bwiza.com
Politiki TUBAMENYE

Ibintu 10 waba utaramenye kuri Gen. Bosco Ntaganda, umusirikare utarahiriwe n’urugamba

Gen. Bosco Ntaganda ni umusirikare warwanye intambara mu bihugu bitandukanye, ayobora ingabo biza kurangira ashinjwe ubwicanyi ndengakamere bwakozwe aho yayoboraga ingabo, ubu akaba afunzwe akurikiranyweho ibyaha 18.

1.Bosco Ntaganda yavukiye mu Rwanda

Ku wa 5 Ugushyingo 1972, nibwo Bosco yavukiye mu Rwanda mu Ntara y’Amajyaruguru mu Kinigi, ubu ni mu karere ka Musanze, agace k’imisozi miremire n’ibirunga, afite ubwenegihugu bwa Congo.

  1. Yatorotse ishuri ajya ku rugamba

Mu busore bwe, nibwo Ntaganda yavuye mu Rwanda ajya kuba muri Ngungu i Masisi, mu Burasirazuba bwa Repubulika Iharanira Demokarasi ya Congo, ari naho yigaga amashuri yisumbuye, yaje kuritoroka atarirangije ajya mu gisirikare cya RPF/Inkotanyi muri Uganda afite imyaka 17.

  1. Bosco Ntaganda mu gisirikare cy’Inkotanyi

Bosco Ntaganda yarwanye mu ngabo za FPR/ Inkotanyi kuva zigaba iBitero mu 1990, kugeza ubwo ubutegetsi bwa Perezida Habyarimana buvuyeho ndetse na jenoside yakorerwaga Abatutsi ihagaritswe mu 1994, yahavuye asubira muri  Congo mu mutwe w’inyeshyamba wa FPLC “Forces Patriotiques pour la libération du Congo” aba umuyobozi mukuru w’ingabo ushinzwe urugamba.

4.Bosco Ntaganda ni umusirikare ufite ipeti rya jenerali

Mu 2005 nibwo Ntaganda yambitswe ipeti rya Jenerali. 2009 yifatanyije na Gen Laurent Nkunda wari uyoboye CNDP (le Congrès national pour la défense du peuple), nabwo urugamba ntabwo rwigeze rumuhira, nyuma Ntaganda yinjiye mu mutwe wa M23 kuva mu 2012 mbere y’uko uyu mutwe ucikamo ibice, icye n’icya Gen Sultani Makenga, gusa icye kigatsindwa ari nabwo yahise afata umwanzuro wo kwifatisha.

  1. Ntaganda ashinjwa ubwicanyi ndengakamere

Ku wa 22 Kanama 2006, nibwo Bosco yashyiriweho impapuro zo kumuta muri yombi n’urukiko Mpuzamahanga Mpanabyaha rw’i La haye, ashinjwa ibyaha by’intambara n’ibyibasiye inyokomuntu, gukoresha abana bato mu ntambara, aho ngo yababwiraga ati “Iyo uri umusirikare ubona umugore w’ubuntu, buri kintu cyose kiba ari ubuntu” n’ibindi bitandukanye ashinjwa gukorera mu gace ka Ituri hagati ya 2002 na 2003.

Icyo gihe ntabwo Ntaganda yahise atabwa muri yombi, yafashwe mu 2013 nyuma yo kwishyikiriza Ambasade ya Leta Zunze Ubumwe za Amerika mu Rwanda amaze guhunga igihugu cye.

  1. Bosco Ntaganda yiswe izina rya “Terminator”

Kubera ibyaha Ntaganda yashinjwe, yaje guhimbwa akazina ka ‘The Terminator’ iri zina rizwi muri filimi ya Arnold Schwarzenegger, igaragaramo ubwicanyi bukomeye, ubwaryo urigenekereje  nk’uko risobanurwa n’umusomyi wa Bwiza.com, wanarwanye imwe mu ntambaza zabereye muri Congo,

Asobanura iri jambo Terminator agira ati “Iri jambo Terminator ubwaryo ushobora kurigenekereza uhereye kuri etmologie yaryo y’igifaransa “Terminer” rero iyi ikaba yaba inyito y’umuntu urangiza, Ruhorahoza, uhorahoza, usoza cyangwa se umuntu ufata umwanzuro wa nyuma,…uyu mugabo yari dangerous”.

  1. Yiswe umuntu mubi abatizwa amazina menshi

Kubera ibikorwa bibi yashinjwe yiswe amazina menshi, Bosco Ntagenda, Bosco Baganda, Bosco Taganda, The Terminator, Jean Bosco Ntaganda, … aya mazina akaba anagaragara kuri wekipedia, bamusobanura nk’umusirikare wari mubi cyane.

Ntaganda ukurikiranyweho ibyaha 18 by’intambara . Stéphane Bourgon, umwunganira mu mategeko, umwaka ushize nibwo yavuze ko bidakwiye ko uwo yunganira yangiririzwa isura agereranywa n’abantu babi cyane.

8.Bosco Ntaganda yashatse kwiyicisha inzara

Muri Nzeri 2016, nibwo Ntaganda yashatse kwiyicisha inzara mu buryo bwo kwigaragambya yinubira uburyo afunzwemo muri gereza y’uru rukiko rwa CPI.

Mu magambo ye, Ntaganda yagize ati “ Ntabwo ngishobora kubona umugore wanjye n’abana banjye nkuko byari bisanzwe. Iyi niyo mpamvu natakaje icyizere cyose. Niyo mpamvu njye niteguye no gupfa”.

9.Ntaganda ntiyemera ibyo ashinjwa, urubanza rwe ruragoye

Ntaganda ashinjwa ibyaha 18, iby’ntambara ni 13  n’ibindi bitanu byibasiye inyokomuntu bishingiye ahanini ku bitero bibiri we n’abasirikare be bagabye ku baturage mu duce twa Ituri muri Repubulika Iharanira Demokarasi ya Congo. .

Ubwo yagezwaga imbere y’uru rukiko bwa mbere, Gen. Bosco Ntaganda mu magambo make yahakanye yivuye inyuma ibyaha byose ashinjwa. Umushinjacyaha mukuru w’uru rukiko(CPI)  yatangaje ko uru rubanza rugoye cyane ugereranyije n’izindi zose zabaciye imbere.

10.Bosco Ntaganda ntabwo yahiriwe n’urugamba

Ubundi mu byiciro bitandukanye usanga abantu bamwe bitwa ‘impirimbanyi’ akarwana intambara ya politiki, iy’amasasu,… kugirango ikitagenda kigerweho, icyo gihe iyo kigezweho yitwa intwari, kuri Ntaganda uwavuga ko atahiriwe ntabwo yaba agiye kure y’ukuri cyane, kuko igihe cyose yazahamwa n’ibi byaha ubuzima bwe bwazarangirira muri gereza.

Gen Bosco Ntaganda ashinjwa ibyaha 18

Kanda kuri SUBSCRIBE ujye ubona ibiganiro n’indirimbo bishya

Izindi wakunda

Bwiza.com