bwiza.com
Ahabanza » MINISANTE iraburira Abanyarwanda ku bw’icyorezo cya Ebola cyagaragaye muri Congo
Amakuru Amatangazo Ubuzima

MINISANTE iraburira Abanyarwanda ku bw’icyorezo cya Ebola cyagaragaye muri Congo

Minisitiri w'Ubuzima, Dr. Diane Gashumba

Mu itangazo Minisiteri y’Ubuzima mu Rwanda (MINISANTE) yasohoye, iraburira Abanyarwanda nyuma y’aho bigaragariye ko icyorezo cya Ebola cyongeye kugaragara muri Repubulika Iharanira Demokarasi ya Congo.

Itangazo riragira riti “Nk’uko byatangajwe na Minisiteri y’Ubuzima mu Gihugu cya Repuburika Iharanira Demokarasi ya Kongo (DRC) ejo tariki ya 1 Kanama 2018, icyorezo cya Ebola cyagaragaye mu Majyaruguru y’icyo gihugu mu gace ka Beni, Intara ya Kivu y’amajyaruguru.

Minisiteri y’Ubuzima ifatanyije n’izindi nzego irahumuriza abanyarwanda n’abandi bose bagenderera u Rwanda kuko yiteguye bihagije kandi ko hafashwe ingamba zo gukumira icyo cyorezo.

Minisiteri y’Ubuzima kandi iributsa abantu bose ko Ebola ari indwara yandura iyo amaraso cyangwa amatembabuzi y’umuntu uyirwaye akoze ku muntu muzima.

Ibimenyetso by’iyo ndwara ni ukugira umuriro, kurwara umutwe, kuribwa mu ngingo, kubabara mu muhogo, gucika intege, guhitwa, kuruka cyane kandi kenshi, kuribwa mu nda no kuva amaraso ahantu hose hari umwenge ku mubiri w’umuntu.

Ebola ntiyandurira mu mwuka.

Minisiteri y’Ubuzima iributsa ko iyi ndwara yoroshye cyane kwirinda iyo twitaye ku isuku, ikaba iboneyeho gusaba ibi bikurikira:

  • Kugira umuco wo gukaraba intoki dukoresheje amazi meza n’isabune;
  • Umuntu wese ufite ibimenyetso bya Ebola byavuzwe haruguru agomba kwihutira kujya ku ivuriro rimwegereye;
  • Gukomeza umuco mwiza wo kwivuza hakiri kare igihe cyose wumva urwaye;
  • Kwirinda gukora ingendo zitari ngombwa ahagaragaye Ebola”.

 

Izindi wakunda

Bwiza.com