bwiza.com
Ahabanza » Perezida Nkurunziza w’u Burundi abaye ikibasumba mu bayobozi- Twagiramungu Faustin
Featured

Perezida Nkurunziza w’u Burundi abaye ikibasumba mu bayobozi- Twagiramungu Faustin

Umunyapolitiki, Twagiramungu Faustin, yagaragaje ibyishimo yatewe na Perezida Nkurunziza w’u Burundi waratangaje ko azava ku buyobozi mu 2020, ko ari inshingiro ry’ubumwe n’amahoro ku Barundi.

Ku wa Kane tariki ya 7 Kamena 2018, Nibwo Perezida Nkurunziza yatangarije Abarundi n’amahanga ko yiteguye gushyigikira umukuru w’igihugu Abarundi bazitorera mu 2020, by’umwihariko ko we atazongera kwiyamamaza.

Aho yagize ati “Mumenye neza ko iri tegeko nshinga ritashyiriweho Petero Nkurunziza nk’uko abanzi b’u Burundi bamaze iminsi babivuga, ku binyerekere, nemeje kandi niteguye neza n’umutima wanjye wose n’ubwenge bwanjye bwose kuzashyigikira umukuru w’igihugu cyacu tuzatora umwaka wa 2020,… ndagira ngo mbamenyeshe, Abarundi n’amahanga ko tutazivuguruza, manda yacu izarangira mu mwaka wa 2020”.

Nyuma y’aya magambo yatangajwe na Perezida Nkurunziza, umunyapolitiki Twagiramungu ukunze kumvikana kenshi mu itangazamakuru anenga politiki yo mu karere u Rwanda ruherereyemo, avuga iri jambo rya Nkurunziza ari iryo gukomerwa amashyi.

Ati “Ejobundi tariki ya 7 Kamena 2018, twumvise “inkuru nziza”, mu ijwi ryiza rya Nkurunziza Petero Perezida w’u Burundi, maze tuvuza impundu. Nibyo twamuhaye impundu n’amashyi, kandi arabikwiye kubera ko mu bayobozi bo mu bihugu bimwe byo mu Karere k’Ibiyaga Bigali, abaye Ikibasumba mu buyobozi: kubera ijambo ryiza ryo kwanga kwizirika ku butegetsi”.

Akomeza avuga ko iri jambo rya Pereza Nkurunziza rigiye kuba izingiro ry’umusingi w’ubumwe no kwimakaza amahoro mu Burundi.

Ati “iri jambo rigiye kubera u Burundi n’abanyagihugu bose ishingiro ry’amahoro n’ubumwe barwaniye kuva kera, bakaba barabitangiye n’igitambo: Umuganwa Rwagasore Louis wishwe tariki ya 13 Ugushyingo) 1961; tutibagiwe n’abandi bitambukiye bafatanije na we; nka Mirerekano nakoze mu ntoki mu ntangiriro ya 1965, mbere yuko yicwa n’abanzi b’igihugu cy’u Burundi kuri 25 Ukwakira 1965”.

Twagiramungu Faustin yabaye Ministiri w’Intebe w’u Rwanda(1994-1995), mu mwaka wa 2003, yiyamamaje ku mwanya wa Perezida wa Repubulika y’u Rwanda, atsindwa amatora ku majwi make 3.62%  ari nabwo yahise ajya kuba ku mugabane w’u Burayi ari nabwo yatangiye kurwanya Leta y’u Rwanda yakoreraga.

Ku myaka ye 72, Twagiramungu ubu ubarizwa mu Bubiligi, yakomeje gushimangira ko azakomeza gukina politiki nubwo ashaje, ko ugusaza ku myaka bitavuze gusaza mu mutwe. Ati “niba nshaje ntabwo nshaje mu bwonko, ibitekerezo byanjye biracyari bya bindi”.

Izindi wakunda

Bwiza.com