bwiza.com
Amakuru Politiki

Gereza ya Rusizi yari igenewe gufungirwamo abagororwa 2600 irimo 3.248

Abafungiye muri gereza ya Rusizi iherereye mu Ntara y’i Burengerazuba, bavuga ko babangamiwe n’ubucukike buyirimo, aho ubu abasaga 600 barenga ku mibare yagenwe.
Ubwo Minisitiri w’ubutabera, Busingye Johnston yasuraga gereza ya Rusizi mu cyumweru gishize, nibwo ubuyobozi bw’iyi gereza n’abayifungiyemo, bamutangarije iki kibazo bavuga ko kibabangamiye.
Ubuyobozi bw’iyi gereza bwemeza ko ubucukike buhari, ko iyi gereza yari ifite ubushobozi bwo kwakira abagororwa 2600, ubu umubare ukaba ukomeje kwiyongera.
Umuyobozi wa gereza ya Rusizi Senior Supt. Gérard Habimana avuga ko ubu ahagenewe kuryama abagororwa babiri haryama batatu, gusa igisubizo ngo kikaba kizaboneka ubwo gereza ya Mageragere izaba yuzuye.
Kubera ko hari abagororwa bari barakuwe muri gereza za Kimironko na Nyamagabe bakoherezwayo, ngo bafite icyizere ko iya Mageragere niyuzura abavuye i Kimironko bazayoherezwamo, naho aba Nyamagabe bakazajyanwa i Huye.

Min. Johnston Busingye, we avuga ko igikenewe atari ukubaka amagereza menshi cyangwa kuyaguura, ahubwo arasaba abagororwa kugororoka kugira ngo batazasubira gukora ibinyuranya n’amategeko.
Ati “Amagereza si amashuri, si amavuriro, si amazi, aho gufata amafaranga menshi ukayubakamo amagereza wakubakamo ibindi bifitiye abanyarwanda akamaro”.
Gereza ya Rusizi ifite ubushobozi bwo kwakira abagororwa 2600, yari isanzwe ifungiyemo 2648, aho iya Kimironko na Nyamagabe zimuriwe, hiyongereyeho 600. Ubu iyi gereza ifungiyemo 3.248 .
Kanda kuri SUBSCRIBE ujye ubona ibiganiro n’indirimbo bishya

Izindi wakunda

Bwiza.com