bwiza.com
Ahabanza » Dore impamvu Rafael Nadal afatwa nk’umukinnyi wa mbere muri Tennis
Imikino

Dore impamvu Rafael Nadal afatwa nk’umukinnyi wa mbere muri Tennis

Rafael Nadal, umuhanga muri Tennis

Rafael Nadal Perera uzwi ku izina rya ‘’Rafa’’ yavutse ku itariki ya 3 Kamena 1986, i Manacor ku kirwa cya Belearic muri Espagne. Yatangiye gukina umukino wa Tennis ubwo yari afite imyaka itatu y’amavuko, aho yatozwaga na nyirarume, Toni Nadal.

Ku myaka umunani y’amavuko, Rafa yegukanye shampiyona y’abatarengeje imyaka 12 “under-12 regional tennis Championship”, bituma atangira kwigarurira imitima y’abanyaburayi bakunda umukino wa Tennis.

Ku myaka 12 kandi, Rafa yongeye kugaragaza ubuhanga bwe atsindira irushanwa ry’abato mu mukino wa tennis ku mugabane w’u Burayi, ndetse yongera kugaragaza ubuhanga bwe haciyeho imyaka ine, ubwo yari afite imyaka 16 y’amavuko amaze umwaka umwe akina nk’uwabigize umwuga, atsindira kujya muri ½ mu irushanwa ryitwa ‘’Wimbledon’’, aba abaye umuto wa mbere ubashije gukora ibyo nyuma y’uwitwa Boris Becker wigeze kubigerageza.

Mu mwaka wa 2005 ubwo Rafa yari afite imyaka 19 y’amavuko,yatwaye irushanwa rya ‘’French Open’’ bwa mbere mu mateka ye, ndetse anatsindira n’andi marushanwa agera kuri 11, umunani muri yo yakiniwe ku butaka, bituma afatwa nk’umwami wa tennis ikinirwa ku butaka ndetse no muri uwo mwaka  asohoka ari nimero ya 3 ku isi ku rutonde ngarukamwaka rw’abakinnyi ba Tennis.

Mu myaka yose yakurikiyeho,Rafael Nadal yakomeje kwandika amateka ndetse no kwigarurira imitima y’abatuye isi, akomeza guhangamura ibihangange mu  mukino wa Tennis nka Roger Federer, Novac Djokovic,na Andy Murray,bituma mu mwaka wa 2008 asohoka na none ari nimero ya mbere ku isi ku rutonde ngarukamwaka rw’abakinnyi ba Tennis ndetse muri 2009 atwara irushanwa rya Australian open, French open,na Wimbledon, anatwara umudari wa zahabu mu mikino ya olympic.

Dore ibintu bitanu by’ingenzi wamenya kuri Rafael Rafa Nadal

1.Rafael Nadal akunda ruhago ku buryo ku itariki ya 8 Nyakanga 2010,yashyize 10/100 by’imigabane mu ikipe y’iwabo muri Espagne yitwa Mallorca, iyi kipe niyo izwiho kuba yarazamuye igihangange Samuel Etoo ndetse kandi Rafa ni umukunzi w’akadasohoka w’ikipe ya Real Madrid yo muri Espagne ,aho avuga ko akunda cyane Raul Gonzalez, Iker Casillas ndetse na  Alfredo di Stephano.

2.Rafael Nadal ni we mukinnyi wabashije kuba nimero ya mbere ku isi ku rutonde ngarukamwaka rw’abakinnyi ba Tennis akuze kurusha abandi,mu 2017 ubwo yari afite imyaka 31.

3.Rafa wahawe akazina ka ‘’master of clay’’ niwe mukinnyi rukumbi umaze guca agahigo ko gutsinda imikino myinshi mu mikino ya tennis ibera mu bitaka,urugero nko mu irushanwa rya Roland-Gallos,ndetse nayandi…

4.Rafa niwe mukinnyi wabashije gutsindira amarushanwa atatu mu mwaka umwe w’imikino,ku bibuga bitandukanye.

5.Nadal Rafa niwe mukinnyi umaze gukina imikino ya nyuma (final) myinshi mu irushanwa rya ‘French open inshuro 11’,agahigo asangiye na Roger Federer.

Kuri uyu munsi wa none, Rafael Nadal akundana na Xisca Perero kuva mu 2005,ariko ntibarabana byemewe n’amategeko. Nadal kandi ni umwe mu nkingi za mwamba mu mukino wa Tennis,aho afatwa nk’umwe mu bakinnyi b’ibihe byose muri uyu mukino ndetse akaba anafatwa nk’umwami wa Rolland-Gallos,irushanwa rikomeye aherutse no kwegukana.

Mbarushimana Africa/ Bwiza.Com

Izindi wakunda

Bwiza.com