bwiza.com
Ahabanza » Abahoze biga muri kaminuza i Lubumbashi bibutse bagenzi babo bishwe muri jenoside yakorewe Abatutsi
Kwibuka

Abahoze biga muri kaminuza i Lubumbashi bibutse bagenzi babo bishwe muri jenoside yakorewe Abatutsi

Umuryango ‘Kassapards’ w’abahoze ari abanyeshuri ba Kaminuza n’amashuri makuru yo mu Mujyi wa Lubumbashi  no mu nkengero zawo muri RDC,  bifatanije n’imiryango ya bagenzi babo 23  bazize Jenoside yakorewe Abatutsi  mu muhango wo kwibuka izo nzirakangane  ku Rwibutso rwa Kigali ku Gisozi.

Umuhango wo kwibuka  wabanjirijwe n’ikindi gikorwa cyo kuremera umubyeyi warokotse jenoside wo ku Ruyenzi mu Murenge wa Runda, akarere ka Kamonyi, akaba yaratewe inkunga yo kumufasha gusana inzu atuyemo.

Igikorwa cyo kwibuka nyirizina cyabimburiwe n’urugendo rwo gusura Urwibutso rwo  ku Gisozi aho abacyitabiriye bashyize indabyo ku mva zishyinguyemo imibiri y’abazize jenoside basaga ibihumbi 25.

Perezida w’Umuryango w’aba Kassapards, Kayiranga Gakuba Theogene ,yasobanuye impamvu y’izina Kassapards avuga ko rikomoka ku cyicaro cya Kaminuza ya Lubumbashi ibarizwa ahitwa Kassapa mu mujyi wa Lubumbashi.

Kayiranga yasobanuye ko atari uko nta bandi ba Kassapards baba barazize Jenoside yakorewe abatutsi, ahubwo ko abo 23 aribo bamaze kubonerwa amakuru .

Yashimangiye ko ubushakashatsi bugikomeza, anasaba buri wese wagira cyangwa wazamenya amakuru yandi nkayo  ko yazabigeza ku Muryango wa’aba Kassapards kugira ngo no mu zindi nshuro zizabaho zo kwibuka n’abo babonewe amakuru mashya  bazibukwe, dore ko ari ku nshuro ya mbere uyu muryango ukoze iki gikorwa.

Dr Dusingizemungu Jean Pierre, Perezida wa Ibuka wari witabiriye uyu muhamgo akaba n’umushyitsi mukuru, yashimiye igikorwa cy’aba Kassapards agira ati “ iki ni igikorwa gikomeye mwakoze mu gushakisha imiryango y’abacitse ku icumu bari hano kuko bibafasha kurushaho kugira icyizere”.

Yakomeje agira ati “ birakwiye ko mu gihe cyo kwibuka tujya tugirana ikiganiro n’abacu batakiriho kabone n’ubwo tutabareba.Agahinda twatewe na Jenoside ntikagomba kutwibagiza ibyiza n’aheza twabanyemo n’abacu”.

Dr Dusingizemungu yashimangiye ko “ kwibuka ari inzira ivana mu rupfu ikaganisha ku buzima, bityo bikaba bigomba kudufasha kubaka urunana n’abacu bishwe”.

Abari bahagarariye imiryango y’aba Kassapards bazize Jenoside bahagarariwe na Hon. Mukarugema Manzi Alphonsine biyemeje gushyira hamwe n’Umuryango w’aba Kassapards mu bikorwa byose bijyanye no kwibuka ndetse no mu bindi byose bizabahuza.

Uyu muryango wiyemeje kubaba hafi ndetse uniyemeza kuzanoza no kuzongera umubare n’imitunganyirize y’amashusho ( fil documentaire) ku mibereho y’aba Kassapards bazize Jenoside yakorewe abatutsi.

 Perezida w’Umuryango w’aba Kassapards yandika ubutumwa mu gitabo cyabugenewe ku Rwibutso rwa Kigali ku gisozi
 Umwe mu bagize imiryango y’aba Kassapards bazize Jenoside ashyira indabyo ku rwibutso.

Izindi wakunda

Bwiza.com