bwiza.com
Amakuru mashya

Perezida Museveni arashinja ubutasi kudakumira abanyabyaha bava mu Rwanda na Congo

Perezida wa Uganda, Yoweli Kaguta Museveni  kuwa Gatanu w’icyumweru gishize yanenze urwego rw’ubutatsi bwa gisirikare bwa Uganda (CMI) avuga ko bwananiwe kugenzura no gukumira abanyabyaha bava mu Rwanda no muri Repubulika Iharanira Demokarasi ya Congo.

Mu nama y’umutekano yabereye ku biro bya perezida, Entebbe mu Mujyi wa Kampala, Museveni mbere yo kwerekeza mu nama y’ubukungu mu Bushinwa, yavuze ko CMI, Polisi n’Urwego rw’umutekano w’imbere mu gihugu (ISO) bananiwe guhangana n’inkozi z’ibibi ziva mu Rwanda na Congo zigamije guhungabanya umutekano w’igihugu.

Abakurikiraniye hafi iby’iyi nama babwiye Spyreports dukesha iyi nkuru ko Museveni yahise ategeka Umuyobozi wa CMI, Brig. Gen. Abel Kanduho kuyobora inzego zose z’umutekano mu mujyi wa Kampala n’utundi turere tuhegereye twose.

Museveni kandi nk’uko iyi nkuru ibivuga, yasabye Afande Kanduho  kugenzura buri gikorwa cyose kijyanye n’umutekano maze akamuha raporo ya buri cyumweru nta wundi muntu inyuzeho.

Uyu kandi yasabye abandi bayobozi b’inzego z’umutekano buri munsi  gukorana inama hagati yabo maze bagaha incamake y’ibyizweho kuwa Gatanu wa buri cyumweru mbere y’uko  Brig. Gen. Kandiho ahura na we (Museveni).

Museveni kandi yasabye Kanduho kuzajya amuha raporo ya buri cyumweru no muri iki gihe ari mu nama  ihuza Afrika n’Ubushinwa.

Mu mabwiriza Brig. Gen. Kandiho yatanze, harimo ko inama y’umutekano izajya ibera kuri sitasiyo ya polisi iri rwagati mu Mujyi wa Kampala.

Kandiho yihanangirije abashinzwe umutekano ku bijyanye no guhohotera abanyamakuru n’abasiviri mu gihe cy’imyigaragambyo ndetse akebura abapolisi bakuru biyicarira mu modoka bakohereza abato gukemura ibibazo birenze ubushobozi bwabo.

Leta ya Uganda ntiyahwemye kuvuga ko hari  Abanyarwanda binjira muri Uganda bagiye gutata no guhungabanya umutekano w’impunzi z’Abanyarwanda zibayo.

Ku rundi ruhande, benshi mu bagiye batabwa muri yombi batangaje ko ntaho bahuriye n’igisirikare cy’u Rwanda kuko ngo ari baturage basanzwe baba bagiye kwishakira amaramuko muri iki gihugu.

 

Izindi wakunda

Bwiza.com
error: Alert: Ntabwo byemewe!!