bwiza.com
Amakuru mashya Politiki

Ikibazo cy’indwara zo mu mutwe ziterwa n’ibiyobyabwenge kirarushaho guhangayikisha

U Rwanda ruhangayikishijwe n’ubwiyongere bw’abakoresha ibiyobyabwenge mu gihe Ibitaro byita ku ndwara zo mu mutwe bivuga ko bikomeje kwakira abatewe ibibazo byo mu mutwe n’inzoga zitemewe biganje mu b’imyaka hagati ya 18 na 35.

[ad id=”44145″]

Nubwo benshi mu bakirwa ari ababaswe n’inzoga zikaze nka wine n’izitwa spirits, ngo hari no kwiyongera kw’abakoresha ibiyobyabwenge bikomeye nk’urumogi na mugo (Heroin). Abayobozi bakaba bavuga ko ibibazo biterwa n’inzoga byongerewe no kunywa inzoga zibujijwe.

Ibibazo byinshi turi kwakira muri iyi minsi n’ibyo kubatwa n’ibisindisha, kandi igiteye impungenge ni uko benshi ari abakoresha ibisindisha bigurwa macye muri rubanda bitagaragaza urugero rwa alcohol irimo”, uwo ni Yvonne Uwamahoro ukuriye ikigo cy’indwara zo mu mutwe muri Kigali.

Byibuze abantu 165 basura ibitaro by’indwara zo mu mutwe buri munsi nk’abarwayi bataha, mu gihe abagera kuri 315 bacumbikiwe mu bitaro. Mu mwaka ushize, ibi bitaro byitaye ku bibazo 1,125 by’indwara zo mu mutwe bifitanye isano no gukoresha ibiyobyabwenge. Uyu mubare ukaba warazamutse ugereranyije n’abantu 800 bakiriwe mu mwaka wari wabanje.

Uyu ni umubare munini ukomeza kuzamuka, kandi ushobora kurushaho kuzamuka birenze uru rugero muri uyu mwaka,” uwo ni Innocent Nsengiyumva, umuganga w’indwara zo mu mutwe mu Bitaro bya Ndera.

Ibi bitaro kandi bifite ikibazo cy’inkunga n’abakozi bidahigije mu gihe abarwayi biyongera. Bivugwa ko abaterankunga batangaga 30% by’ingengo y’imari y’imiti n’ibikoresho bayigabanyije ikagera ku 10% bigasiga icyuho kinini.

Iyi nkuru dukesha The East African ikomeza ivuga ko kwita ku ndwara zo mu mutwe bitwara miliyoni 161.8 buri mwaka, ndetse na miliyoni 60 mu kuvura indwara bifitanye isano.

Ni muri urwo rwego Charles Nkubiri wo mu Bitaro bya Ndera avuga ko bagiye gutegura igikorwa cyo gukusanya inkunga ngo harebwe ko haboneka amafaranga yo gufasha abarwayi.

Raporo y’Ishami ry’Umuryango w’abibumbye ryita ku Buzima (WHO) yo mu 2014 ku nzoga no ku buzima, yagaragaje ko kunywa inzoga zisanzwe n’izikaze bita spirits mu banyarwanda biri ku rugero rwa 11%.

[ad id=”44145″]

Abayobozi mu Rwanda bavuga ko kunywa inzoga zitemewe, gukoresha ibiyobyabwenge n’indi miti itemewe bigira uruhare mu makimbirane mu miryango no gufata ku ngufu. Ikigo cy’igihugu cy’ibarurishamibare kikaba kivuga ko ibyaha byatewe no gukoresha ibiyobyabwenge n’imiti igira ingaruka nko kurwana n’ubujura ku bwonko byari 3,180 mu 2014.

Imibare ikaba yaragaragaje ko 89% by’inzoga zinywebwa ari iziba zenzwe mu buryo gakondo cyangwa zigurishwa mu buryo butemewe nka Muriture, Bareteta, Yewe Muntu, Ibikwangari, Kambuca, Akayuki, Imbutabuta n’izindi.

Ikigo cy’igihugu cy’Ubuziranenge (RSB) kikaba kivuga ko muri izi nzoga zikorwa mu buryo bunyuranyije n’amategeko hasangwamo urugero ruteye ubwoba rwa alcohol. Philip Nzayire wo muri iki kigo akaba avuga ko abakora inzoga batabifitiye uburenganzira bakwiye kubanza kubusaba bitaba ibyo bakazabura business zabo mu gihe baba bafashwe.

[ad id=”44145″]

Igipolisi cy’u Rwanda cyatangije umukwabu wo kurwanya inzoga nk’izi ndetse n’izindi nka kanyanga n’ibindi biyobyabwenge byinjira mu Rwanda bivuye mu bihugu by’ibituranyi, ariko ubucuruzi bwabyo buracyagaragara nubwo polisi ihozaho imikwabu yo guta muri yombi ababikora no kwangiza ibiyobyabwenge iba yafashe.

Kanda hano ujye ubona amakuru yihuse kandi kugihe kuri Facebook no kuri twitter

Dennis Ns./Bwiza.com

Izindi wakunda

Bwiza.com