bwiza.com
Ahabanza » Byinshi ku gitero Israel yigeze kugaba kuri Leta Zunze Ubumwe za Amerika. Igice cya II
Amakuru Amateka

Byinshi ku gitero Israel yigeze kugaba kuri Leta Zunze Ubumwe za Amerika. Igice cya II

Igitero kuri USS Liberty ni igitero cyagabwe ku bwato bw’Abanyamerika bwari bushinzwe ubutasi n’ubundi bushakashatsi, kigabwe n’indege z’gisirikare cyo mu kirere cya Israel ndetse n’amato y’intambara kuwa 08 Kamena 1967, mu Ntambara y’Iminsi 6 hagati ya Israel n’ibihugu byari byishyize hamwe by’Abarabu. Icyi gitero cyo mu kirere no mu mazi icya rimwe cyahitanye abantu 34 bari muri ubu bwato abandi 171 barakomereka ndetse n’ubwato burangirika bikomeye. Icyo gihe, ubwato bw’Abanyamerika byavugwaga ko bwari mu mazi mpuzamahanga mu majyaruguru ya Sinai mu birometero nka 42 uvuye mu mujyi wo mu Misiri witwa Arish.

Nyuma y’iki gitero, nk’uko mu nkuru yabanje dukomeje igice cya kabiri cyayo twabibabwiye, Israel yasabye imbabazi ivuga ko habayeho kwibeshya mu gutera USS Liberty nyuma yo kuyitiranya n’ubwato bwa Misiri. Ibihugu byombi (USA na Israel)byakoze iperereza, maze bisohora raporo byanzura ko habaye kwibeshya mu kugaba igitero kuri USS Liberty bitewe n’uko Israel yagize gushidikanya ku mwirondoro wayo, nubwo abarokotse iki gitero bamaganye iyi myanzuro bagakomeza kwemeza ko iki gitero cyagabwe ku bwende.

ussliberty-dees

Mu 1968, guverinoma ya Israel yishyuye 3,323,500 $ (uyahaye agaciro mu 2016 akaba ari miliyoni 22,6$)y’impozamarira ku miryango y’abaguye muri iki gitero 34. Muri Werurwe 1969, Israel na none yishyuye andi mafaranga angana na 3,566,457 $ ku bakomerekekeye muri iki gitero. Kuwa 18 Ukuboza 1980, Israel yongeye kwemera kwishyura Miliyoni 6 $ ya nyuma kuri fagitire ya miliyoni 17,132,709 yo kwangiza ubu bwato ubwabwo kongeraho inyungu y’imyaka 13.

Dusubire inyuma gato noneho turebe imbarutso y’iki gitero

Mu Ntambara y’Iminsi 6 hagati ya Israel n’ibihugu byinshi by’Abarabu, Leta Zunze Ubumwe za Amerika zirinze kugira uruhande zibogamiraho. Iminsi myinshi mbere y’uko intambara itangira, bwa bwato bw’Abanyamerika tugarukaho cyane, USS Liberty, bwari bufite amabwiriza yo gukomeza kwerekeza mu burasirazuba bw’Inyanja ya Mediterane bukajya gushakisha amakuru mu mazi mpuzamahanga hafi y’amajyaruguru ya Sinai mu gihugu cya Misiri.

Intambara imaze kwaduka, habayeho impungenge z’umutekano w’ubu bwato maze mu gihe burimo burasatira aho bwagombaga gukorera ubutasi bwabwo, bwohererezwa ubutumwa bwinshi bubusaba kugerageza kujya kure ya Misiri na Israel bukava mu birometero 28 bwari buri hafi ya buri gihugu mu byari bihanganye, bukajya mu birometero byibuze 190. Kubw’amahirwe macye, bitewe n’inzira ndende ubutumwa bwacagamo, ubutumwa bwageze kuri USS Liberty igitero cyarangije kuba.

battledressingstation2
Icyo gihe abantu benshi bahasize ubuzima

Nk’uko amakuru yavuye muri Israel avuga, ngo ubwo Intambara y’Iminsi 6 yatangiraga kuwa 05 Kamena, Gen. Yitzhak Rabin wari umugaba w’ingabo za Israel icyo gihe, yabwiye Komanda Ernest Carl Castle, wari ushinzwe ibibazo bijyanye n’amato y’abanyamerika muri ambasade ya Leta Zunze Ubumwe za Amerika I Tel Aviv ko Israel yiteguye kurinda inkombe zayo mu buryo bwose bushoboka ifite harimo no kuroha amato atazwi. Yanaboneyeho gusaba Leta Zunze Ubumwe za Amerika kurekera amato yazo kure y’inkombe zayo cyangwa se byibuze bakamenyesha Israel aho ayo mato yabo aherereye ha nyaho.

Amakuru yavaga muri Amerika yo avuga ko nta cyakozwe ngo hamenyekane amato yabo yari hafi aho kugeza aho igitero kuri USS Liberty kirangiriye. Nyamara, ngo uwari Umunyamabanga wa Leta wa Amerika Dean Rusk yoherereje ubutumwa uwari ambasaderi muri Israel, Walworth Barbour, amusaba ko ibyo Israel yari imaze gusaba bihita bikorwa ikamenyeshwa aho amato yabo ari muri Mediterane, ariko ambasaderi Barbour we avuga ko amakuru ku mato y’Abanyamerika yakoreraga hafi ya Sinai yasabwe USS Liberty yamaze guterwa.

