bwiza.com
Ahabanza » Rwamagana: Abagore bati “urakubitwa ukabona aho urega”
Amakuru Politiki Umuryango

Rwamagana: Abagore bati “urakubitwa ukabona aho urega”

Abagore bo mu karere ka Rwamagana barishimira ijambo bahawe bakabasha kujya mu nzego z’imiyoborere y’igihugu harimo no kuba bafite imyanya mu Nteko Nshingamategeko, byose babibona nk’igisubizo kibafasha kugera kuri byinshi mu iterambere, ko ubu nta mugore ukubitwa ngo abe yabura aho arega.

Mu kiganiro abagore bo mu Karere ka Rwamagana, bagiranye na Bwiza.com, ubwo bavugaga ku nyungu babona mu kugira ababahagararira mu buyobozi harimo n’abadepite b’abagore batowe tariki ya 05 Nzeri 2018, bavuze ko hari intambwe bamaze gutera mu mibereho yabo no mu muryango muri rusange, byose bakavuga ko babikesha kuba barahawe ijambo.

Mukandahiro Vestine

Mukandahiro Vestine, umwe muri abo bagore utuye mu Kagari ka Binunga mu Murenge wa Munyiginya, mu Karere ka Rwamagana, Intara y’Iburasirazuba avuga abona ko kuba umugore yagira ijambo hari byinshi byahindutse harimo no kuba byaragabanyije amakimbirane mu miryango kuko umugore iyo akubiswe agira aho ashobora kurega.

Ati “Kera warakubitwaga ntubone ukurengera , ubu mugirana ibibazo nuwo mwashakanye bakabunga, yaba ari umugore ukosheje cyangwa umugabo bakabasha kumushyira mu murongo , ibi byose ni uko umugore yahawe ijambo , mbere warakubitwaga ntubone uwo uregera, ntugire ukuvugira, mu byukuri kugira ijambo kw’abagore harimo inyungu nyinshi”.

Aba bagore bo mu murenge wa Gishari na Munyiginya kandi bagarutse ku byo bifuza ku badepite batowe babasaba kumanuka bakaganira, batabumva kuri radiyo gusa ahubwo bakeneye no kurebana imbona nkubone bakabagezaho ibyifuzo n’ibibazo byabo, bakabasha kubakorera ubuvugizi.

Mukandahiro Vestine, umugore wagarutse cyane kubyo bakeneyeho ubuvugizi, avuga ko bishimye ku bw’iterambere bagezeho ariko na none hari byinshi bakeneye byakorerwa ubuvugizi cyane cyane ku bijyanye n‘ibyiciro by’ubudehe, ko hari abagiye bashyirwa mu byiciro badashoboye bityo bakaba bari kubangamirwa n’imibereho imwe n’imwe irimo no kubura uko bashyira abana babo mu mashuri ya kaminuza.

Uyu mugore avuga kandi ko kuba bafite abadepite bahagarariye abagore mu nteko babibonamo igisubizo. Ati ” byakemuka igihe aba badepite babikoze nkuko baba babitwijeje biyamamaza.”

Bisengimana Isabella

Bisengimana Isabella, utuye mu kagari ka Cyimana, umurenge wa Gishari , nawe yagarutse ku iterambere bakesha kuba barahawe ijambo bakigishwa ubwuzuzanye n’uburingare kuri ubu bakaba bakorera ingo zabo bafatanyije n’abagabo babo, ibi byose babikesha umugoroba w’ababyeyi n’amahugurwa bagenda bahabwa ku buryo amakimbirane yo mu muryango yagabanyutse bitakiri nk’uko byahoze mbere.

Uyu mugore kandi avuga ko kugira uruhare mu gutora abagomba kubahagararira babinamo igisubizo kuko iyo hari ugize ikibazo kijya mu nzego z’ibanze batagishobora bakaba bagiha n’abo badepite bakabafasha kubakorera ubuvugizi.

Gusa na none akavuga ko abagore batowe ngo babahagararire mu Nteko Nshingamategeko badakwiye kujya babumva kuri radiyo gusa , ahubwo bakwiye kuzajya bagaruka kubumva bakarebana amaso ku maso bakabagezeho ibyifuzo byabo.

Isabelle ati: “Twahawe ijambo, twarahuguwe , turimo turatera imbere, ni byiza koko twegerejwe ubuyobozi, ugize ikibazo yegera ubuyobozi, ariko nabo badepite tubifuzaho kutabumva kuri radiyo gusa, dukeneye kujya tubabona amaso ku maso, tukabagezaho ibyifuzo n’ibibazo byacu tutanyuze ku bandi , burya iyo ubwira umuntu murebana arakumva, akamenya ikibazo ufite.”

Ikiciro cy’abagore cyatowe ku rwego rw’akagari mu gihugu hose, batorwa n’abagize inama njyanama z’umurenge, abahagarariye inzego z’abagore kuva ku kagari kugera ku murenge. Abagore biyamamaje ku mwanya w’ubudepite mu ntara y’Iburasirazuba bagera ku 39, hakavamo 6 bagomba guhagararira intara mu Nteko Nshingamategeko umutwe w’abadepite. Abagore biyamamaje mu gihugu hose ni 179, hagomba kuvamo 24 bahagararira abagore mu nteko kuri cya kiciro cy’abagore bagize 30%. Biteganyijwe ko tariki 5/09/2018, aribwo abagore bazajya mu nteko bamenyekana, Komisiyo y’Amatora imaze gutangaza ibyavuye mu ibarura ry’amajwi mu gihugu hose.

 

Izindi wakunda

Bwiza.com