bwiza.com
Ahabanza » Bamwe mu basirikare n’abanyapolitiki bazwiho amagambo n’ibikorwa byo gutega iminsi Perezida Nkurunziza
Amakuru mashya Politiki

Bamwe mu basirikare n’abanyapolitiki bazwiho amagambo n’ibikorwa byo gutega iminsi Perezida Nkurunziza

Kuva mu mwaka wa 2015, nibwo bamwe mu banyapolitiki n’abandi bo mu nzego z’umutekano batangiye gutinyuka, bagaragaza ibitekerezo byabo basaba Perezida Nkurunziza kurekura ubutegetsi, byabaviriyemo kwitwa abanzi b’igihugu bamwe barahunga abandi barafungwa.
Bamwe muri aba banyapolitiki aho bari mu buhunzi, bagiye batangaza byinshi byo gutega Nkurunziza iminsi, bakangurira Abarundi bagenzi babo guhaguruka bakamurwanya, kimwe n’uko hari abagiye babigaragaza mu bikorwa, aho ku wa 13 Gicurasi 2015, bayobowe na Gen Niyombare bagerageje kumuhirika ku butegetsi bikabananira.
1.Gén. Philbert Habarugira: Ubwo yatangazaga ko aho bahungiye na bagenzi be bategura urugamba rwo kuvana ku butegetsi Perezida Nkurunziza, nibwo yatangaje ko uko byagenda ko umubare w’abasirikare bahunze uhagije ngo bongere bategure umugambi wo kumuvanaho bakoresheje uburyo ubwo ari bwo bwose.

Gén. Philbert Habarugira

Yagize ati “Abasirikare b’u Burundi bari mu bunzi ni benshi, turi abajenerali 12 b’igisirikare cya Leta na polisisi, si abajenerali gusa, hari ba koloneli, majoro, kapiteni n’abandi basirikare bari kumwe natwe bashaka gukomeza igikorwa nk’icyo twakoze ku wa 13 Gicurasi (2015)”.
Yakomeje agira ati “Igikurikiyeho ni uko tugiye gutegura uburyo bushoboka bwose bwo kwirwanaho kugira ngo twumvishe Pierre Nkurunziza ko agomba kurekura ubutegetsi, kandi ibi tuzabikora ku ngufu dushyiraho umutwe wa gisirikare, turi abajenerali 12 b’igisirikare cya Leta na polisi, ikindi kandi dufite minisitiri w’ingabo uturi inyuma, twizeye intsinzi”.
2.Brig. Gen.Jean Marie Ndayambaje: Mu kiganiro yagiranye na NTV, Televiziyo yo muri Kenya, uyu musirikare ubwo yashimangiraga ko inyeshyamba za FDLR zinjijwe mu Burundi kurinda no kugumisha ku butegetsi Perezida Nkurunziza, nibwo yatangaje ko mu gihe Nkurunziza azaba atarazirukana (FDLR) nk’Abarundi bazashaka uburyo birwanaho.

Yagize ati “Abaturage b’u Burundi bafite ubwoba kubera Perezida Nkurunziza, Nkurunziza dushobora kumuha umwaka umwe w’inzibacyuho [yabivugaga mu 2015], visi Perezida akaba aturuka mu rindi shyaka na Minisitiri w’Intebe,… Interahamwe-FDLR ntabwo zituruka mu Barundi, Interahamwe zaje gutera ingabo mu bitugu Nkurunziza”.
Mu gihe ashimangira ko Leta ya Nkurunziza yinjije mu gihugu abarwanyi ba FDLR ngo bayirwanirire, yashimangiraga ko mu gihe abo barwanyi batazirukanwa, hari ikizakorwa.
Ati “Twiteguye kurwanya Interahamwe zikajya mu kindi gihugu kuko Interahamwe ni abicanyi, abaturage b’u Burundi twiteguye kurwanya Interahamwe, mu gihe Nkurunziza atemera kwirukana cyangwa ngo ahagarike Interahamwe akoresheje imbaraga afite ubu (2015), Abarundi tuzashaka ubundi buryo dukoresha, birumvikana, uburyo tuzakoresha ni ibanga ryacu”.
3.Domitille Kiramvu: Ni umunyamakuru uzwi cyane mu Burundi, yakoreye radiyo na Televiziyo by’u Burundi, na radiyo RPA, uyu mugore yagiye akoresha imvugo isa nkaho ituka umukuru w’igihugu, Petero Nkurunziza, aho yagize ati “Nkurunziza yakoze sakirirego, ni umumenji kandi yiyita umukozi w’Imana”.
Kiramvu Domitille

