bwiza.com
Ahabanza » Intambara zahitanye abantu benshi kurusha izindi mu mateka y’Isi
Amakuru Amateka

Intambara zahitanye abantu benshi kurusha izindi mu mateka y’Isi

Ubusanzwe buri muntu wese avukana uburenganzira bwo kubaho ariko rimwe na rimwe abandi bantu bima bagenzi babo b’inzirakarengane ubu burenganzira bakabica (Jenoside, abanyagitugu batagira umutima, intambara hagati y’abaturage, ubwicanyi bukorewe abantu benshi). Kenshi iyo ibintu nk’ibi bibaye, ibihugu bifite imbaraga biratera bigahagarika abanyagitugu cyangwa ubutegetsi bukorera abaturage babyo ubugizi bwa nabi. Kimwe mu bintu byakunze kuranga ikiremwamuntu kuva cyagera ku Isi ni ukurwana hagati yacyo. Rimwe narimwe guhangana birenga imbibi bikagera no ku bantu b’inzirakarengane. Niyo mpamvu twabateguriye urutonde rw’intambara cyangwa amakimbirane yagiye ahitana abantu benshi n’aho ubwicanyi bwagiye bubera.

[xyz-ihs snippet=”google-pub”]

01. Intambara ya II y’Isi

soviet-troops-fought-the-japanese-during-the-battle-of-khalkhin-gol-in-mongolia-1939

Intambara ya Kabiri y’Isi ni intambara yahuje isi yose yatangiye mu 1939 irangira mu 1945. Iyi ntambara yagiyemo ibihugu hafi ya byose byo ku isi birimo n’ibyibihangange kurusha ibindi haza kuvuka impande 2 zari zihanganye. Iyi niyo ntambara yamamaye kurusha izindi ku Isi yahuriyemo abasirikare babarirwa muri miliyoni 100. Iyi ntambara yashyizwemo imbaraga zose zari zihari, yaguyemo abaturage b’abasivili benshi cyane, ibamo jenoside yakorewe Abayahudi, ikoreshwamo intwaro za kirimbuzi ku buryo yahitanye abantu babarirwa hagati ya miliyoni 40 na miliyoni 70.

02. Imyivumbagatanyo ya Taiping (Taiping Rebellion)

naval-battle-between-taiping-qing-on-yangtze

Imyivumbagatanyo ya Taiping isobanurwa nk’intambara hagati y’abaturage yabereye mu majyepfo y’u Bushinwa kuva mu 1850 kugeza mu 1864, yari iyobowe na Hong Xiuquan wari umaze igihe gito abaye umukirisitu, ngo wari wabonekewe agakomeza kwemeza ko ari murumuna wa Yesu Kirisitu, akaba yararwanyaga ubutegetsi bwa Manchu bwari buyobowe n’umuryango wa Qing. Bivugwa ko iyi myivumbagatanyo yaguyemo abantu bagera kuri miliyoni 20 kuzamura biganjemo abasivili. Aya akaba ari amwe mu makimbirane yaguyemo abantu benshi mu mateka y’Isi.

03. Intambara ya I y’Isi

world-war-1

Intambara ya Mbere y’Isi ni intambara ngari yibanze mu Burayi ikaba yaratangiye mu 1914 ikarangira mu Ugushyingo 1918. Iyi ntambara nayo yahuriyemo ibihugu by’ibihangange byo ku Isi nabwo ihuza impande 2. Miliyoni 70 z’abantu zinjiye mu gisirikare harimo Abanyaburayi miliyoni 60. Abarwanyi bagera kuri miliyoni 9 barishwe ahanini bitewe n’aho iterambere mu ikoranabuhanga ryari rigeze mu bijyanye no gukora intwaro. Iyi ntambara nayo yaguyemo abantu babarirwa muri miliyoni 15 kuzamura.

04. Intambara ya Mongol

mongol-warriors-in-combat

Ubwami bw’abami bwa Mongol bwabanje kwitwa Leta Ikomeye ya Mongol, bwari ubwami bugari mu kinyejana cya 13 n’icya 14 aho bwavaga muri Aziya yo hagati bukagenda bukagera mu Burayi bw’uburasirazuba ku Nyanka y’u Buyapani bukanyura muri Siberia mu majyaruguru bukagenda bukanafata no muri Aziya y’amajyepfo ashyira uburasirazuba. Ubu bwami bwigeze kuba ubwami bw’abami bunini mu mateka y’isi bungana na kilometero kare 33,000,000 (22% by’ubuso bwose bw’isi) n’abaturage babarirwa muri miliyoni 100. Iyi ntambara yahabaye kuva mu 1207 kugeza mu 1472 yaguyemo abantu bari hagati ya miliyoni 30,000,000 na 60.

