bwiza.com
Ahabanza » Musanze: Minisitiri Kaboneka yasabye abaturage gufatanya n'ingabo mu bikorwa byazo mu iterambere ryabo
Amakuru Politiki

Musanze: Minisitiri Kaboneka yasabye abaturage gufatanya n'ingabo mu bikorwa byazo mu iterambere ryabo

Kuri uyu wa 20 Mata 2018, mu Karere ka Musanze Umurenge wa Musanze, Akagari ka Garuka hatangirijwe ku rwego rw’Igihugu gahunda y’ibikorwa by’Ingabo z’Igihugu mu Iterambere ry’Abaturage, byari bisanzwe bizwi ku izina rya “Army Week”.
Iki gikorwa kibanze k’ukubakira abaturage amazu yo kubamo, cyatangijwe  ku mugaragaro na Minisitiri w’Ubutegetsi bw’Igihugu, Hon Francis Kaboneka ari kumwe n’Umugaba Mukuru w’Ingabo z’u Rwanda, Gen Patrick Nyamvumba, Guverineri w’Intara y’Amajyaruguru, Hon Gatabazi Jean Marie Vianney n’abandi Bayobozi batandukanye.

Mu ijambo rye, Minisitiri Kaboneka wari Umushyitsi Mukuru yasabye abaturage b’Akarere ka Musanze gufatanya n’Ingabo muri ibi bikorwa bibagenewe no kumva ko ari ibyabo, bityo bakarushaho kubifata neza no kubibungabunga. Yagize ati, “Niba Ingabo zifashe umwanya zikubakira umuturage inzu, nyuma y’umwaka ugasanga yasenyutse cyangwa se yayikuyeho ibati, urugi cyngwa se akaba atayigirira isuku, icyangiritse kidasanwa, icyo gihe aba yihemukira ataretse n’Igihugu. Ndabasaba rero gufatanya n’Ingabo muri ibi bikorwa bibagenewe no kurushaho kubifata neza no kubibungabunga”.
Minisitiri Kaboneka yasabye kandi  ko abafite ubushobozi badakwiye gutegereza gufashwa, ko ahubwo hakwiye gufashwa abakwiye gufasha koko. Ikindi Minisitiri Kaboneka yibukije abaturage ni ukwirinda amakimbirane yo mu ngo, kugira isuku, kuboneza urubyaro no gukomeza kugira uruhare mu kubungabunga umutekano.

Ku ruhande rwe, Guverineri w’Intara y’Amajyaruguru, Hon Gatabazi Jean Marie Vianney yashimiye Ingabo z’u Rwanda  ku ruhare zigira mu iterambere ry’abaturage, yijeje kandi ko ibikorwa by’Ingabo z’u Rwanda mu iterambere ry’abaturage 2018 bizazana impinduka zigaragara mu buzima bw’abaturage b’Intara y’Amajyaruguru.
Umugaba Mukuru w’Ingabo z’u Rwanda, Gen Patrick Nyamvumba yavuze ko mu gihe cy’amezi atatu hazakorwa ibikorwa bitandukanye, birimo ubuhinzi n’ubworozi, kubaka amazu n’amashuri, ubuvuzi, ibikorwaremezo n’ibindi. Yongeyeho ko ibi bikorwa byose bigamije gutanga umusaruro no guteza imbere abaturage n’Igihugu.
 

Izindi wakunda

Bwiza.com
error: Alert: Ntabwo byemewe!!