bwiza.com
Ahabanza » Umwaka Perezida Kagame agiye kumara ayoboye UA, yitezweho kurangiza ikibazo cya FDLR
Amakuru mashya Politiki

Umwaka Perezida Kagame agiye kumara ayoboye UA, yitezweho kurangiza ikibazo cya FDLR

Ikigo cy’ubushakashatsi giharanira Amahoro, Demokarasi n’Uburenganzira bw’Ikiremwamuntu (CEPADHO), cyizeye ko umwaka Perezida Kagame agiye kumara ayoboye umuryango wa Afurika Yunze Ubumwe, uzajya gushira n’ibikorwa by’iterabwoba bikorwa n’inyeshyamba za FDLR birangiye.
Iki kigo cyatangaje ibi mu itangazo cyasohoye ku wa Mbere tariki ya 29 Mutarama 2018, i Beni muri Kivu y’Amajyaruguru, kigendeye ku bunararibonye kivuga ko kizi kuri Perezida Kagame, mu kubungabunga umutekano, bityo kikabona ko ibikorwa by’iterabwoba bikorwa na FDLR ndetse n’inyeshyamba za ADF Nalu zikomoka muri Uganda, azabikemura.
Nk’uko bitangazwa n’ikinyamakuru Actualite.cd, CEPADHO itangaza ko mbere na mbere yishimiye cyane kuba Perezida Kagame yahawe inshingano zo kuyobora UA, asanzwe azwiho ubunararibonye mu byo kubungabunga umutekano.
Bati ” CEPADHO yishimiye ko UA igiye kuyoborwa na  Perezida w’u Rwanda, Paul Kagame nk’umuturanyi wa RD Congo, umugabo usanzwe azwiho kugira uruhare mu ibungwabungwa ry’umutekano mu karere.
Twizeye ko kuba Kagame ayoboye uyu muryango, ikibazo cy’iterabwoba cy’inyeshyamba za FDLR na ADF, umuryango wa Afurika yunze ubumwe uzakigira icyawo, kuko ibikorwa byazo bihungabanya amahoro n’umutekano by’umugabane”.
Muri iri tangazo kandi, CEPADHO isaba ko ingabo zoherezwa na Loni kubungabunga amahoro n’umutekano (casques bleus) mu bihugu bya Afurika, zakagombye kuzajya ziba zikomoka kuri uyu mugabane, aho kuzana izindi zikomoka mu bindi bihugu byo ku yindi migabane.
 

Kanda hano wiyandikishe ( Subscribe) ubona ibiganiro, indirimbo kandi bishya mu mashusho
Kanda hano ujye ubona amakuru yihuse kandi kugihe kuri Facebook no kuri twitter
 

Izindi wakunda

Bwiza.com
error: Alert: Ntabwo byemewe!!