bwiza.com
Ahabanza » Imihigo si uburyo bwo gushimisha bamwe cyangwa guhana abandi, ni uguhindura ubuzima bw’abaturage-Perezida Kagame
Amakuru mashya Politiki

Imihigo si uburyo bwo gushimisha bamwe cyangwa guhana abandi, ni uguhindura ubuzima bw’abaturage-Perezida Kagame

Mu muhago waberaga muri Kigali Convention Centre kuri uyu wa Gatanu tariki tariki ya 9 Nzeli, wo kwesa imihigo ya 2015/2016 no guhiga iya 2016/2017, Perezida Kagame yavuze ko imihigo atari uburyo bwo gushimisha bamwe cyangwa guhana abandi, ahubwo ko ari uguhindura ubuzima bw’abaturage.
Muri uyu muhango, Perezida Kagame kandi yaboneyeho kwibutsa abayobozi ko ubuyobozi atari ubw’umuntu ku giti cye, ahubwo ko ari uburyo umuyobozi akorana n’abandi kugira ngo bagere ku ntego imwe.
Yakomeje avuga ko kandi ko ubuyobozi ari uburyo bwo kwigira ku makosa yabaye kugira ngo atazasubira.
Ibi byose Perezida yabitangaje ubwo yari amaze kugezwaho uko uturere twesheje imihigo twahize (2015/2016), akaba yaboneyeho gutanga izi mpanuro.
Ati: “Abantu bananirwa kugera ku byo biyemeje iyo bahisemo gukurikirana inyungu zabo bwite kurusha inyungu z’abo bayoboye…, Ibyagezweho bikwiye gusuzumwa hashingiwe ku buzima bw’Abanyarwanda ntibikwiye gusuzumwa kubera imibereho bwite y’abayobozi”.
Yakomeje agira ati: “Uburyo bwonyine bwo gusuzuma imiyoborere myiza ni ukureba umubare w’abaturage bazamutse mu yindi ntera, twabonye ibisabwa ngo tugere ku iterambere. Dukwiye kwitegura gukora icyo bisaba ngo bigerweho, nta nzira ya bugufi ihari”.
Mu gusoza perezida Kagame yibukije Abanyarwanda bose muri rusange ko u Rwanda ari urwabo, ko atari urutizanyo, ko bikwiye ko barukorera ndetse bakaruhindura, akaba asaba abayobozi gukorera hamwe: “Tudakoreye hamwe ntitwagera ku ntego twihaye”.
Kanda hano ujye ubona amakuru yihuse kandi kugihe kuri Facebook no kuri twitter
Itangishatse Théoneste/Bwiza.com

Izindi wakunda

Bwiza.com