bwiza.com
Ahabanza » Uganda: Umudepite arakekwaho kugira uruhare mu iyicwa rya mugenzi we w’umudepite
Amakuru Politiki

Uganda: Umudepite arakekwaho kugira uruhare mu iyicwa rya mugenzi we w’umudepite

Depite Betty Nambooze mu modoka ya polisi nyuma yo gutabwa muri yombi

Igipolisi cya Uganda cyataye muri yombi umudepite wo mu ruhande rutavuga rumwe n’ubutegetsi ukekwaho uruhare mu iyicwa rya mugenzi we w’umudepite witwa Ibrahim Abiriga wishwe mu cyumweru gishize.

Uyu mudepitekazi witwa Betty Nambooze  yakuwe iwe mu rugo ahitwa Mukono, mu birometero 25 ugana mu burasirazuba bwa Kampala, mu gitondo cyo kuri uyu wa Gatatu, itariki 13 Kamena.

Igipolisi kikaba kivuga ko Nambooze n’abandi bantu batatu babinyujije ku rubuga nkoranyambaga rwabo bashyigikiye igitero kuri depite Abiriga. Umwe mu bapolisi akaba atangaza ko uyu mudepitekazi yafashwe kubera ibyo bintu batangaje.

Igipolisi kandi kivuga ko kiri bufunge abo bakoranye ibi bintu ari bo; Raymond Soulfa bita Peng Peng, Nasser Mugerwa na Jane Kuli.

“Twafunguye idosiye ku bantu bane. Abashinzwe iperereza baracyari no gusesengura ubutumwa ku mbuga nkoranyambaga  bw’abandi bagera mu 10. Nitubona ibimenyetso ko ibyo bavuganaga ari icyaha, nabo bazatabwa muri yombi”, uwo ni Vincent Ssekate, umuvugizi w’ubugenzacyaha.

Iyi nkuru dukesha The East African ivuga ko depite Abiriga yarashwe agapfa ari kumwe n’umuvandimwe we, Saidi Buga Kongo ubwo bari mu nzira bataha mu nkengero za Kampala mu ijoro ryo kuwa Gatanu ushize. Abantu bataramenyekana bari bitwaje intwaro bari kuri moto nibo barashe nyakwigendera.

Depite Abiriga wakomokaga mu ishyaka NRM riri ku butegetsi muri Uganda, ni umwe ngo mu bagize uruhare runini mu gushishikariza abandi guhindura itegeko nshinga ryavanwemo ingingo ivuga ku myaka umukuru w’igihugu atagomba kuba arengeje bituma perezida Museveni abona uburenganzira bwo kuzongera kwiyamamaza.

Depite Betty Nambooze akaba avugwaho kuba nawe yaratangaje ko abadepite bagenzi be bagize uruhare mu gukura iyi ngingo mu itegeko nshinga bashobora kuzahanwa bikomeye n’abaturage bitashimishije.

Peng Peng ukurikiranwe kimwe na Nambooze, ashinjwa kuba yarashyize ahagaragara video ashyigikira ibitero ku badepite bashyigikiye ivugururwa ry’itegeko nshinga, mu gihe mugenzi we Mugerwa ashinjwa gusohora amajwi ashishikariza abishe Abiriga gushaka abandi badepite bo muri NRM nabo bakabica.

Naho Jane Kuli we ashinjwa gushyira kuri facebook  ubutumwa yavugagamo ko Abiriga azicwa mu cyumweru cya mbere cy’ukwezi kwa Kamena.

 

Izindi wakunda

Bwiza.com