bwiza.com
Ahabanza » Kirehe: Ababyeyi baratabariza abana babo bakubitwa bakanirukanwa ku ishuri
Amakuru Mu mashuli

Kirehe: Ababyeyi baratabariza abana babo bakubitwa bakanirukanwa ku ishuri

Ababyeyi bo mu murenge wa Nasho, akarere ka Kirehe, baratabariza abana biga ku  ishuri ribanza rya Ntaruka birukanwa burundu bazira amakosa bita ayorohereje, abandi bagakubitwa.

Ababyeyi baharerera bavuga ko batewe impungenge n’uburyo abanyeshuri birukanwamo, bamwe bikabaviramo kuba inzererezi abandi bakajya gukora imirimo yo mu rugo mu mijyi.

Umubyeyi utarashatse ko amazina ye atangazwa, yatangarije Bwiza.com, ko uburyo abarezi bakurikirana abana babo biteye impungenge.

Agira ati “uburyo abana bahanwamo buratubabaza ku buryo hatagizwe igikorwa abana benshi bareka ishuri, hari nk’umwarimu bita Veda yirirwa ahondagura abana ku buryo bamwe bazareka ishuri kubera gutinya inkoni, hari abandi bana birukanwe kubera amakosa yoroheje, hari nk’umwana w’umukobwa birukanye agiye kujya mu wa Gatandatu, umubyeyi we yasabye imbabazi ariko baranga, ajya mu kazi ko mu rugo afite imyaka 13”.

Nyirabeza Venantie, ni umubyeyi ufite umwana umaze amezi make yirukanwe burundu kubera kumena ikirahure cy’idirishya ry’icyumba cy’ishuri.

Ati “Umwana wanjye bamwirukanye bagiye gukora ikizami mu gihembwe cya mbere ubu hashize amezi yirirwa azerera, bamaze kumwirukana nagiye ku ishuri barambwira ngo umwana wanjye ni umusazi nimujyane, nababwiye ko ikirahure  umwana yamennye bamureka akiga nkacyishyura kuko yakinaga n’abandi agira ibyago, aho kunyumva baranyirukanye bambwira ko atazongera kwiga ku kigo cyabo”.

Yakomeje asaba ubuyobozi gufasha umwana we agakomeza kwiga, ati “ndasaba ubuyobozi ko bwadufasha umwana agasubira mu ishuri kuko kuba atiga nk’abandi bishobora gutuma ajya mu buzererezi,  kandi hakanabaho gukurikirana abarimu kuko ibihano batanga bibangamira abana”.

Umuyobozi w’akarere ka Kirehe, Muzungu Gerard avuga ko agiye gukurikirana iki kibazo batari bazi. Ati “Ntabwo icyo kibazo nari nkizi ariko tugiye kubikurirana, niba abana bakoze urugomo bakagira ibyo bangiza ntabwo abana bakwirukanwa kubera iyo mpamvu, ahubwo ababyeyi bakwishyura ibyangijwe ariko ntibirukanwe”.

Iki kigo cya Ntaruka nta diregiteri gifite, ubu kiyobowe n’uhagarariye abarimu. Bwiza.com yagerageje kumuvugisha ku murongo wa telefoni, isanga itariho.

Ngabonziza Justin/Bwiza.com

Izindi wakunda

Bwiza.com