bwiza.com
Ahabanza » Thierry Henry yagizwe umutoza mukuru w’ikipe ya Bordeaux yo muri Ligue 1
Amakuru Imikino

Thierry Henry yagizwe umutoza mukuru w’ikipe ya Bordeaux yo muri Ligue 1

Ikipe ya FC Girondins de Bordeaux yo mu cyiciro cya mbere mu mupira w’amaguru mu Bufaransa yahaye Thierry Henry akazi ko kuba umutoza mukuru w’iyi kipe ku masezerano y’igihe kirekire.

Thierry Henry wamamaye nka rutahizamu w’ikipe ya Arsenal mu Bwongereza, ku myaka ye 41 yari yasabye igihe cyo kubanza gutekereza kuri aya mahirwe yahawe avuga ko azafata umwanzuro muri iyi weekend.

Uyu akaba aherutse kureka akazi yari afite kuri Sky Sports dukesha iyi nkuru agiye kwibanda ku mwuga w’ubutoza, aho yanavuzweho muri iki Cyi ko yashoboraga kujya mu ikipe ya Aston Villa.

Uyu mugabo w’Umufaransa yari asanzwe afasha umutoza w’ikipe y’igihugu y’u Bubiligi, Roberto Martinez kuva mu 2016, ndetse yagaragaye muri staff y’iyi kipe mu Gikombe cy’Isi giheruka kubera mu Burusiya, aho yagize uruhare mu gutuma iyi kipe yagukana umwanya wa 3.

Ikipe ya Bordeaux yari iherutse guhagarika uwari umutoza wayo, Gus Poyet nyuma yo kunenga transfert yabaye atabizi.

Bordeaux ikaba yaragurishije rutahizamu wayo, Gaetan Laborde ku ikipe ya mukeba ya Montpellier bituma umutoza Poyet arakara nyuma yo gutsinda umukino wa Europa League wabahuje na FC Mariupol avuga ko iyi transfert iteye isoni.

Uyu mutoza byamuviriyemo guhagarikwa icyumweru asimburwa na Eric Bedouet watoje umukino wahuje Bordeaux na Toulouse muri weekend ishize warangiye itsinzwe 2 kuri 1.

Thierry Henry akaba yarakinnye muri Shampiyona y’icyiciro cya mbere mu Bufaransa (Ligue 1) hagati yo mu 1994 no mu 1999 akinira Monaco mbere yo kwerekeza muri Juventus.

Uyu akaba wahoze ari na rutahizamu w’ikipe y’igihugu y’u Bufaransa, yaje kujya muri Arsenal yo mu Bwongereza, ayikinira imikino 254 hagati yo mu 1999 na 2007 ndetse ahamagarwa inshuro 123 mu ikipe y’igihugu cye.

 

Izindi wakunda

Bwiza.com