bwiza.com
Featured Kwibuka

Uru Rwanda rwagize ibyago byo kuyoborwa n’abategetsi batagira umutima wa kimuntu- Hon. Mukabalisa

Perezida w’Inteko Ishinga Amategeko/Umutwe w’Abadepite, Hon. Mukabalisa Donatille, avuga ko kuba jenoside yakorewe Abatutsi mu 1994 yarabaye, byaturutse ku kuba u Rwanda rwarategetswe n’abayobozi batagiraga umutima wa kimuntu.

Yatangaje ibi, ubwo yifatanyaga n’abaturage bo mu karere ka Nyamagabe, ku wa 21 Mata 2018, kwibuka ku nshuro ya 24 Jenoside yakorewe Abatutsi mu 1994, umuhango ukaba warabereye ku rwibutso rwa Murambi rushyinguyemo mibiri irenga ibihumbi 50 y’abazize Jenoside yakore Abatutsi 1994.

Hon. Mukabalisa avuga ko u Rwanda iyo ruza kugira abayobozi beza mbere ya 1994, jenoside itari kubaho, ati “Uru Rwanda rwagize ibyago byo kuyoborwa n’abategetsi batagira umutima wa kimuntu, baranzwe n’urwango bashishikariza abo bayoboye kwangana no kwica bagenzi babo b’Abatutsi”.

Yakomeje avuga ko ari ngombwa no kwibuka n’amateka meza yaranze abagize uruhare rwo kurokora Abatutsi bicwaga, mu gihe abateguye bagashyira mu bikorwa Jenoside bari bafite intego yo kubamara.

Ati “Ntitugomba kwibuka amateka mabi yonyine , tujye twibuka n’amateka meza yaranze abagize uruhare mu kurokora Abatutsi bicwaga muri Jenoside”.

Yasabye abaturage ba Nyamagabe gukomeza kubungabunga no kwita ku rwibutso rwa Murambi kugira ngo rukomeze kugaragaza amateka ya Jenoside yakorewe Abatutsi 1994.

Urwibutso rwa Murambi rushyinguyemo imibiri irenga 50000 y’abazize Jenoside yakore Abatutsi 1994, rukaba ari rumwe muri enye ziteganywa kuzashyirwa ku rutonde rw’Umurage w’Isi rwa UNESCO.

Urwibutso rwa jenoside rwa Murambi
Hon. Mukabalisa ashyira indabo ku mva ishyinguyemo imibiri irenga 50000 y’abazize Jenoside yakorewe Abatutsi 1994
Hon. Mukabalisa avuga ko jenoside yabaye kubera ubuyobozi bubi bwariho mbere ya 1994
Hon. Mukabalisa n’abandi bayobozi bakuru mu nzego zitandukanye batambagijwe ibice bitandukanye bigize urwibutso rwa Murambi

Kanda kuri SUBSCRIBE ujye ubona ibiganiro n’indirimbo bishya

 

Izindi wakunda

Bwiza.com