bwiza.com
Ahabanza » Inzego z’ibanze zirasabwa kubahiriza icyo itegeko rivuga ku nyigisho zihabwa abagiye gushyingiranwa
Amakuru Iterambere ry'umuryango

Inzego z’ibanze zirasabwa kubahiriza icyo itegeko rivuga ku nyigisho zihabwa abagiye gushyingiranwa

Umubyeyi Marie Mediatrice, umukozi wa Pro-femmes Twese hamwe

Ingingo ya 19 yo mu itegeko no 27̸2016 ryo ku wa 08̸ 07̸ 2016 rigenga imicungire y’umutungo w’abashyingiranywe, impano n’ izungura, ivuga ko umwanditsi w’irangamimerere ategura kandi agaha inyigisho irambuye abagomba gushyingirwa akabasobanurira imiterere ya buri buryo bw’imicungire y’umutungo w’abashyingiranywe agamije kubafasha guhitamo ububanogeye nibura iminsi irindwi (7)  mbere y’umuhango nyir’izina w’ishyingira.

Gusa ariko ngo iri tegeko ntiryubahirizwa nk’uko bamwe mu bahagarariye imiryango itegamiye kuri leta bibumbiye mu mpuzamiryango ‘Pro-femmes Twese hamwe’ babivuga ,ibi ngo bikaba bishobora kuba intandaro y’amakimbirane mu ngo kuko baba barasezeranye ibyo batumvise neza.

Bizimungu Fidèle, umukozi wa Mbwira ndumva Initiative, avuga ko uyu munsi wa none usanga abantu bagiye gusezerana imbere y’amategeko ari bwo batangira kwigisha uburyo bw’imicungire y’umutungo , amasezerano akorwa hagati y’abagiye kubana ibi ngo bituma abasezerana bahitamo uburyo bazawucungamo bahubutse kuko batabonye igihe gihagije cyo kwigishwa no kubisobanurirwa ,bagera mu rugo ugasanga batangiye kwicuza ibyo basezeranye.

Yagize ati« usanga abanyamadini bafata igihe gihagije bakigisha abagiye kubana nibura iminsi 21, ariko iyo bigeze ku buyobozi bwa Leta bakagenda bakamanika amazina yabo gusa iminsi 21 yashira bakaza gusezerana icyo gihe, ni naho ubasezeranya atangira kubigisha ,yarangiza ati murahitamo ubuhe buryo? Bahitamo ibyo babonye ariko batabitekerejeho neza.»

Bizimungu avuga ko bifuza ko izi nzego za Leta zishinzwe gusezeranya ,zikwiye kujya zubahiriza icyo itegeko rivuga kugira ngo umuryango urusheho gutekana no kubana mu mahoro.

umukozi wa Haguruka, Uwimana Olive avuga ko bigaragara ko abenshi bahabwa ziriya nyigisho umunsi wo gusezerana, atari uko ababikora baba batazi icyo itegeko rivuga ahubwo bishobora no guterwa n’akazi kenshi cyangwa inshingano nyinshi abanditsi b’irangamimerere baba bafite.

Yagize ati « byakabaye byiza izi nyigisho bazihawe mbere itegeko rikubahirizwa nk’uko ribiteganya  kuko ingaruka ziragaragara kenshi,  niba umuntu ahisemo uburyo atatekereje neza ,ashobora kugera mu rugo agasanga bitandukanye n’uko yabyumvaga wa munsi kuko atari afite umwanya uhagije wo kubitekerezaho ,bikabyara amakimbirane mu rugo cyangwa se bikanabivaramo gutandukana.»

Umukozi wa Pro-femmes Twese hamwe, Umubyeyi Marie Médiatrice avuga ko bamaze kubona ko iri tegeko ritubahirizwa kandi bikagira ingaruka ku muryango, bakaba bagiye kurushaho gukora ubuvugizi.

Yagize ati« twihaye intego yo gukora ubuvugizi inzego z’ibanze zubahirize icyo itegeko rivuga kuko iriya minsi 7 irahagije , nibiba ngombwa mbere yo gusezeranya bajye babanza berekane icyangombwa ko abo bantu koko bamaze  kwigishwa no gusobanukirwa uburyo bwo gucungamo umutungo.»

Uyu mukozi kandi avuga ko  bagiye no kwegera urubyiruko cyane barukangurira kujya basoma bakamenya  amategeko , hakiri kare igihe bagiye gushyingirwa bakaba bazi uko bazacunga umutungo wabo  nk’uko bazi ibyo umuntu asabwa kuba yujuje igihe agiye gushaka akazi, nawe abe azi ngo igihe yagize urugo azarucunga mu buryo ubu n’ubu.

Uwambayinema M.Jeanne ̸ bwiza.com

Izindi wakunda

Bwiza.com