bwiza.com
Ahabanza » RDC: Nyuma ya Gen. Tango Fort, Global Witness iratunga urutoki na Brig. Gen. Etienne Bindu
Amakuru Politiki

RDC: Nyuma ya Gen. Tango Fort, Global Witness iratunga urutoki na Brig. Gen. Etienne Bindu

Umuryango mpuzamahanga utegamiye kuri leta, Global Witness urashinja Brig. Gen. Etienne Mbunsu Bindu wo mu gisirikare cya Repubulika iharanira Demokarasi ya Congo, gusarura inyungu zituruka mu bucukuzi bwa zahabu muri Kivu y’Amajyaruguru mu gihe hariho itegeko ribuza abasirikare kwijandika mu bikorwa by’ubucukuzi bw’amabuye y’agaciro.
Nk’uko uyu muryango, uzobereye gukurikirana uko imitungo kamere y’ibihugu biri mu nzira y’amajyambere isahurwa, uvuga, ngo sosiyete yitwa GEMINACO ifite ikirombe mu burasirazuba bwa Congo, iha kimwe cya gatatu cy’umusaruro wayo umuhungu w’uyu Brig. Gen ushyirwa mu majwi. Uyu akaba yanze kugira icyo atangariza uyu muryango ubwo wamusabaga kugira icyo abivugaho.
[xyz-ihs snippet=”google-pub”]
Uyu muryango ukomeza uvuga ko iki kibazo cyanagejejwe ku rukiko rw’ubucuruzi rwa Goma ngo rutigeze rugira icyo rukora ngo ruhagarike ibi bintu nyamara hari itegeko ribibuza nk’uko iyi nkuru dukesha Jeune Afrique ikomeza ivuga.
Ibi bikaba byagiye ahagaragara nyuma y’igihe gito raporo y’Umuryango w’Abibumbye ishinjije undi musirikare mukuru mu ngabo za Congo, Gen. Gabriel Amisi Kumba uzwi nka “Tango Fort”, kugira amato ane akora ubucukuzi bwa zahabu mu mugezi wa Awimi.
Itegeko ryirengagijwe igihe kirekire
Global Witness ikomeza ivuga ko kwijandika mu bikorwa bibujijwe kw’ingabo za Congo ku nzego zitandukanye mu gucukura zahabu ari ibintu bimaze igihe kirekire ndetse ko muri rusange abakozi bakuru muri leta batandukanye bakunze gushinjwa gukoresha imyanya yabo mu gushaka kwigwizaho imitungo bafatanyije n’amasosiyete y’abanyamahanga ndetse bagakingirwa ikibaba n’inzego z’ubutabera.
Raporo iheruka ya Global Witness ivuga ko miliyoni 750$ zimaze kunyerezwa n’amasosiyete acukura amabuye y’agaciro muri iyi myaka.
Global Witness ikaba isaba ko hakorwa iperereza ryimbitse ku nyungu Brig. Gen. Bindu afite mu rwego rw’ubucukuzi bw’amabuye y’agaciro muri Kivu y’Amajyaruguru kandi inzego z’ubutabera zigakora akazi kazo.
 
Kanda hano ujye ubona amakuru yihuse kandi kugihe kuri Facebook no kuri twitter
 
Dennis Ns./Bwiza.com

Izindi wakunda

Bwiza.com
error: Alert: Ntabwo byemewe!!