bwiza.com
Ahabanza » RDC: Moise Katumbi aravuga ko impapuro zo kumuta muri yombi zasohowe ntacyo zivuze
Amakuru Politiki

RDC: Moise Katumbi aravuga ko impapuro zo kumuta muri yombi zasohowe ntacyo zivuze

Umunyapolitiki Moïse Katumbi, utavuga rumwe na leta ya Repubulika iharanira Demokarasi ya Kongo, uri mu buhungiro kuva mu 2016, aramagana impapuro leta yashyizeho zo kumuta muri yombi avuga ko zidafututse.

Kuri uyu wa kane, Alexis Thambwe Mwamba, Minisitiri w’ubutabera wa Congo, yavuze ko Bwana Katumbi akwiye gutabwa muri yombi aho azagaragara hose.

Mu kiganiro yagiranye na BBC ariko Moise katumbi we yavuze ko izi mpapuro zo kumuta muri yombi ntacyo zivuze.

Ati:”Ni gute batanga impapuro zo kunta muri yombi kandi mu byumweru bibiri bishize baranyangiye kwinjira mu gihugu ubwo nabigeragezaga?”

Yakomeje agira ati: “Ubu ndi muri Namibia, niba bashaka kumfata bashobora kuza bakahansanga. Icyo navuga ni uko ntacyo bandega gifatika, ni nka kwa kundi bavuga ngo inguguru zirimo ubusa ni zo ziteza urusaku rwinshi.”

Bwana Moise katumbi yakomeje avuga ko abantu bari guteza akaga abaturage ba Kongo ari bo bari ku butegetsi bakaba bari kumushinja ibirego by’ibihimbano.

Ati: “Ni bo bari kwiba bakanica muri aka kanya. Ni bo bagakwiye gushyikirizwa ubucamanza.”

Mu ntangiriro y’uku kwezi kwa munani, Bwana Katumbi yari afite icyizere cyo kujya muri Kongo mbere yuko itariki ntarengwa yo gutanga kandidatire ku bashaka kwiyamamaza mu matora ya perezida – yatinze kuba – ateganyijwe mu kwezi kwa cumi na kabiri igera.

Ariko ubwo yageragezaga kwinjira muri Congo aturutse muri Zambia, abategetsi ba Kongo baramwangiye.

Uyu wahoze ari Guverineri w’Intara ya Katanga yahunze Kongo mu mwaka wa 2016, aza gukatirwa n’inkiko za Congo adahari igifungo cy’amezi 36 ku birego avuga ko bijyanye n’impamvu za politiki.

Mu mwaka wa 2015, ni bwo yavuye mu ishyaka riri ku butegetsi muri iki gihugu nyuma yo gushinja Perezida Joseph Kabila bahoze bakorana gushaka kugundira ubutegetsi.

 

Izindi wakunda

Bwiza.com