bwiza.com
Ahabanza » Inkomoko y’umugani ‘ak’i Muhana kaza imvura ihise’
Amateka n'umuco mu Rwanda

Inkomoko y’umugani ‘ak’i Muhana kaza imvura ihise’

Uyu mugani waciwe n’umwami w’amahoro, iterambere, n’umutuzo Yuhi IV Gahindiro wayoboye u Rwanda ahayinga mu mwaka wa 1746, akaba mwene Mibambwe III Mutabazi II Sentabyo na Nyiratunga.

Gahindiro ubwo yari mu rugo rwe rw’i Sheri na Butera ho muri Runda na Gihara [ubu ni mu karere ka kamonyi], yari afite akamenyero ko kuzenguruka urugo rwe mbere yo kuryama n’ubwo yari afite abarizi, bukeye agiye kuzenguruka uko bisanzwe imvura iragwa iramuzinga ariko ikimara guhita akomeza kurugendagenda aza guhura n’abana babaga iwe bavuye kwiba ibishyimbo n’ibihaza byo kugerekaho.

Akibakubita amaso arabamenya niko kubabaza ati “murava he mukajya he basha? nabo banga kumuhisha, bati “tuvuye kwiba’’, arababaza ati ‘’mwibira iki mu rugo rwanjye hari ikibuzemo?’’,nabo bati “ubuse watwereka nibura umurima wawe ungana urwara uhinzemo ibi tuvuye kwiba?, arabareba arabareka baragenda ,bageze mu rugo babura inkwi zo kubitekesha kuko imvura yakomeje kugwa, nuko babirarana ubusa.

Bucyeye mu gitondo Gahindiro ahamagaza Abanyagihara ndetse n’abandi bahaturiye abategeka guhinga umurima w’ikiyagamure uri mu gikombe kiri hagati ya Sheri na Nyagasozi awita Rwangambibi, abategeka guhingamo ibishyimbo n’ibihaza, hanyuma ategeka ba bana kujya babyitonorera ngo bashire irari ryabyo.

Umunsi umwe Gahindiro aza kwinyuza aho ba bana bariraga bya bishyimbo, niko kubabaza ati “ bya bishyimbo mwibye mwaje kubiteka?, bati ‘oya’, twabuze inkwi tubirarana ubusa’’, na we arabaseka cyane ati “none se ko ubungubu imvura iri kugwa, hari ubwo mwigeze murara ubusa?, bati ‘’oya, ati ‘’nimujye mwihingira ibyanyu musorome , imvura itaragwa, ntimuzaburara.

Akimuhana kandi ni izina ry’umurima Gahindiro yahingishije i Mulinja ho mu Mayaga, nyuma yo gutuma kuri nyirasenge Nyaminoga ya Gihana cya Rujugira ngo amuhe amasaka n’uburo byo kumaza urubanza mu gihe cy’imvura, nyirasenge abimwima agira ati “dore ni igihe cy’imvura mfite ibyondo ku birenge kandi nta bantu mfite bo kungira mu kigega, nihituka uzaze nguhe amasaka n’uburo wimarire urubanza”.

Gahindiro arabyumvira, yibuka na bya bishyimbo abana be bararanye ubusa  kubera imvura, niko gutekereza ati koko ak’i Muhana kagomba kuba kaza imvura ihise’, niko  guhingisha umurima aho i Mulinja, awita ak’i Muhana, uyu mugani ucibwa iyo bashaka kubwira umuntu ko atagomba kwiringira ibyo adafite, cyangwa ibiri mu ntoki zundi.

Mbarushimana Africa/ BWIZA.COM

Izindi wakunda

Bwiza.com