bwiza.com
Ahabanza » Abagize Inteko Ishinga Amategeko bahaye Minisitiri w’Intebe umukoro
Amakuru Featured

Abagize Inteko Ishinga Amategeko bahaye Minisitiri w’Intebe umukoro

Abagize inteko ishinga amategeko basabye Minisitiri w’Intebe kwirukana abayobozi b’ibigo bya leta bananiwe gucunga umutungo w’ibigo bigashyira leta mu gihombo cya miliyari z’amanyarwanda.

Ibi abadepite babisabye kuri uyu wa Gatatu Nyuma y’aho komite ishinzwe gukurikirana imikoreshereze y’imari ya leta (PAC) igaragarije ubusesenguzi bwayo kuri raporo y’Umugenzuzi Mukuru wa Leta y’umwaka wa 2016/17.

Abagize inteko ishinga amategeko, umutwe w’abadepite by’umwihariko babajije Minisitiri w’Intebe, Dr Edouard Ngirente, kwirukana abashinzwe ingengo z’imari n’abakuriye imari bananiwe gushyira mu bikorwa amabwiriza y’Umugenzuzi Mukuru ku rugero byibuze rwa 60% mu myaka 3 ishize.

Abagize uruhare mu guteza leta igihombo kandi binyuze muri kontaro zidafututse, gukererwa cyangwa kureka imirimo ya leta (bikozwe n’abikorera baba barahawe akazi) , kimwe n’abiha kugura ibikoresho bimaze igihe bidakoreshwa, nabo bagomba kwirukanwa nk’uko abadepite babisabye.

Perezida wa PAC, Hon. Juvenal Nkusi, yavuze ko kenshi abayobozi bagiye bakora amakosa bakayasabira imbabazi ggusa ariko ntibahanwe by’intangarugero, asaba ko iyo migirire yacika.

Hon. Nkusi ati: “Kubabarira ni byiza ariko tugomba kubaha itegeko. Ninde ufite ububasha bwo kubabarira iyo bigeze ku gukoresha nabi umutungo wa rubanda? Nta n’umwe,

Yakomeje avuga ko boherereje ibyo basaba Minisitiri w’Intebe nk’umukuru wa guverinoma. Ati: “Niwe ugenzura aba bantu bose kandi niwe ugomba kuduha ibisubizo.”

Abashinzwe imari n’ingengo z’imari mu nzego za guverinoma usanga ari bo bayobozi bakuru muri za minisiteri  n’ibigo bya leta. Harimo n’abanyamabanga bahoraho, abayobozi bakuru n’abandi.

Raporo y’Umugenzuzi Mukuru w’Imari ya Leta ya 2016/17 igaragaza ko ibigo byinshi bya leta byananiwe kuzuza ibyasabwe n’amabwiriza y’umugenzuzi mukuru aho ngo benshi babishyize mu bikorwa ku rugero ruri munsi y’urusabwa rwa 60%.

Ibigo bikunze gushyirwa mu majwi bikaba birimo Kaminuza y’u Rwanda yashyize mu bikorwa amabwiriza y’umugenzuzi mukuru ku rugero rwa 26%, WASAC, kuri 27%, REB kuri 28%, EDCL kuri 41%, EUCL kuri 40.4%, RBC kuri 43% na RSSB kuri 49%.

Iyi raporo yashyizwe ahagaragara mu mezi atatu ashize, yagaragaje ko ibibazo byo gutinza imirimo cyangwa kuyihagarika bikomeje kugaragara, aho ubugenzuzi buvuga ko kontaro 109 z’amafaranga miliyari 206 zahagaze.

Imishinga myinshi yahagaze ikaba igaragara mu turere (kontaro 70), mu bigo bya leta (kontaro 38), mu rwego rwigenga rw’imishinga ya guverinoma (kontaro 23), kimwe no muri za minisiteri no mu zindi nzego za guverinoma (kontaro 8).

Ku kijyanye n’ibikoresho biba byaraguzwe ntibikoreshwe, Ubugenzuzi bwagaragaje ibikoresho byatwaye akayabo ka miliyari 23 z’amanyarwanda mu kugura za mudasobwa zo mu mashuri, ibikoresho by’ubuvuzi, ibikoresho bikoreshwa mu gutanga amazi n’amashanyarazi n’ibindi.

Kuri uyu wa Gatatu, itariki 18 Nyakanga mu nteko ishinga amategeko, abadepite bakomeje gushimangira ikijyanye no kujya umuntu abazwa imikorere ye kandi guverinoma igafatira ibihano bikomeye abatandukiriye.

Hon. John Ruku-Rwabyoma akaba yarashimangiye ko guverinoma ikwiriye guhagarika gukomeza kwihanganira ibihombo, ahubwo ababigizemo uruhare bakajya babyishingira.

Hon Anita Mutesi we agasanga ibi bidakwiye kureba abayobozi bo mu nzego zo hejuru gusa, ahubwo n’abakozi bato n’abatekinisiye bibareba.

Ati: “Ntibikwiye kuba abayobozi b’ingengo z’imari gusa ahubwo uwo ari we wese ufite uruhare muri aya makosa.” Yongeyeho ko hakwiye kujya hakorwa ubushakashatsi n’abatekinisiye bakoze amakosa bagakurikiranwa.

Abagize inteko ishinga amategeko basabye Minisitiri w’Intebe gukora raporo isobanutse mu gihe cy’amezi umunani, asobanura ukuntu ibyifuzo by’abadepite kuri raporo y’Umugenzuzi Mukuru byashyizwe mu bikorwa.

 

Izindi wakunda

Bwiza.com