bwiza.com
Featured IBYEGERANYO Politiki

Ibiyaga Bigali: Abanyapolitiki 5 batanyuzwe n’ intebe nziza bahawe mu buyobozi bagahitamo kurwanya Leta

Abahanga bagiye bagaragaza ko politiki ari umukino wanduye (dirty game) mu gihe mu bihugu bikiri mu nzira y’ amajyambere abatari bacye binjira muri uyu mukino bishakira amaramuko, abo barangwa no guhora bacinya inkoro bigatuma inyungu za rubanda ziteshwa agaciro bagaharanira iz’umuntu cyangwa ishyaka.

Mu bihugu biteye imbere abanyapolitiki bashyira imbere inyungu z’ abaturage kuko bakora uyu mwuga bagamije kwamamara cyangwa guhindura amateka ndetse banashaka gusiga amazina meza kuko baba basanzwe bihagije ku butunzi.

Ibyo ntibikuraho ko hari abanyapolitiki b’ abanyafurika banga kugendera ku matwara y’ ubuyobozi buriho biturutse ku mpamvu zitandukanye zirimo gukunda kuyobora,kwanga kuvugirwamo no kutemera guceceka ahubwo baharanira ko ibitekerezo byabo byahabwa agaciro.

1.Twagiramungu Faustin: Uyu musaza w’ imyaka 73 y’ amavuko yamenyekanye cyane mu gihe cy’ amashyaka menshi mu Rwanda ubwo yarwanyije byimazeyo Leta ya Maj.Gen Juvenal Habyarimana mbere ya jenoside yakorewe Abatutsi mu 1994..

FPR/Inkotanyi imaze gufata ubutegetsi muri 1994, Faustin yahawe umwanya w’ icyubahiro nka Minisitiri w’ Intebe ariko ntiyawumaraho kabiri.

Nyuma y’ imyaka igera ku munani Twagiramungu avuye ku mwanya wa Minisitiri w’ Intebe yagarukanye imbaraga zidasanzwe mu ruhando rwa politiki nyarwanda ashaka kuba Perezida wa Repubulika, ese iyo myifatire ntiyaba igaragaza icyo uyu mugabo yifuzaga?

Kugeza magingo aya, Twagiramungu akomeje urugamba rwo kurwanya Leta, urugamba yatangiye kuva muri za 1990 dukuyemo umwaka umwe gusa yamaze ari Minisitiri w’ Intebe w’ u Rwanda.

Nubwo asatira imyaka w’ ubukambwe, Twagiramungu yemeza ko akiri mu kibuga cya politiki ndetse akaniha amahirwe , agira ati “niba nshaje ntabwo nshaje mu bwonko, ibitekerezo byanjye biracyari bya bindi”.

2.Dr. Kizza Besigye:

Kizza Besigye  w’ imyaka 62 y’ amavuko wafatanyije na Perezida Yoweri Kaguta Museveni ku rugamba rwo kubohora Uganda hagati ya 1981 na 1986, amaze imyaka myinshi arwanya amatwara ya NRM mu gihe yari umwe mu barwanashyaka bayo b’ imena.

Kuva mu mwaka wa 1999, nibwo Besigye yatangiye urugendo rwe rurwanya Leta ya Museveni ubwo yasohoraga inyandiko yise”An Insider’s View of How the NRM Lost the Broad Base” aho yerekanaga uburyo ishyaka NRM ryataye umurongo wayo shingiro ahubwo ikimakaza gusahurira umutungo w’ igihugu mu nduru no guha intebe ruswa n’ igitugu.

Nk’ umuntu wari umutoni kuri Museveni, Besigye amaze gutsindwa mu matora ya perezida  inshuro enye mu myaka ya 2001, 2006, 2011 na 2016.

3.Etienne Tshisekedi:

Uyu munyapolitiki watabarutse afite imyaka 85 y’ amavuko, azwiho kurwanya ubutegetsi bwose bwabaye muri Congo-Kinshasa kuva iki gihugu cyabona ubwigenge.
Tshisekedi yatangiye politiki kuva muri 1960 kugeza ashizemo umwuka ku wa 1 Gashyantare 2017.

Kugeza ubu umurambo nturashyingurwa kuko wagizwe nk’iturufu n’ abanyapolitiki bifuza kugera ku butegetsi biciye mu nzira zose zishoboka.

“Imfura igenda ndetse ikangana  se”, aho uyu mukambwe apfiriye umuhungu we Felix Tshisekedi akomeje kusa ikivi cya se ndetse akaba ari no bantu bemeza ko se agomba gushingurwa nka Perezida kuko bamufata nka Perezida watowe n’ abaturage ariko amajwi akaza kwibwa n’ abari bashyigikiye Joseph Kabila.

4.Raila Odinga: Se umubyara yabaye Visi Perezida wa Kenya mu bihe by’ ubwigenge ariko aza no guhangana na Jomo Kenyatta yifuza kuba Perezida birangira atageze kuri iyo ntego.

Mu mwaka wa 1992 , nibwo Raila w’ imyaka 73 y’ amavuko yabaye umudepite, na nyuma yaho yabaye minisitiri  w‘ ingufu, nyuma aza kuba ministiri w’ ushinzwe imihanda hagati ya 2003 na 2005 , yanabaye minisitiri ushinzwe abakozi ba Leta n’ amacumbi kugeza aho abareye Visi Perezida wa Kenya akanaza guhatanira kuba Perezida wa Kenya inshuro ebyiri ariko ntabigereho.

Nk’ umunyapolitiki wagiye abona imyanya myiza mu buyobozi bwa Kenya, Raila Odinga ntiyigeze anyurwa ahubwo akomeze kugaragaza inyota yo kuba perezida , nk’ uko byagiye bigaragara nyuma yo gutsindwa mu matora agahitamo gushora abayoboke be mu myigaragambyo.

5.Agathon Rwasa: Afite imyaka 54 y’ amavuko, yatangiye kwinjira neza mu mukino wa politiki ubwo yashingaga ishyaka FNL/PALPEHUTU mu mwaka wa 1988.

Uyu munyapolitiki ugendera ku matwara y’ abahezanguni, yarwanyije Leta ya Perezida Pierre Buyoya bigeza ku ngoma ya Melchior Ndadaye ubwo yahitaga yicwa muri 1993 , Agathon Rwasa yahise agana inzira y’ ishyamba nk’inyeshyamba yavugaga ko iharanira uburenganzira bw’ Abahutu.

Mu nyurabwenga ya Rwasa, yavugaga ko kuva u Burundi bwabona ubwigenge bwayobowe n’ Abatutsi bakomoka mu Majyepfo mu gace ka Rutovu mu Ntara ya Bururi.

Na none agashimangira ko agiye mu ishyamba kurenganura imiryango y’  Abahutu bari baragize amahirwe yo kwiga ababo bakicwa guhera ku ngoma ya Lt.Gen Michel Micombero  kugeza ku ngoma ya Maj. Pierre Buyoya.

Kugeza magingo aya, Rwasa ni Visi Perezida w’ Inteko Nshingamategeko y’ u Burundi ariko akaba atavuga rumwe na Leta ya Pierre Nkurunziza iyobowe na CNDD/FDD.

Gaston Rwasa & I.Theoneste/ Bwiza.com

Izindi wakunda

Bwiza.com
error: Alert: Ntabwo byemewe!!