Izindi wakunda

Bwiza.com
error: Alert: Ntabwo byemewe!!