bwiza.com
Amakuru mashya Politiki

Diane Rwigara, nyina na murumuna we bahakanye ibyaha byose baregwa

-Mu cyubahiro cy’Imana ndabashimiye, ibyaha ndegwa ntabwo mbyemera
-Nanjye ntabwo mbyemera
-Ibyaha ndegwa n’ubu biracyantungura, ntabwo mbyemera
Aya ni amagambo yatangajwe n’abo kwa Rwigara, Diane Rwigara, nyina Mukangemanyi Adeline ndetse na murumuna we, Anne Rwigara, ubwo bari bamaze kwibutswa ibyaha baregwa mu iburanishwa ryasubukuwe kuri uyu wa 11 Ukwakira 2017, mu cyumba cy’Iburanisha cy’urukiko Rwisumbuye rwa Nyarugenge ruri i Nyamirambo.
Diane Rwigara akurikiranyweho icyaha cyo gukora no gukoresha inyandiko mpimbano no kugambirira guteza imvururu cyangwa imidugararo muri rubanda, akimara kwibutswa ibyo aregwa, yahawe ijambo agira ati “ntabwo mbyemera”.
Anne Rwigara akurikiranweho kugambirira guteza imvururu cyangwa imidugararo muri rubanda, na we yagihakanye agira ati “ibyaha ndegwa n’ubu biracyantungura, ntabwo mbyemera”.
Mukangemanyi Adeline we yihariye icyaha cy’ivangura no gukurura amacakubiri ndetse n’iki bahuriraho bose cyo kugambirira guteza imvururu cyangwa imidugararo muri rubanda, yabihakanye agira ati “mu cyubahiro cy’Imana ndabashimiye, ibyaha ndegwa ntabwo mbyemera”.
Kuri uyu munsi w’iburanisha, aba bose uko ari batatu bunganiwe na Me Buhuru Pierre Celestin, ariko Adeline Mukangemanyi avuga ko yasabye guhabwa abandi bavoka anagaragaza impamvu z’uko Me Buhuru atamwunganira n’abana be mu idosiye y’amapaji 600.
Adeline Mukangemanyi yasabye ko yakunganirwa na Me Gatera Gashabana, anasaba umwanya uhagije wo kuzabanza kwiga kuri dosiye, asaba urukiko ko rwakumva icyifuzo cye cyo kubanza kuyigaho, dore ko ngo yayibonye ku mugoroba w’ejo [ku wa 10 Ukwakira 2017].
[xyz-ihs snippet=”google-pub”]
Umushinjacyaha yavuze ko ibyo Mukangemanyi agaragaza nk’imbogamizi, ko dosiye yabo ari ndende [amapaji 600] ku buryo Me Buhuru atabunganira bose, ari amananiza no gushaka gutinza urubanza, akavuga ko nta zindi nzitizi zahagarika urubanza.
Adeline Mukangemanyi yasabye kongerwa amafaranga akabasha kubona ayo azishyura uzamwunganira, avuga ko amafaranga bari bafite polisi yayafatiriye ubwo mu rugo rwabo hakorwaga isaka hakorwa iperereza.
Me Pierre Celestin Buhuru yavuze ko yiteguye kunganira Diane na Anne Rwigara, ariko avuga ko atarabona amajwi (Audio) n’ubutumwa bwo kuri WhatsApp nka bimwe mu bigize ibimenyetso bishinja abakiriya be.
Agendeye ku busabe bwe n’ubw’abakiriya be, yasabye urukiko ko urubanza rwasubikwa, ubushinjacyaha busaba urukiko ko rutabiha agaciro.
Nyuma yo kwiherera iminota 30 k’Urukiko, Adeline yahawe iminsi 2 yo gushaka umwunganira, iburanisha ryimurirwa ku wa Gatanu tariki ya 13 Ukwakira 2017.
Kanda hano ujye ubona amakuru yihuse kandi kugihe kuri Facebook no kuri twitter
Itangishatse Théoneste/Bwiza.com

Izindi wakunda

Bwiza.com
error: Alert: Ntabwo byemewe!!