Yagize ati “Nta kindi cyakorwa uretse gukuraho Nkurunziza, hari abibwira ko ibiganiro bizamukuraho, aho baribeshya, ibiganiro bashobora kubyitaba kuko batorohewe n’amahanga ubundi babitinze bizamare imyaka mirongo, iyi manda nirangira yiyongeze n’izindi,…
Uyu mugore yashimangiye ko mu gihe umuhungu wa Nkurunziza arimo kuminuza mu bya gisirikare, hatagize igikorwa ngo se ave ku buyobozi, ko yazabusaziraho akazabusigira uwo muhungu.
4.Gen Niyombare Godefroid: Uyu mujenerali ibyo kurwanya Perezida Nkurunziza afatanyije n’abandi basirikare n’abapolisi babigaragaje ku wa 13 Gicurasi 2015, ubwo bageragezaga kumuhirika ku buyobozi bikabananira.

Nyuma yaho ananiriwe gukora kudeta, yarahunze, mu binyamakuru hagasohoka inkuru avuga ko arimo gutegura urugamba rugamije kuzakura ku butegetsi Nkurunziza, ndetse ko aho bari batarimo kurera amaboko.
Abandi basirikare bakomeye bahunze u Burundi, baha amahirwe uyu mugabo Niyombare ko igihe cyose bazaba bagabye ibitero, ari we wabajya imbere abayoboye, ko afite ubuhanga bwo guhuza ibitekerezo bya benshi.
5.Hussein Radjab: Uyu munyapolitiki izina rye mu Burundi abenshi bararizi, iyo avuzwe benshi bamwibuka ari umuyobozi w’ishyaka rya CNDD FDD, nyuma akaza kwitandukanya na Leta y’u  Burundi.
Uyu munyapolitiki mu mwaka wa 2007 ubwo yavaga ku buyobozi bwa CNDD-FDD yahise afungwa ashinjwa gushinga umutwe w’inyeshyamba ndetse no gutuka umukuru w’igihugu, Petero Nkurunziza ngo amugereranya n’icupa ririmo ubusa “empty bottle”. Mu 2015 yaje gutoroka gereza ya Mpimba yari afungiyemo.
Hussein Radjab wahoze ari umuyobozi wa CNDD FDD

Kugeza magingo aya Radjabu ntahishura aho yahungiye, gusa na we akaba umwe mu batavuga rumwe na Nkurunziza, umuntu yavuga ko bamutega iminsi, kuko uyu we bahoze ari nshuti cyane bakiri no mu ishyamba. Ashyirwa ku rutonde rw’ababa bategura uburyo yazakurwa ku butegetsi.
Perezida Nkurunziza yagiye ku buyobozi mu 2005, mu mwaka wa 2015 ubwo manda ebyiri zari zirangiye nibwo imvururu z’abaturage zavutse asabwa kuva ku butegetsi, ko manda zagenwe zari zirangiye, Nkurunziza yiyamamarije manda ya gatatu atsinda amatora, manda ikaba igomba kurangira mu 2020.

Kanda hano ujye ubona amakuru yihuse kandi kugihe kuri Facebook no kuri twitter
Itangishatse Théoneste/Bwiza.com
 

Izindi wakunda

Bwiza.com
error: Alert: Ntabwo byemewe!!