bwiza.com
Amakuru Ubukungu

I Burasirazuba: Abahinze ibigori bakabiburira isoko, barataka inzara

Abahinzi b’ibigori mu Ntara y’i Burasirazuba barinubira kubura isoko  ry’umusaruro w’ibigori bejeje, binubira ibiciro bagurirwaho n’abamamyi babahenda ndetse no kubihunika bikaba bitoroshye kubera kubura ibikoresho bya ngombwa.

Abahinzi basanga bakwiye gufashwa bakagurizwa amafaranga mu gihe bategereje ko igiciro cy’ibigori kizamuka ndetse bavuga ko badafashijwe kubona ibikoresho byifashishwa bahunika ibigori bejeje, bishobora kwangirika bikabatera igihombo.

Aba baturage ni abo mu mirenge ya Nasho na Mushikiri mu Karere ka Kirehe, mu kiganiro bagiranye na Bwiza.com, bagaragaza impungenge bafite.

Jean Baptiste Kamali, umuturage utuye mu murenge wa Mushikiri, avuga ko bafite ikibazo cyo kubura isoko ry’umusaruro wabo ku buryo bishobora no kwangirika kubera kubura ibikoresho bifashisha bahunika.

Agira ati  “twahinze ibigori tubona umusaruro ariko turabona ibigori twejeje bishobora kudupfira ubusa kuko koperative yari yatwijeje kutugurira umusaruro wacu ku mafaranga 210 ku kilo  ariko ntibatugurira ibigori ahubwo batubwira ko bazatuguriza amafaranga kugirango dutegereze igiciro kizamuke, n’ubwo batwemereye kutuguriza ntibabikoze, byatumye bamwe babigurisha ku bamamyi babahenda batinya ko byakwangirika, dufite ubukene twatewe no kubura isoko kandi kubigurisha ku mafaranga 150 ku kilo bizadutera igihombo gikomeye”.

Abahinzi bo mu turere twa Rwamagana, Gatsibo na Ngoma nabo bavuga babuze isoko ry’umusaruro w’ibigori, bavuga ko inganda zitunganya ibigori zitakigura ibyabo, ahubwo zikarenga zikagura ibivuye mu gihugu cya Uganda.

Sibomana Emmanuel, ni umuturage wo mu karere ka Rwamagana, agira ati “twabonye umusaruro uhagije kuko twabonye imvura ihagije ariko uwo musaruro twabuze abatugurira kuko hari abacuruzi bazaga kutugurira ibigori ku isoko rya Ruhunda ariko ku wa Gatanu twabuze n’Uwatugurira tubisubiza mu rugo.

Akomeza agira ati “Igiciro cy’ibigori ubu  kiri hasi cyane , twibaza uburyo tugura kawunga ku mafaranga 600 nyamara umuhinzi bamugurira ku mafaranga 150 , natwe ntabwo twumva igituma baduhenda nyamara igiciro cya Kawunga kidahinduka , ubuyobozi nibudufashe bushyirereho igiciro cyarengera abahinzi kuko turarengana cyane”.

Abahinzi barasabwa na RAB gufata neza umusaruro wabo kugirango bazabashe kugurisha ibigori ku giciro cyiza nk’uko bivugwa na Sendege Norbert, uyobora RAB mu Ntara y’i Burasirazuba.

Agira ati “Abahinzi babonye umusaruro uhagije, hanafashwe ingamba ku buryo bagurirwa ku giciro cyiza , hari kampani zigera kuri 4 zigomba kugurira abo bahinzi ku buryo hashyizweho n’igiciro cy’amafaranga 210 ku kilo ,ubwo abagurisha munsi y’icyo giciro nabagurisha n’abamamyi, twabagira inama yo gufata neza ibigori kuko iyo bitameze neza  ntibigurwa kuko nk’ibyanyagiwe ntabashobora kubigura, abahinzi ntibakwiye kugira impungenge kuko abashaka kugurisha baragurirwa ndetse n’abashaka guhunika hari imifuka yabugenewe umwe ugura 1500 gusa”.

Umwe mu bamamyi utarashatse ko amazina ye atangazwa avuga ko igiciro gishyirwaho n’inganda zitunganya Kawunga nabo babishyira, ko begera abaturage bakabagurira ku giciro bumvikanyeho.

Agira ati “igiciro gishirwaho n’inganda dushyira ibigori, iyo batubwiye igiciro bazaduheraho natwe tugena icyo kuguriraho ntabwo aritwe dushyiraho ibiciro kandi ibiciro birahindagurika bitewe n’ibigori , ubu ntabwo bakidutuma ibigori byinshi nka mbere, ntabwo twagura ibigori tudafite aho tubijyana.

Akomeza avuga ko ibigori bituruka muri Uganda, aribyo bituma iby’abatuye mu Burasirazuba bibura isoko.

Kanda Subscribe kuri Bwiza TV ujye ubona videwo zigezweho z’ubuzima,imikino,imyidagaduro…

Izindi wakunda

Bwiza.com
error: Alert: Ntabwo byemewe!!