bwiza.com
Amakuru mashya Politiki

Amajyaruguru: Abacuruzi barasabwa kuzirikana igihango bafitanye na Perezida wa FPR/Inkotanyi

Abacuruzi bo mu Ntara y’Amajyaruguru, barasabwa gufasha mu iterambere ry’intara, banazirikana ko ifite amateka akomeye yo gutangiriramo urugamba rwo kubohora igihugu, by’umwihariko  banazirikana igihango bafitanye na Perezida w’umuryango FPR-Inkotanyi.
Mu mwihorero wahuje abanyamuryango ba FPR/Inkotanyi b’abacuruzi mu Ntara y’Amajyaruguru, ku wa Gatandatu tariki ya 17 Werurwe 2018, Guverineri Gatabazi JMV, akaba na Perezida w’umuryango FPR/Inkotanyi ku rwego rw’Intara, yabasabye guhindura imyumvire y’aho bakorera  ndetse bagakora uko bashoboye bagafasha mu iterambere ry’Intara, nk’ifite  amateka yo kubohora igihugu.
Guverineri yabibukije ijambo Perezida Paul Kagame yababwiye ubwo yiyamamazaga muri Nyakanga 2017 [ati ‘mbafitiye ideni’], ariheraho abasaba gukomeza kuzirikana igihango bafitanye na we, birinda kumukoza isoni.
Agira ati “Intara yacu ni intara yatangiriyemo urugamba rwo kubohora igihugu, ifitanye amateka n’umuryango, umuntu wese yari akwiye kuyigeramo akabona itandukaniro n’izindi, iterambere  n’ibindi, kandi murabizi ko na Chairman w’umuryango ubwo yiyamazaga yivugiye ko adufitiye ideni, dufitanye igihango na we , mureke ntibibe gutekereza  gusa ahubwo bibe ibikorwa Kandi biganisha ku iterambere”.
Guverineri Gatabazi yakomeje abwira aba bacuruzi ko bakwiye kujya baririmba indirimbo y’umuryango batabyina ngo banakome mu mashyi gusa, ahubwo bajye bumva ibyo ivuga, ko ivuga porogaramu z’umuryango, ibikorwa ,… ndetse ko ariyo yarikwiye kuba ibaranga.
Muri uyu mwiherero w’abacuruzi n’abafite inganda bakomoka muri iyi Ntara n’uturere 5 tuyigize, Guverineri Gatabazi, awutangiza yanaboneyeho  kubabwira ko bagomba gukoresha amahirwe bafite bakayabyaza umusaruro mu guteza imbere no  kubaka igihugu cyabo.
Ati”mukwiye gufasha guhindura imyumvire yaho mukorera, izi gahunda z’isuku n’amavunja, guca magendo ni mwe mukwiye gufata iya mbere mu kuzigisha no kuzishyira mu bikorwa aho mukorera.
Arakomeza ababwira ko mu gihe badafashe ingamba, bizajya bikomeza kubagiraho ingaruka, ati “Iyo umuntu aje akajya ku iduka ryawe, umwanda usigara aho, kuki udakwiye gufata ingamba? Abacuruza magendo babikura hakurya mu bindi bihugu, kuki murebera kandi ari mwe bihombya?  Uwo ubizana ntasora , ubwo muzacuruzanya bishoboke? we azabitanga kuri make, bivuze ko wowe uzacuruza ibye byashize, mureke dufatanye Kuko inyungu ni izacu ubwacu”.
Ni umwiherero w’umunsi umwe witabiriwe n’abacuruzi bavuka muri iyi ntara y’Amajyaruguru n’abandi bayikoreramo.

Kanda kuri SUBSCRIBE ujye ubona ibiganiro n’indirimbo bishya


 

Izindi wakunda

Bwiza.com