bwiza.com
Amakuru Politiki

Karongi: Urubyiruko rwavuye Iwawa rurasabwa kugaragaza impinduka muri sosiyeti

Abarangije amasomo y'imyuga Iwawa mu 2017 IFOTO/Internet

Ku itariki ya 16 Kanama,mu kagari ka Gacaca, Umurenge wa Rubengera mu karere ka Karongi, Polisi y’u Rwanda ikorera muri aka karere yagiranye ibiganiro n’abasore 12 bahoze ari inzererezi bavuye kugororerwa mu kigo cya i Wawa giherereye mu karere ka Rutsiro.

Aganira n’uru rubyiruko Umuyobozi wa Polisi ushinzwe guhuza ibikorwa bya Polisi n’izindi nzego n’abaturage mu karere ka Karongi, Assistant Inspector of Police(AIP) amiable Rutayisire, yasabye uru rubyiruko kudapfusha ubusa ubumenyi baherewe i Wawa.

Uru rubyiruko rukaba ari urwabaga  mu mujyi wa Kigali ari inzererezi rutagira imirimo, inzego z’umutekano zibafasha kugera mu kigo cy’i Wawa aho bigiye imyuga itandukanye irimo gusudira, kubaza, ubukanishi ndetse n’ibindi.

Yagize ati” Amahirwe mwaherewe  i Wawa arimo ayo kwiga imyuga itandukanye, kwihangira imirimo n’ibindi, nimugennde muyabyaze umusaruro, munashishikariza bagenzi banyu kuva mu biyobyabwenge ahubwo mubasangize ku masomo mwahawe.  Ikindi mugerageze kugaragaza imyitwarire itandukanye niyo mwari mufite mbere mutarahabwa aya mahugurwa”.

AIP Rutayisire yavuze ko uru rubyiruko rufite uruhare runini mu kurwanya ibiyobyabwenge no gucunga umutekano, abasaba ko ubwo bufatanye bwakomeza.

Yagize ati”Mufite uruhare runini rwo gukangurira abaturage cyane cyane urubyiruko kwitandukanya n’ibiyobyabwenge n’ibindi byaha; kuko mwe mwigishijwe mukanasobanurirwa ingaruka mbi za byo”.

Yakomeje agira ati”Mugire umuco wo gukorana buri gihe n’inzego z’umutekano n’izindi nzego muzigezaho amakuru ku gihe y’abahungabanya umutekano mu bikorwa bitandukanye kugira ngo habeho kubikumira bitaraba”.

AIP Rutayisire akomeza avuga ko gahunda nk’iyi yo kuganiriza urubyiruko rwavuye i Wawa barukangurira gushishikariza bagenzi babo kwirinda ibiyobyabwenge bizanakomereza mu yindi mirenge igize aka karere.

Umuyobozi w’urubyiruko mu karere ka Karongi Bihira Innocent yasabye uru rubyiruko kurangwa n‘indagagaciro  z’ ubunyarwanda, yanabibukije ko iki igihe aricyo  cyo gutegura ubuzima bwabo bw’ejo hazaza.

Yagize ati ” ubumenyi mukuye mu kigo cya Wawa musabwe kububyaza umusaruro, mwibumbira  mu makoperative, mugaragaze icyo mushoboye gukora, Akarere kazabafashe kubabonera  ibikoresho”.

Yashoje ashimira polisi y’urwanda k’ubufatanye igirana n’inzego z’ibanze muri gahunda zose nk’umuganda, inama zihabwa abaturage ndetse ko bafatanya mu mirimo yaburi munsi cyane cyane gukangurira urubyiruko kwirinda ibiyobyabwenge

 

Izindi wakunda

Bwiza.com