bwiza.com
Ahabanza » Rwamagana: Ubuyobozi bwa SACCO/Kigabiro buravugwaho kuyihombya, uburangare no kwimana amakuru
Amakuru mashya Ubukungu

Rwamagana: Ubuyobozi bwa SACCO/Kigabiro buravugwaho kuyihombya, uburangare no kwimana amakuru

Koperative ebyiri zo mu murenge wa Kigabiro mu karere ka Rwamagana zahawe inguzanyo na BDF za miliyoni 10 yo kugura ibikoresho by’ikoranabuhanga, byaraguzwe ariko ntibikoreshwa, ubuyobozi bwa SACCO Imboni/Kigabiro bugashinjwa kubigiramo uburangare .
Ubuyobozi bw’iyi SACCO ntibushaka ko aya makuru y’ibihombo n’uburangare bwagize asohoka ngo ajye mu binyamakuru, mu gihe abagenerwabikorwa bashimangira ko ari bwo bwabahombeje.
Koperative y’urubyiruko yitwa ‘CITSEC’ yaguriwe ibikoresho n’ubuyobozi bw’iyi SACCO ya Kigabiro ku nguzanyo ya BDF, ibibashyikiriza ku wa 13 Ukuboza 2016, bari bafitanye amasezerano yo kuzishyura 50%, ayandi 50% akazishyurwa na BDF nk’inkunga ibateye, nyuma SACCO ibabwira ko bazishyura 80%, BDF ikazabafashaho 20%, aha niho ikibazo cyahereye.
Iyi sacco nyuma yaje gusanga yarakoze amasezerano nabi, ku bw’uburangare bw’ubuyobozi bwayo, uku kwivuguruza ku bikubiye mu masezerano, byatumye ya koperative y’urubyiruko ibyivumburira bamwe banahita bayisezeramo, ihomba ityo kuko n’abasigaye batarenze 4 babonaga batabasha kwishyura.
Uru rubyiruko rwari rwaraguriwe mudasombwa n’ibindi bikoresho byo muri Cyber Café, nyuma yo kubona ko SACCO ibahinduriyeho amasezerano baratangiye akazi, barahombye ndetse banabura ubwishyu bw’ubukode, nyiri inzu yafungiranye ibyo bikoresho.
[xyz-ihs snippet=”google-pub”]
Uwari umuyobozi wa koperative CITSEC, yemera ko yari muri komite ndetse ko yari perezida wayo, agashimangira ko iby’ihomba rya koperative yabo byabazwa ushinzwe gutanga inguzanyo muri SACCO.
Agira ati “njye ntabwo nkiri umunyamuryango, ntabwo natanga amakuru kuko ntakiri umunyamuryango, ibisobanuro mwabihabwa na Agent de credit, namwandikiye mubwira ko nsezeye muri komite kandi ko ntazabazwa biriya bikoresho, hari n’abandi numvise ko basezeye, nta yandi makuru mfite”.
Ubuyobozi bwa Sacco nibwo butungwa agatoki:
Ubwo Sacco yari imaze kubona ko yakoze amakosa mu masezerano yagiranye na CITSEC, ndetse ikayabahinduriraho kandi inguzanyo yaratanzwe, indi koperative nayo y’urubyiruko yitwa SEMTIC, yanze gufata ibikoresho Sacco yari yayiguriye, ngo nayo itazagwa mu gihombo, ibyo bikoresho nabyo byaheze mu bubiko.
Bamwe mu bari abanyamuryango ba SEMTIC bavuga ko bafashe icyemezo cyo kuyivamo bitewe n’ubwumvikane buke bwari buyirimo, binarangira badafashe ibyo bikoresho, bagashinja Sacco kuba nyirabayazana, ko yahinduye amasezerano, ibyo bari bazi basanga atari byo bizakurikizwa mu kwishyura.
Bavuga ko bahawe inguzanyo ya miliyoni 5, bagomba kwishyura 2,500,000 (50%) andi akaba inkunga ya BDF, nyuma babwirwa na Sacco ko bagomba kwishyura 80% BDF ikabunganira 20%, ibi ni nako byagenze kuri bagenzi babo [CITSEC], aba bakibibona ko amasezerano yahinduwe, nibwo banze gufata ibikoresho yari yabaguriye.
