bwiza.com
Ahabanza » Muhanga: Urubyiruko rurasabwa kwigira ku ngabo za FPR/Inkotanyi zahagaritse jenoside yakorewe Abatutsi
Amakuru

Muhanga: Urubyiruko rurasabwa kwigira ku ngabo za FPR/Inkotanyi zahagaritse jenoside yakorewe Abatutsi

Ubwo hibukwaga urubyiruko rwazize jenoside yakorewe Abatutsi mu 1994 , urubyiruko rwiganjemo urwo mu bigo by’amashuri yisumbuye byo mu murenge wa Cyeza, mu karere ka Muhanga rwasabwe kwimakaza ubumwe bw’Abanyarwanda kurusha ibindi byose no kwigira Ku butwari n’ubwitange byaranze urwayihagaritse.

Unkundiye Fhilippe, umwe mu rubyiruko rwarokotse jenoside rwo mu murenge wa Cyeza, mu buhamya bwe, avuga uburyo yabuze ababyeyi n’abavandimwe, kugeza ubwo asigaye ari imfubyi adafite umuntu n’umwe bari kumwe.

Agaya urubyiruko rwijanditse mu bikorwa bya jenoside ariko akanashimira ingabo zahoze ari iza FPR /Inkotanyi, ko zashoboye kurokora ubuzima bwe, ubwo zageraga mu Mujyi wa Gitarama aho yari yarahungiye.

Yagize ati “Papa na Mama bari baramaze kubica , sogokuru na we ni uko, Nyogokuru we twari twarahunganye bamwishe turi kumwe, nyuma umubyeyi wanjye wo muri batisimu ni we wampungishije anzana i Gitarama, ndashimira cyane ingabo z’igihugu zashoboye kundokora, ubu nkaba nkiriho”.

Umuyobozi w’akarere ka Muhanga, Uwamariya Beatrice, avuga ko impamvu hashyizweho umwanya wo kwibuka urubyiruko, ari ukugira ngo urundi ruriho ubu, rwe gukurira mu macakubiri nk’ayo ababyeyi babo bakuriyemo.

Uyu muyobozi asaba urubyiruko kwigira ku butwari n’ubwitange byaranze Inkotanyi ubwo zahagarikaga jenoside.

Ati” turabasaba kurebera ku rugero rwiza rw’urubyiruko rwitanze rukabohora igihugu cyacu, mwagize amahirwe yo kugira ubuyobozi bwiza kandi bubakunda, ntimuzice ejo heza hanyu kuko ni mwe muzavamo abayobozi b’ejo hazaza, igihugu kibahanze amaso”.

Mu rwego rwo gukangurira urubyiruko kutarangwa n’amacakubiri ndetse no kurwanya ingengabiterezo ya jenoside hanimakazwa ubumwe n’ubwiyunge, mu karere ka Muhanga, ubu hari Club Urunana rw’urungano rugizwe n’urubyiruko 165, rurimo abarokotse jenoside, abavuka mu miryango y’ababyeyi bayigizemo uruhare ndetse n’abandi bavuka ku babyeyi bafashwe ku ngufu muri jenoside.

Uwambayinema M.Jeanne /bwiza.com

 

Izindi wakunda

Bwiza.com