bwiza.com
Amakuru mu Rwanda

Nyamagabe : Umugore uvugwa ko yatwawe na Diregiteri asanga ari ihohoterwa akomeje gukorerwa

Mu nkuru bwiza.com yagejeje ku basomyi kuri uyu wa Mbere tariki ya 27 Kanama 2018, hagaragaye ibaruwa y’umwarimu Munyaneza Cyprien wandikiye urwego rw’umuvunyi, aha kopi akarere ka Nyamagabe asaba kurenganurwa. Asobanura ko umugore we Dusabe Blandine yataye urugo akurikiye Diregiteri, umuyobora wanamuzamuye mu ntera akamugira umunyamabanga w’ishuri.

Dusabe Blandine we asanga ari urubwa aterwa n’umugabo bananiranywe bikagera aho amusiga akiza amagara ye kubera ihohoterwa avuga ko yakorewe kuva agiterwa inda agata ishuri, akabana n’umugabo umutoteza anamukubita, bikagera aho amuhunga, « ngo none atangiye kumusebya ko yatwawe na Diregiteri ».

Dusabe ati, « ndi mukuru bihagije, narahohotewe ndihangana, mpitamo guhunga Munyaneza njya kwibana ».

Bwiza.com igiye kubavira imuzingo iby’iri hohoterwa rimaze imyaka icumi, kugera bigeze mu itangazamakuru.

Guterwa inda, gushaka mu muryango utamwifuza, ihohoterwa ku mutungo

Munyaneza na Dusabe babanye bigoranye, kuko Munyaneza yamuteye inda yiga mu mwaka wa 5 w’amashuri yisumbuye, afite imyaka 17. Ibi ngo Munyaneza yaranabifungiwe, afungurwa nyuma y’igihe gito amaze gusaba imbabazi no kwemera kumutunga akaba umugore we.

Uyu mubyeyi w’imyaka 28, afite abana babiri barimo ufite imyaka 10, bivuze ko umukuru yavutse 2008 nyina afite imyaka 18.

Batangiye kubana mu 2008 batabanje gusezerana imbere y’amategeko(umugore ntiyari anujuje imyaka 21 yo gushaka), kandi babanye umuryango wa Munyaneza utabishaka.

Dusabe ati, « tugitangira kubana twabaga mu nzu iri iwabo, kandi gukubitwa byari  hafi ya buri munsi. Nyuma aza gufata inguzanyo mu UMWARIMU SACCO, tugamije kuva mu nzu y’ababyeyi tukiyubakira iyacu. Amaze kubona amafaranga ata urugo, aratorongera aragenda turamubura. Nibwo ababyeyi be bamenesheje muri ya nzu, ngo ko yagiye uramara iki hano. Mpita ntangira kuba mu bukode ntyo ».

Nyuma y’igihe, uyu mugabo amaze amafaranga yagarutse mu rugo asaba umugore imbabazi avuga ko yashutswe n’ababyeyi, umugore amwemerera kugaruka, ariko noneho bahita basezerana mu mategeko.

Umugore amaze kubyara kabiri, yahise ajya gukora ikizamnini cya Leta mu 2014 nk’umukandida wigenga, aratsinda nyuma abona n’akazi. Noneho ngo umugabo amafaranga ye yose akayanywera, bigera n’aho atishyura inzu, byose biharirwa umugore.

Dusabe yaje kwaka inguzanyo yubaka inzu, ari we uhemba abafundi anagura ibikoresho byose. Ati, « n’ibiti nubakishaga byavaga mwa databukwe kandi narabimwishyuraga».

Mu mwaka wa 2017, uyu mugore ngo yaje kumara ibyumweru bibiri mu bitaro bya Kigeme arwaye inkoni yakubiswe n’umugabo. Ati « navaga amaraso mu myanya yose y’ubuhumekero, ariko ntawe nabwiye ko nakubiswe ».

Avuye muri ibi bitaro nibwo yafashe umwanzuro wo guhambira utwe, asubira mu bukode, aho yari amenyereye kwahukanira.

Ikigare cy’ibigande kimusenyeye urugo cyototera ikigo 

Izamurwa mu ntera rya Dusabe Blandine wari umwarimukazi akagirwa umunyamabanga w’ishuri GS Kigeme B, niryo ntandaro y’isebenya ryamugejeje mu itangazamakuru, nyamara umuyobozi w’ikigo avuga ko ryanyuze mu nzira z’umucyo.

