bwiza.com
Amakuru Politiki

U Rwanda rurateganya kurushaho gushora imari mu gukora imihanda

U Rwanda rurateganya kurushaho gushora imari mu guteza imbere ibikorwaremezo by’ubwikorezi by’igihugu mu rwego rwo kuziba icyuho kikigaragara ku mihanda no kurushaho kuzamura ubukungu nk’uko byatangajwe kuri uyu wa kane, ubwo hatangizwaga inama yigagaga ku koroshya urujya n’uruza rw’abantu mu mijyi (National Urban Mobility Forum).
Umunyamabanga wa Leta muri minisiteri y’ibikorwaremezo, Jean de Dieu Uwihanganye, akaba yatangaje ko hagiye kwibandwa ku kurushaho gushora imari mu bikorwaremezo by’ubwikorezi mu mihanda mu gihugu hose, ashimangira ko ubwikorezi imbere mu gihugu no hanze ari ingenzi mu kuzamura ubukungu.
Nubwo hari ibigaragara byakozwe mu gutunganya imihanda yo muri Kigali n’indi mihanda ihuza ibice bitandukanye by’igihugu, haracyari akazi kenshi ko gukorwa mu kuziba icyuho kikigaragara nk’uko minisitiri Uwihanganye yakomeje avuga.
Iyi nama y’iminsi 2 yatangiye kuri uyu wa 19 Mata ikaza gusozwa kuri uyu wa Gatanu, itariki 20, yateguwe ku bufatanye bwa Guverinoma y’u Rwanda na gahunda y’ubufatanye mpuzamahanga igamije kubaka ubushobozi no guteza imbere urwego rw’ubwikorezi muri Afurika (Africa Transport Policy Programme).

Yahuriyemo abafata ibyemezo, abatekinisiye bo mu gihugu no hanze yacyo n’abakora mu bijyanye no gutwara abantu n’ibintu mu rwego rwo kwigira hamwe imbogamizi zigihari nk’umubyigano, igihe kirekire cy’urugendo, impanuka ziyongera, ndetse n’ikijyanye n’imyuka ihumanya ikirere.
Kugeza ubu imihanda y’u Rwanda ikoze neza ishobora gukoreshwa iracyari ku rugero rwa 71,4% nk’uko imibare iheruka ya minisiteri y’ibikorwaremezo ibigaragaza.
Kanda kuri SUBSCRIBE ujye ubona ibiganiro n’indirimbo bishya

Izindi wakunda

Bwiza.com