bwiza.com
Ahabanza » Dukomeze ubudasa mu cyerekezo twahisemo maze twubake u Rwanda twifuza- Jeannette Kagame
Amakuru mashya Politiki

Dukomeze ubudasa mu cyerekezo twahisemo maze twubake u Rwanda twifuza- Jeannette Kagame

Madamu Jeannette Kagame yasabye abanyamuryango ba Unity Club kwimakaza ubumwe mu Banyarwanda kuko bizagira uruhare rukomeye mu iterambere ry’ igihugu.
Ibi yabitangaje kuri uyu wa Gatanu tariki ya 27 Ukwakira 2017, ku munsi wa kabiri w’ ihuriro rya 10 ry’abanyamuryango ba ‘Unity Club’ by’ umwihariko barushaho kugira ubumwe bityo bikamurikira n’ Abanyarwanda bose muri rusange.

Umuryango Unity Club Intwararumuri, uhuriza hamwe abagize Guverinoma, abigeze kuyibamo ndetse n’abo bashakanye, ijambo yagejeje ku bari bitabiriye iri huriro rya 10, Madamu Jeannette Kagame yagize ati “Dukomeze ubudasa bw’u Rwanda mu cyerekezo twahisemo maze twubake u Rwanda twifuza”.
Yakomeje agira ati “Imyaka 21 irashize twiyemeje kunga ubumwe butanyeganyezwa, kugira ubwiyunge buhamye kwita ku iterambere ry’u Rwanda. Ubudasa bw’u Rwanda bwatunguranye mu buryo twavuye muri Jenoside, tukinjira mu buzima budasubira inyuma.”
Madamu Jeannette Kagame arashimira Guverinoma y’u Rwanda yimakaje ubumwe mu banyarwanda, ko ari ubudasa bw’Abanyarwanda nk’uko n’insanganyamatsiko y’uyu mwaka igira iti “Ubudasa bw’u Rwanda mu cyerekezo twahisemo”.
Ati “Mumfashe dushimire Guverinoma y’u Rwanda yaduhaye imbuto nziza y’ubumwe, tukemera kuyibiba, none tukaba dutangiye gusarura,…Ubudasa bw’u Rwanda bwatunguranye mu buryo twavuye muri Jenoside, tukinjira mu buzima budasubira inyuma, Ubudasa bugaragarira kandi muri gahunda twavomye mu muco wacu zikemura ibibazo twarimo”.
[xyz-ihs snippet=”google-pub”]
Arasaba abayobozi kureba kure, ati “Tube rero abayobozi bareba kure bakabona kare inzira twerekezamo abo tuyobora kuko dutwaye Urumuri rubamurikira, Unity Club itubera igipimo tureberaho niba ubumwe bukiturimo. Ntidukwiye kujenjeka kuko ntaho twari twagera”.
Gushinga ihuriro aba bayobozi bagize Unity Club bazajya bahuriramo bakaganira ku buzima bw’ igihugu ni imwe mu ngingo yaganiriweho ku munsi wa mbere w’iri huriro kandi igiye gushyirwa mu bikorwa mu bihe bitarambiranye.
Aba bayobozi basanze ari uburyo bwiza bwatuma iterambere ryihuta, ndetse abaturage bakarushaho kwiyumva mu buyobozi bityo ibibazo byugarije sosiyete bikajya bikemuka mu buryo bworoshye.
Muri iyi nama y’ iminsi 2, umuryango Unity Club waboneyeho umwanya wo kwakira abanyamuryango bashyashya 18 ni ukuvuga Abaministiri baherutse kwinjizwa muri Guverinoma n’ abafasha babo.
Ibikorwa bifatika byakozwe na Unity Club
Unity Club yagiye igaragaza ubuvugizi budasanzwe mu guha amahirwe impfubyi n’ abapfakazi mu kwishakira imibereho.
Uko iminsi yakomeje kwicuma, Unity Club yabashije kubakira impfubyi zarerewe mu kigo cya Noel ku Nyundo amazu 20 ndetse inubakira impfubyi za jenoside amazu 90 mu karere ka Nyamagabe.
Mu mwaka wa 2018 kandi Unit Club irateganya kuzubakira abacitse ku icumu rya jenoside amacumbi azaturamo abantu 50 biganjemo abakuze.
Ishyirahamwe Unity Club ryashinzwe mu mwaka wa 1996 , rigizwe n’ abaminisitiri bakiri mu mirimo ndetse n’ abahoze ari abaminisitiri n’ abagore babo.
Uyu muryango washinzwe mu rwego rwo guharanira ubumwe hagati y’ Abanyarwanda nyuma jenoside yakorewe Abatutsi ariko banafite intego yo guharanira iterambere rirambye ry’igihugu.
Amafoto y’umunsi wa mbere w’iri huriro:



Kanda hano ujye ubona amakuru yihuse kandi kugihe kuri Facebook no kuri twitter
Gaston Rwaka/Bwiza.com

Izindi wakunda

Bwiza.com
error: Alert: Ntabwo byemewe!!