Nkunzimana callixte ati «  akarere niko gatanga akazi, njye icyo nakoze bansabye umwarimu waba umunyamabanga w’ishuri ntanga amazina. Dusabe Blandine yarimo kuko yize icungamutungo imyaka itanu, ikindi agira ubwitange budasanzwe mu kigo : arazinduka agashyira abana ku murongo, mu bikorwa byinshi akorana ubwitange. Si ubwa mbere kandi nari ntanze amazina y’abarimu bakazamurwa mu ntera, no ku yindi myanya byabayeho ».

Dusabe avuga ko akimara kugirwa umunyamabanga w’ishuri, bamwe mu barimu batabyishimiye, bakifuza ko yakwirukanwa cyangwa agasubira mu bwarimu. Itsinda ry’abarimu badakora neza ngo biyemeje kwifatanya n’umugabo we Munyaneza ngo bamusebye. Dusabe ati, « icyo biyemeje ni ukugira ngo banyirukanishe cyangwa bansubize mu bwarimu ngo ndabasuzugura, si nkora ibyo bashaka  kandi nari umwarimu nkabo ».

Iri tsinda rishyirwa mu majwi, ngo rigizwe n’abarimu bahora bihanangirizwa imikorere mibi, harimo gukererwa ku kazi, kutaba mu ishuri, kutuzuza ibitabo bigenwa no gusuzugura ubuyobozi.

Iryo tsinda riyobowe n’uwitwa Habyarimana Samuel, ngo ari nawe utanga amakuru kwa Munyaneza agamije kumutanya n’umugore burundu.

Nk’uko bitangazwa na Nkunzimana Callixte, umuyobozi wa GS Kigeme B, ngo « iryo tsinda rigizwe n’abarimu bashaka kwigira indakoreka mu kazi. Muri bo harimo uwitwa Habyarimana Samuel na bagenzi be, bagiriwe inama n’inzego zinyuranye ariko ntibava ku izima. Babazwa impamvu batuzuza inshingano zabo nk’abarezi bakabyita ihohoterwa.  Uramubaza ibidanago akabibura cyangwa akabikwima, isuku, kwirirwa bitemberera mu kigo bota izuba, …ikibazo kikavuka ».

Amakuru yizewe ava mu nzego z’uburezi mu karere ka Nyamagabe, avuga ko uyu Habyarimana Samuel yigeze kwirukanwa ku ishuri ribanza rya Gisanze mu murenge wa Tare azira gushaka gukubita umuyobozi we. Ikindi ngo uyu mwarimu yahawe gukorera hafi y’iwe, ku ishuri ribanza rya Muse mu murenge wa Tare ariko arabyanga, aguma ku Kigeme.

Inzego zinyuranye zakunze kugera muri GS Kigeme B zizanywe no kugira inama uyu Habyarimana Samuel ngo akore akazi neza kandi areke amakimbirane. Izo ni izo ku murenge wa Gasaka, ubuyobozi bw’uburezi mu karere, Diocese ya Kigeme ndetse n’umuyobozi w’akarere wungirije ushinzwe imibereho myiza y’abaturage.

Inama zabaye mu matariki ya 22 Gashyantare 2018 ; ku wa 16 na 18 Nyakanga 2018.

Habyarimana Samuel avuga ko inama zabaye mu kigo ari izabaga zije guhosha amakimbirane ye na Bizimana Fidele alias Worrior (ngo yahoze mu nzego z’umutekano) wamukubise, agakizwa na Mutemberezi Valens. Uyu na we ngo ari mu itsinda ry’abarimu batitwara neza, ngo kuko aparika moto mu cyumba cy’abarimu, kandi iya diregiteri yirirwa hanze.

Uyu Habyarimana Samuel ngo impamvu bamwohereza ahandi ntajyeyo, ngo akenshi biba bitagamije inyungu ze, agahitamo kubyanga yitabaza inzego zo hejuru nk’akarere na Komisiyo y’umurimo.

Ikibazo cya Dusabe Blandine na Munyaneza Cyprien kizwi cyane mu nzego zinyuranye mu karere ka Nyamagabe, kandi gifite uruhare mu migendekere y’ikigo cya GS Kigeme B, kubera bamwe mu barimu baho bagitiza umurindi.

Karegeya Jean Baptiste/ Bwiza.com

Izindi wakunda

2 Ibitekerezo

Bob 30/08/2018 4:31 pm at 4:31 pm

Hhhh ngo umurenge wa gasaka wagiriye uriya mugabo inama? Uwagiriye inama nawe aho ageze ingo zabandi turahazi. Ni umwera uturutse i bukuru.

Subiza
MuHIZI 31/08/2018 2:33 pm at 2:33 pm

None se n’urugo rwawe rurimo? Mujye mureka guharabika. Niba biriho wabishyikirije inzego zikabikurikirana.

Subiza

Tanga Igitekerezo

Bwiza.com
error: Alert: Ntabwo byemewe!!