Umwe mu bavuga ko yasezeye muri koperative (SEMTIC), agira ati “ibikoresho byamaze amezi 7 mu bubiko, kugeza ubu byavanwe kuri SACCO bibitswa muri Papeterie, SACCO yasabwaga ibisobanuro na bamwe mu bagize komite nyobozi, ikabazwa impamvu ibyo bikoresho bitatanzwe, ihitamo kubihavana ijya kubibitsa, mbese ni nko kubihisha”.
Ubuyobozi bwa sacco bwagaragaje uburangare
Umukozi wa BDF mu karere ka Rwamagana, Uwera Peace, mu kiganiro yagiranye na Bwiza.com, avuga ko SACCO yirengagije inshingano zayo zo gukurikirana abo yahaye inguzanyo.
Agira ati “ubusanzwe dufitanye amasezerano na Sacco 6 muri Rwamagana harimo n’ iyi ya Kigabiro, ikibazo cy’abahawe ibikoresho twakimenye ari uko igihe cyo kwishyura cyageze, ariko twabibwiwe na bamwe mu bari muri kopererative, nibwo twabajije SACCO dusanga itarakurukiranye abo yahaye ibikoresho, inguzanyo tuyiha Sacco ku nyungu ya 11% nayo ikayishyuza ku nyungu ya 15%”.
Akomeza agira ati “SACCO niyo igenzura imishinga ndetse ikandikira BDF ibasabira ibikoresho tukabaha amafaranga bakabigura bakabibaha, SACCO niyo igomba gukurikirana uburyo inguzanyo izishyurwa ariko bariya ntibigeze babakurikira”.
Ubuyobozi bwa SACCO burimana amakuru:
Ushinzwe inguzanyo, Habimana Innocent, ni we uvugwaho kudakurikirana imikorere y’amakoperative yahawe ibikoresho, avuga ko ibijyanye n’icyo kibazo byabazwa ubuyobozi bwa Sacco.
Perezida wayo , Sebisaho Hawamu, ubwo yahamagarwaga n’umunyamakuru wa Bwiza.com, akimara kumva ko ari umunyamakuru, yahise amubwira ati “niba ari amakuru ushaka yo muri sacco ntayo nguha, nta makuru hano muri Sacco dufite [ahita akupa telefoni]”.
[xyz-ihs snippet=”google-pub”]
Ubuyobozi bw’akarere ka Rwamagana buvuga ko hari ikipe bwashyizeho irimo gukurikirana iki kibazo, bukanagaya ubwa SACCO bwima amakuru abanyamakuru, mu gihe babifitiye uburenganzira.
Visi meya ushinzwe ubukungu n’iterambere, Mudaheranwa Regis, agira ati “hari ikipe twashyizeho yo kubikurikirana, ayo mafaranga ni amadeni, ntekereza ko SACCO iri mu bantu bakwiriye kumva ko ari ayabo, barebe niba ibyo bikoresho byahabwa abandi cyangwa binatezwe aho kugirango ideni rikomeze kwiyongera batazanaryishyura, tuzareba niba ari ibibazo by’imiyoborere cyangwa imikorere”.
Akomeza agira ati “icyo kudatanga amakuru, njye navuga ko ari ubujiji, ndakeka ko nta kindi yaba yishingikirije gituma yanga gutanga amakuru, na Perezida wa Repubulika abanyamakuru baramubaza akabasubiza, ubwo we sinzi icyo yishinja cyangwa yishingikirije”.
Nk’uko biteganywa n’amategekoshingiro ya Koperative mu ngingo yayo ya 30, ivuga ko koperative igomba kuba ifite komite nyobozi y’abantu 5 na komite ngenzuzi igizwe n’abantu 3, bivuga ko izo koperative nta n’imwe ifite nibura abanyamuryango batuma igira ubuyobozi, bivuze ko hakurikijwe amategeko, nta nimwe yakabaye ikitwa koperative
Kanda hano ujye ubona amakuru yihuse kandi kugihe kuri Facebook no kuri twitter
Ngabonziza Justin/Bwiza.com

Izindi wakunda

1 Igitekerezo

Imicungire mibi ya za SACCO iratanga isomo kuri RCA na BNR - bwiza.com 03/06/2019 10:46 am at 10:46 am

[…] Ubuyobozi bwa SACCO/Kigabiro mu karere ka Rwamagana buvugwaho kuyihombya, uburangare no kwimana amak… […]

Subiza

Tanga Igitekerezo

Bwiza.com
error: Alert: Ntabwo byemewe!!