bwiza.com
Ahabanza » Neymar yateye utwatsi iby’amakuru avuga ko Real Madrid igiye kumugura Miliyoni 400 z’Amayero
Imikino

Neymar yateye utwatsi iby’amakuru avuga ko Real Madrid igiye kumugura Miliyoni 400 z’Amayero

Neymar, umusore w’imyaka 25 y’amavuko ukomoka muri Brezil, ubu akaba akinira ikipe ya Paris Saint- Germain (PSG) yo mu Bufaransa, yanyomoje amakuru yavugaga ko yaba ari mu nzira zo kugaruka muri Espagne.
Ibihuha byatangajwe, byagaragazaga uburyo Neymar azagurwa na Real Madrid miliyoni 400 z’Amayero, akongera gusubiza muri Espgane mu gihe yari amaze igihe gito ahavuye ubwo ikipe ya FC Barcelona yamugurishaga miliyoni zisaga 200 z’amayero na PSG.
Anyomoza aya makuru, yagize ati “Ndatuje kandi nishimiye bagenzi banjye dukinana ndetse n’uburyo nkinamo nkanatsindamo ibitego”.
Akomeza avuga ko ari mu ikipe ya PSG yo mu Bufaransa ku bw’impamvu, ati “Naje hano ku bw’impamvu yo gukora amateka, ndetse no kugaragaza ubuhangange bwanjye, ibihuha hano byo ntibiteze kuzashira,…
Ndishimye, kandi meze neza, abakinnyi beza buri gihe amakuru y’ibihuha abavugwaho ntajya abura, ntabwo ndi njyenyine kuri ibyo, ariko mu gihe bibaye ari njye bavugaho, ni iki nabikoraho?.
Neymar yaguzwe miliyoni 222 z’amayero, ava muri FC Barcelona yerekeza muri PSG, yaciye agahigo kari gafitwe na Paul Pogba waguzwe miliyoni 89 z’ama-pound ubwo yavaga muri Juventus yo mu Butaliyani yerekeza muri Manchester yo mu Bwongereza.


Kanda hano ujye ubona amakuru yihuse kandi kugihe kuri Facebook no kuri twitter
I.Theoneste/Bwiza.com

Izindi wakunda

Bwiza.com