bwiza.com
Ahabanza » Ruhango: Litiro ibihumbi umunani z’amata zicuruzwa magendu
Amakuru Ubukungu

Ruhango: Litiro ibihumbi umunani z’amata zicuruzwa magendu

Koperative ‘KAMERU’ igizwe n’abacuruzi b’amata n’aborozi bo mu karere ka Ruhango yitezweho guca burundu ikibazo cy’abayacuruza mu kajagari, aho litiro ibihumbi umunani zicuruzwa muri ubu buryo.

Ubuyobozi bw’akarere buvuga ko muri aka karere habarurwa amakusanyirizo ane afite ubushobozi bwo kwakira litiro ibihumbi 11 ku munsi, ubu akaba yakira izingana n’ibihumbi bitatu ku munsi, asigaye yose abarirwa muri litiro ibihumbi umunani akaba ariyo acuruzwa mu buryo bwa forode.

Umworozi utuye mu kagari ka Rwoga, umurenge wa Ruhango, Twagirumwami Edouard avuga ko muri aka gace bafitemo amata menshi ariko acuruzwa mu kajagari, buri mworozi akayagurisha aho abonye kandi ugasanga ibiciro bidahuye bitewe n’aho ayagurishiriza.

Yagize ati«wasangaga abacunda baza bakaduha ayo bishakiye nta giciro cyari kizwi, ariko  ubu tuzajya tuyagemura ku makusanyirizo ya koperative kandi tuzaba twizeye n’igiciro baduhaye kuko litiro izajya igura 200 igiciro cyashyizweho na Minisiteri, mu gihe bo bayaguraga mu buryo bwa forode bakaduhenda».

Umuyobozi wa koperative Kameru (Koperative amata meza Ruhango),  Mukamuganga Julienne avuga ko ubusanzwe bari basanzwe bacuruza amata ariko batabifitiye ubumenyi buhagije mu buryo amata atunganywamo ,uko acuruzwamo ariko nyuma yo kwishyira hamwe basanze bagomba kuyatunganya neza bakanayagurisha no hirya no hino ariko bidakozwe mu kajagari nk’uko babikoraga.

Yagize ati« muri aka gace hacuruzwaga amata menshi ku buryo bwa forode amwe ajya i Nyanza andi i Muhanga, twasanze tutakomeza kuyacuruza gutyo ahubwo nitwegerana nta mata azongera kunyuzwa hirya no hino rwihishwa ,tuzajya tuyatunganya ubundi abayakeneye baze bayagure ariko bayatware ameze neza atunganijwe».

Umuyobozi wungirije ushinzwe imibereho myiza muri aka karere, Mukangenzi Alphonsine , yemeza ko kwishyira hamwe kw’abacuruza amata n’aborozi bizakemura ikibazo cy’abaturage bamburwaga n’abo bayagemuriraga ugasanga bahora mu manza baburana nabo.

Uyu muyobozi  avuga ko nta muturage uzongera kwamburwa amafaranga y’umukamo we kuko bizaba bizwi ko yayagemuriye koperative ndetse yanayagejeje ku ikusanyirizo

Ati« nk’ubuyobozi tuzabafasha, umukamo wajyaga i Nyanza na Muhanga uzabanze uhaze aba hano, aborozi nibitabira amakusanyirizo ya koperative ntibazongera kwamburwa ,ubu dufite abaturage bagemuriye ikusanyirizo ry’umuntu ku giti cye ndetse aranabambura uyu munsi turacyakurikirana urwo rubanza ngo abishyure ,iyo biza kuba bitarakorwaga mu kajagari ntibari kwamburwa ,kandi inyungu ya mbere umuturage abona nuko  yabona amafaranga y’umukamo we».

Iyi koperative  Kameru igizwe n’abanyamuryango 32,yatangiye gutunganya amata y’ikivuguto  gusa ariko bavuga ko bagifite ikibazo cy’ibikoresho bigezweho nk’imashini iteka amata kuko ubu bagiteka mu buryo busanzwe bakoresheje inkwi ndetse bakaba batarabona n’imashini ikonjesha amata ngo batangire no gutunganya inshyushyu ndetse n’ibindi bikomoka ku mata. Izajya igurira aborozi amata ku mafaranga 200 kuri litiro imwe ,ari nacyo giciro cyashyizweho na Minisiteri, naho yo izajya iyagurisha ku mafaranga 300 ku bifuza kujya kuyacuruza.

Mu karere ka Ruhango habarurwa inka zirenga ibihumbi 66 muri zo izikamwa zisaga  ibihumbi 13 zitanga umukamo ungana na litiro ibihumbi 40.199 ku munsi litiro zingana n’ ibihumbi 20.100 zijyanwa ku isoko naho izindi zisigaye zikanyobwa n’abaturage mu ngo iwabo.

Umuyobozi wa koperative ‘Kameru’,Mukamuganga Julienne avuga ko intego yabo ari uguca akajagari kari mu bucuruzi bw’amata
Umuyobozi wungirije w’akarere ka Ruhango ushinzwe imibereho myiza, Mukangenzi Alphonsine avuga ko amata ajyanwa mu tundi turere kandi iwabo akenewe
Umuyobozi wungirije w’akarere ka Ruhango ushinzwe imibereho myiza, afungura inyubako iyi koperative izajya itunganyirizamo amata

Uwambayinema M.Jeanne ̸ Bwiza.com

Izindi wakunda

Bwiza.com