Barbour yakomeje avuga ko iyo Israel iba yarasabye aya makuru byari kubanza kugezwa ku muyobozi w’ibikorwa byo mu mazi n’abandi bayobozi bakuru mu gisirikare cyo mu mazi ndetse bikagezwa muri department ya leta ishinzwe ingabo.

Wikipedia dukesha aya mateka ivuga ko nyuma y’uko intambara itangiye, Capt. William L. McGonagle wa USS Liberty yasabye Vice Admiral William I. Martin wari uri ku birindiro bya gatandatu bya Amerika mu mazi ngo yohereze ubwato bita Destroyer bwo guherekeza USS Liberty buyicungiye umutekano ndetse inifashishwe mu itumanaho ry’inyongera.

Umunsi wakurikiyeho, kuwa 06 Kamena, Admiral Martin yasubije ko USS Liberty iriho ibirango bigaragaza ko ari iy’Abanyamerika kandi iri mu mazi mpuzamahanga kandi itari mu makimbirane hakaba nta gihugu gikeneye kuyitera, ubusabe buba buranzwe. Yijeje ariko ko hagize ikibazo gitunguranye kivuka indege z’intambara ziri ku birindiro mu minota 10 zaba zibari hejuru.

Hagati aho, kuri uwo munsi kuwa 06 Kamena, mu Muryango w’Abibumbye, mu gusubiza ibirego byaregaga Amerika gushyigikira Israel muri iyi ntambara, Ambasaderi wa Leta Zunze Ubumwe za Amerika muri Loni icyo gihe, Arthur Goldberg yabwiye Akanama k’Umutekano ko ibirindiro byabo (Sixth Fleet) byari mu birometero magana uvuye aho intambara yaberaga.

Nyuma yo gutangaza ibi rero nibwo USS Liberty yahuye n’akaga kuko byari bimaze gutangazwa ko yakoreshwaga n’ibirindiro bya Sixth Fleet kandi bavuga ko ibi birindiro biri kure hagati mu Nyanja ya Mediterane hagati ya Libya na Crete, nyamara ubwato buri mu birometero 24 gusa mu majyaruguru ya Sinai.

Mu ijoro ryo kuwa 07 Kamena, ku isaha ya Washington, hari mu gitondo cya kare nka saa 3:10 ku isaha yo mu Burasirazuba bwo Hagati, kuwa 08 Kamena, Pentagon yategetse bya birindiro bya Sixth Fleet kubwira USS Liberty kujya kure mu birometero nka 190 uvuye kuri Israel, Syria ndetse no ku nkengero za Sinai.

USS-Enterprise
Sixth Fleet ubwato bunini bwakoreshwaga nka Base y’ibikorwa by’igisirikare cya Amerika muri Mediterane

Nk’uko byemejwe n’iperereza ryakozwe n’urukiko rushinzwe ibibazo byo mu mazi ndetse na NSA, ngo amabwiriza yo gusubira inyuma ntabwo yatanzwe ku mirongo ya radio yagenzurwaga na USS Liberty kugeza nyuma y’amasaha menshi igitero cyabaye bitewe n’ibibazo byo kubasha gusobanura mu buryo bwihuse ubutumwa bwoherezwaga akenshi buba buri muri za codes ku bazi ibya gisirikare.

Bivugwa ko ubu bwato bwari burimo burakira amakuru menshi cyane atandukanye harimo n’ay’afitanye isano n’iyi ntambara yabaga yose yabaga ari kwitabwaho icyo gihe, hiyongeraho n’umubare muto w’abantu bari bazobereye kwakira no gusobanura byihuse ubu butumwa bituma ubutumwa bwo gusubira inyuma kwa USS Liberty butinda.

Nyuma y’imyaka 15 iki gitero kibaye, umupilote w’umunya-Israel yegereye abarokotse igitero kuri USS Liberty ndetse agirana ikiganiro kirambuye n’uwahoze mu nteko ishinga amategeko, Paul N. McCloskey ku ruhare rwe muri icyo gitero.

Uyu munya-Israel yatangaje ko batumwe kurasa USS Liberty akabona ko ubwato ari ubw’Abanyamerika ahita abimenyesha abamukuriye bari babatumye, maze akabwirwa ko agomba kwirengagiza ibendera ry’Abanyamerika agakomeza igitero, ariko undi ngo aranga asubira ku birindiro ahita atabwa muri yombi.

Undi munya-Israel wari ufite ipeti rya Major nawe nk’uko bitangazwa na Whatreallyhappened.com, we yatangaje ko yari ari mu cyumba cy’intambara cya Israel, aho yumviye ibyavugwaga n’abapirote ba Israel bavugana no ku birindiro. Uyu avuga ko abapilote ba Israel ndetse na buri wese bari bazi ko bateye ubwato bw’Abanyamerika ariko bakanga bakabutera.

Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com

Izindi wakunda

Bwiza.com