bwiza.com
Amakuru Politiki

Inteko Nshingamategeko irasaba Perezida Museveni guhana abahohoteye Bobi Wine na bagenzi be

Inteko Nshingamategeko ya Uganda yandikiye Perezida Museveni imusaba gutanga itegeko rifata abashinzwe kumurinda n’abandi bo mu nzego z’umutekano bakoreye iyicarubozo Abadepite barimo Bobi Wine n’abanyamakuru.

Mu ibaruwa yashyizweho umukono ku wa 27 Kanama 2018, n’umuvugizi w’Inteko Nshingamategeko, Rebecca Kadaga, yasabye Perezida Museveni gutanga itegeko abahohoteye Abadepite n’abanyamakuru, mu myigaragambyo yabereye i Arua, bagafatwa bakanashyikirizwa inkiko.

Rebecca Kadaga, atangariza Perezida Museveni ko abashinjwa guhohotera aba bayobozi n’abanyamakuru ari abashinzwe kumurinda, abapolisi ndetse n’abashinzwe pisipuline mu gisirikare (Military Police).

Avuga ko mu gihe ubu busabe bwabo bwaba butubahirijwe, bizaba imbogamizi ku mikorere y’Inteko Nshingamategeko ya Uganda, agira ati « Inteko Nshingamategeko ya Uganda, ntiyihanganira ndetse ntinemera ibikorwa by’iyicarubozo ».

Nk’uko ikinyamakuru Minitor kibitangaza, ngo ubwo habaga igikorwa cya nyuma cyo kwamamaza umukandida depite mu gace ka Arua, aribwo habaye imyigaragambyo, umudepite Robert Kyagulanyi [Bobi Wine] na bagenzi be batavuga rumwe na Leta Kassiano Wadri, Francis Zaake, Paul Mwiri Karuhanga, Mike Mabikke, bafashwe bagahohoterwa bikomeye, ndetse bakanatabwa muri yombi n’inzego z’umutekano.

Aba bayobozi ngo bashinjwaga kwitambika ikipe y’abashinzwe kurinda perezida Museveni ndetse n’imwe mu modoka yari ibatwaye iterwa amabuye imenwa ikirahuri cy’inyuma.

Avuga ko Depite Francis Zaake yakuwe aho yahohotewe mu modoka ya gisirikare ajyanwa mu bitaro bya Rubaga i Kampala, avurwa ibikomere, by’umwihariko ngo akaba yaramaze iminsi ari muri koma.

Kadaga avuga ko Zaake akomeje kuremba cyane ndetse ko na Bobi Wine agaragaraho ibimenyetso by’uko yakorewe iyicarubozo n’ubwo kandi rihanirwa n’amategeko.

Agira ati « Nyakubahwa, nahamya ko nta bushake bwashyizweho mu guta muri yombi abofisiye bo mu mutwe wa gisirikare ushinzwe kubarinda (SFC), Militari Polisi ndetse n’abandi bapolisi ba Uganda, bagize uruhare mu bikorwa byo guhohotera abaturage batari bafite intwaro ».

Akomeza asaba perezida Museveni gutanga amabwiriza yo kubafata bakagezwa mu nkiko, amategeko bashinzwe gushyiraho mu nteko akubahizwa.

Bobi Wine akomeje kuremba nyuma yo gukorerwa iyicarubozo

Izindi wakunda

Bwiza.com
error: Alert: Ntabwo byemewe!!