bwiza.com
Amakuru mu Rwanda

Rubavu: Bamwe barara mu mwijima kandi amapoto y’amashanyarazi ashinze mu mirima yabo

Abaturage bo mu mirenge ya Rubavu, Rugero na Cyanzarwe bavuga ko bemeye gutanga imirima yabo nta ngurane ishingwamo amapoto y’amashanyarazi, bemera gutema insina zabo n’indi myaka bazi ko bagiye kuva mu icuraburindi, none umwaka ushize batarahabwa amashanyarazi bemerere.

Bavuga ko insinga zica hejuru y’inzu zabo, amapoto ashinze mu mirima yabo, ariko imyaka ibiri ngo ikaba igiye kwihirika bakirara mu mwijima bari barizejwe amashanyarazi vuba.

Bagira bati “twebwe baratubwiye ngo nidutange ibibaza bashingemo amapoto, bati ‘bazarangiza badusubize’, ubu twarategereje twarahebye”.

Undi ati “Ikibazo kibitera ntabwo tukizi, kuko bazanye amapoto, aya mapoto mubona ashinze, imyaka ibiri igiye gushira ashinze, baraza bakatubwira ngo umuriro barawurekura, umuriro ntibawurekure, …”.

Aba baturage bavuga ko byabateje igihombo ku buryo butandukanye kandi bari bafite icyizere cyo kubyaza umusaruro ayo mashanyarazi bakiteza imbere.

Ati“Abaturage bari bemeye ko ayo mapoto acishwa mu kwabo nta kiguzi kugira ngo tubone umuriro vuba, twese twari twemeye, n’ufite insina akavuga ati ‘nibateme ariko umuriro uze’, ariko noneho ikibazo ni uko nibyo bemeye batabikoze ngo n’umuriro uze”.

Bamwe muri aba baturage batangarije VOA dukesha iyi nkuru, ko bari basabye inguzanyo baratangiye imishinga bizeye ko umuriro ugiye kubageraho ikihuta, ubu banki zibishyuza imishinga yabo idakora neza nk’uko bari babyiteze.

Urubyiruko rwize ubusudizi, ruvuga ko rwari rwizeye ko akazi kabonetse, none aya mashanyarazi badahabwa ngo yatumye baguma mu bwigunge bahanganye n’ubushomeri.

Ubuyobozi bw’akarere ka Rubavu, buvuga ko bushimira abaturage ubushake bagize bagatanga ubutaka bwabo nta ngurane kugira ngo begerezwe amashanyarazi, agashimangira ko baganiriye n’ikigo cy’igihugu gishinze ingufu ‘REG’ kugira ngo kigeze kuri aba baturage amashanyarazi.

Visi Menya ushinzwe iterambere ry’ubukungu, Murenzi Janvier, agira ati “turizera ko mu cyumweru gitaha ubwo twamaze kuvugana n’ubuyobozi bwa REG nabo baba  biteguye kutugezaho amashanyarazi, ibyo nibikorwa neza, abaturage bagakuraho ibiba biri mu nzira y’amashanyarazi, mu by’ukuri umuriro barawubona mu gihe kitarenze n’icyumweru nk’uko ubuyobozi bwa REG bwabitubwiye”.

 

 

 

Izindi wakunda

Bwiza.com