bwiza.com
Ahabanza » Burundi: Minisitiri w’ingabo araburira abasirikare bagitekereza guhirika ubutegetsi ababwira ko bacira kuko birura
Amakuru mashya Politiki

Burundi: Minisitiri w’ingabo araburira abasirikare bagitekereza guhirika ubutegetsi ababwira ko bacira kuko birura

Abaminisitiri batatu barebwa n’ibibazo bimaze iminsi byibasiye igihugu cy’u Burundi, barimo uw’ingabo, uw’ububanyi n’amahanga n’uw’umutekano, kuri uyu wa Kane tariki 18 Gashyantare bitabye Inteko Ishinga Amategeko bahatwa ibibazo bitandukanye bireba minisiteri bayoboye.

????????????????????????????????????

Minisitiri w’umutekano w’u Burundi, Alain Guillaume Bunyoni yavuze ko mu mwaka wa 2015 hafashwe imbunda nini 22, imbunda zisanzwe 643, imbunda nto za pistol 22, grenade 851, ndetse na bombe 14. Ibi bikoresho byose ngo bikaba byarafashwe mu mezu 6 gusa.

Minisitiri w’umutekano yabajijwe ikibazo cy’abashinzwe umutekano bavugwaho nabo ubwabo ibikorwa byo guhungabanya umutekano, avuga ko hari gutegurwa ingamba zo kubirwanya.

Yabajijwe kandi ikibazo cy’abantu bafatwa nyuma bakaburirwa irengero, arabihakana avuga ko izo nkuru zikwirakwizwa n’abarwanya ubutegetsi bashyigikiye imyivumbagatanyo. Yongeyeho ko basanze hari n’abagizi ba nabi biyambika imyambaro y’abashinzwe umutekano.

????????????????????????????????????

Minisitiri w’ububanyi n’amahanga, Alain Nyamitwe, yabajijwe icyo arimo arakora kugirango asubize mu buryo umubano w’u Burundi n’ibihugu by’u Burayi, Amerika ndetse n’u Rwanda, maze asubiza muri aya magambo:

“ Turakomeza gusobanurira amahanga ko byose mu bivugwa ku Burundi Atari byo. Urebye amatangazo basohoraga mu minsi ishize, n’ayasohoka ubu, hari icyahindutse. Nk’inama ishyirahamwe ry’Ubumwe bw’u Burayi riherutse gutegura ku Burundi, benshi basabaga ko dufatirwa ibihano, ariko basabye ko hashyirwa imbere ibiganiro.”

????????????????????????????????????

Naho minisitiri w’ingabo w’u Burundi, Emmanuel Ntahomvukiye, yasabye abasirikare baba bagitekereza guhirika ubutegetsi ko bacira kuko birura.

Yagize ati: “Abagifite ako gatima bakwitandukanya nako kuko hariho n’abatangiye gusaba ko igihano cyo gupfa cyagarukanwa kuri abo bantu.”

Imitwe imaze kwiyemerera ko irwanya ubutegetsi bw’u Burundi nk’uko iyi nkuru dukesha BBC isoza ivuga, ni Forebu yiganjemo abashatse guhirika ubutegetsi, Red Tabara, FNL ya Nzabampempa ndetse n’amashyirahamwe adaharanira inyungu za politiki.

Kanda hano ujye ubona amakuru yihuse kandi kugihe kuri Facebook no kuri twitter

Dennis Ns./Bwiza.com

Izindi wakunda

Bwiza.com