bwiza.com
Ahabanza » Alexis Kagame uvugwaho guhindura Bibiliya mu Kinyarwanda, ni muntu ki?
TUBAMENYE

Alexis Kagame uvugwaho guhindura Bibiliya mu Kinyarwanda, ni muntu ki?

Mgr Alexis Kagame

Alexis Kagame yavutse ku wa 15 Gicurasi 1912, mu misozi ya Kiyanza, mu cyahoze ari Komini Mugambazi, ubu ni mu karere ka Rulindo. Yavutse ku ngoma y’umwami Yuhi V Musinga, umuryango we wari umwe mu miryango ikomeye i bwami, kuko bari abanyamabanga b’ibwami [Abiru].

Avuka, u Rwanda rwari mu maboko y’abakoloni b’Abadage, gusa nyuma yaho u Budage bwambuwe gukoloniza u Rwanda ubwo intambara ya mbere y’Isi yari irangiye, rwahise rujya mu maboko y’Ababiligi n’uko Alexis Kagame na bamwe mu bo mu muryango we, bahita bahinduka abayoboke ba kiliziya Gatolika.

Alexis Kagame yize mu Iseminari y’i Nyakibanda, mu mwaka wa 1941 aba padiri ndetse muri icyo gihe yari n’umwe mu banditsi bakomeye b’ikinyamakuru “Kinyamateka’’ cya kiliziya Gatolika.

Mu mwaka wa 1952 yanditse igitabo acyita “Le code des institutions politiques de Rwanda’’ abifashijwemo n’inshuti ye magara, umwami Mutara III Rudahigwa, gusa abakoLoni b’Ababiligi bifuzaga gutandukanya Abanyarwanda kugira ngo babashe kubayobora, babonye ko bitazabashobokera, Alexis Kagame agihari n’uko bamwohereza i Roma mu Butaliyani, kwiga muri kaminuza yaho yitwa Gregorian, anahakura impamyabumenyi y’icyirenga muri Philosophie ndetse aninjira mu muryango witwa “les pretres noires’’ , wari ugamije gukwirakwiza amatwara n’imyemerere bya kiliziya Gatolika.

Alexis Kagame yagarutse mu Rwanda mu 1958,  ubwo Kaminuza Nkuru y’u Rwanda yatangizwaga mu 1963, Kagame yahawemo akazi ko kwigisha ndetse anandika ibitabo byinshi byagarukaga ku mateka y’u Rwanda rwa mbere y’ubukoloni, gusa ibi byose ntibyashimishaga Ababiligi, kuko bagiye bamufunga kenshi azira gucukumbura no gushyira ahagaragara imiyoborere yabo.

Bimwe mu bitabo byanditswe na Alexis Kagame, harimo:

-Un abrege de l’ethno-histoire du Rwanda [1972]

-Introduction aux grands genres lyriques de l’ancien Rwanda [1969]

-Les milices du Rwanda pre-coloniale [1963].

Igitabo cye cyamenyekanye cyane mu bato n’abakuru, ni icyo yise “Indyoheshabirayi’’ aho yagereranyije umwami Mutara III Rudahigwa ndetse n’abatware bayoboranaga, nk’ingurube.

Ku itariki 4/7/1981 , Papa Yohani Paul II yagize Alexis Kagame umusenyeri w’icyubahiro [prelat d’honneur].

Kugeza ubu, Alexis Kagame ni umwe mu banditsi b’Abanyarwanda bagiriye u Rwanda akamaro kenshi kubera imyandikire ye y’Ikinyarwanda, ku bungabunga ururimi rw’Ikinyarwanda, ni na we kandi  washyize ahagaragara uko ingoma ngabe z’u Rwanda zagiye zisimburanwaho n’abami b’u Rwanda ndetse kandi ni we wahinduye Bibiliya [isezerano rishya]  ayishyira mu rurimi rw’Ikinyarwanda. yatabarutse ku itariki ya 2/12/1981.

 

Mbarushimana Africa/ BWIZA.COM

Izindi wakunda

Bwiza.com