05. Imyivumbagatanyo ya An Lushan

an-lushan-rebellion

Iyi ntambara yabereye mu Bushinwa mu gihe cy’ingoma y’aba Tang guhera kuwa 16 Ukuboza 755 kugeza kuwa 17 Gashyantare 763. An Lushan wateje iyi ntambara aba yarahoze ari umujenerali wa Tang, akaza kwiyita Umwami w’Abami ndetse agashinga ubwami bwe mu majyaruguru y’u Bushinwa. Uku kwigomeka kwabayeho ku bwami butatu bwa Tang mbere y’uko Lushan akubitwa inshuro bidasubirwaho. Abantu baguye muri iyi myivumbagatanyo babarirwa hagati ya miliyoni 13 na miliyoni 36.

06. Intambara hagati y’aba Qing n’aba Ming

qing-dynasty-conquest-of-the-ming-dynasty

Umuryango w’aba Qing uzwi no ku izina rya Manchu, niwo wanyuma wayoboye ubwami mu Bushinwa wayoboye kuva mu 1644 kugeza mu 1912. Wari warabanjirijwe n’umuryango wa Ming ndetse wakurikiwe na Repubulika y’u Bushinwa. Intambara hagati y’iyi miryango ibiri yavagamo abami yabaye kuva mu 1616 kugeza mu 1662 yaguyemo abantu babarirwa muri miliyoni 25.

07. Intambara ya Timur -e-Lang

conquests-of-timur

Timur yari umuntu mu buzima bwe wakunze kutavugwaho rumwe ndetse na n’ubu akaba ariko akimeze. Yashatse kongera gusubiranya ubwami bw’abami bwa Mongol ariko aza guhura n’imbogamizi ikomeye ageze mu bwami bwa tatar Golden Horde bwari bumaze kuyoboka Isilamu. Yarwanye intambara nyinshi zagiye zikora kuri leta za kisilamu zimwe nko mu Bwami bw’Abami bwa Ottoman (Turkiya y’ubu). Intambara yagiye ashoza zaguyemo abantu bari hagati ya miliyoni 15 na 20.

08. Imyivumbagatanyo ya Dungan

dungan-revolt

Iyi myivumbagatanyo yaguyemo ababarirwa muri miyoni 8 yabaye kuva mu 1862 kugeza mu 1877, yaranzwe no guhangana hagati y’udutsiko tw’amabandi n’abasirikare ariko ngo bose nta kintu barwanira gifatika nta n’intego bashaka kurwana gusa. Benshi bafashe ko iyi myivumbagatanyo yari igamije gukuraho ubwami bwa Qing ariko nta kimenyetso cyagaragaje ko hariho gahunda yo kugaba ibitero ku murwa mukuru Beijing. Iyo myivumbagatanyo irangiye, abaturage bo muri ubu bwoko bwa Dungan bimukiye ku bwinshi mu Burusiya, Kazakhstan no muri Kyrgyzstan.

09. Intambara hagati y’abaturage mu Burusiya

russian-civil-war

Intambara hagati y’abaturage mu Burusiya yabaye kuva mu 1917 kugeza mu 1921 yaguyemo abantu bari hagati ya miliyoni 5 na miliyoni 9. Ni intambara yahuje impande nyinshi zitandukanye mu cyahoze ari ubwami bw’abami bw’Abarusiya, nyuma y’aho guverinoma y’u Burusiya yari iriho iviriyeho igasimbuzwa iy’Abasoviyete yari iyobowe n’ishyaka rya Bolshevik. Ingabo z’Abasoviyete zabanje kwigarurira Petrograd hanyuma zigarurira u Burusiya bwose.

10. Intambara zo kurwanya Napoleon

napoleonic-wars

Izi ntambara zaranzwe n’ibitero bitandukanye byagabwe n’abantu bishyiraga hamwe ku bwami bw’abami bw’Abafaransa bwari buyobowe na Napoleon. Nyuma y’intambara zatewe n’Impinduramatwara y’Abafaransa mu 1789, imbaraga z’u Bufaransa zagiye zizamuka cyane mu gihe ingabo za Napoleon zabaga zigarurira igice kinini cy’u Burayi, ariko izi mbaraga ziza gucika bigaragara nyuma yo gutera u Burusiya mu 1812. Nyuma y’aha, Ubwami bwa Napoleon bwaje gutsindwa bidasubirwaho busiga hapfuye abantu babarirwa hagati ya miliyoni 3,5 na miliyoni 7.

Source: Wonderlist.com

Kanda hano ujye ubona amakuru yihuse kandi kugihe kuri Facebook no kuri twitter

Dennis Ns./Bwiza.com

Izindi wakunda

Bwiza.com