bwiza.com
Ahabanza » Saido Berahino yafashije u Burundi kunganya na Gabon mu mukino wa mbere yabukiniye
Amakuru Imikino

Saido Berahino yafashije u Burundi kunganya na Gabon mu mukino wa mbere yabukiniye

Umukinnyi Saido Berahino ukomoka mu Burundi, ukina mu Bwongereza nk’uwabigize umwuga mu Ikipe ya Stock City ndetse akaba anafite ubwenegihugu bw’u Bwongereza, yafashije igihugu cy’u Burundi yakiniye ku nshuro ya mbere kunganya n’ikipe y’igihugu cya Gabon.

Uyu mukino wahuje Gabon n’u Burundi mu majonjora yo gushaka itike y’Igikombe cya Afurika cy’Ibihugu cya 2019, warangiye amakipe yombi anganyije igitego 1-1.

Saido Berahino niwe watsindiye u Burundi igitego ku munota wa 40 w’umukino kiza kwishyurwa ku munota wa 76 na Pierre-Emerick Aubameyang ukinira ikipe ya Arsenal yo mu Bwongereza.

Mu itsinda rya C  u Burundi buherereyemo nibwo buri imbere n’amanota 4, hakaba hateganyijwe undi mukino wo muri iryo tsinda kuri iki Cyumweru hagati ya Mali na Sudani y’Epfo.

Saido Berahino ni umukinnyi w’Umurundi ufite n’ubwenegihugu bw’u Bwongereza, akaba yaramenyekanye cyane mu ikipe ya West Bromwich Albion yakiniye bwa mbere muri season ya 2013-2014.

Berahino kandi yakiniye ikipe y’abakiri bato y’u Bwongereza uhereye ku bafite imyaka 16 kugeza ku bafite imyaka 21 ndetse yari mu ikipe y’u bwongereza y’abatarengeje imyaka 17 yegukanye igikombe cy’u Burayi mu 2010. Yaje guhamagarwa mu ikipe nkuru mu 2014 ariko ntiyakina umukino n’umwe, aza guhindura yiyemeza kuzakinira u Burundi nyuma yo kumara imyaka 3 yose adahamagarwa mu ikipe y’u Bwongereza FIFA ikamwemerera gukinira igihugu cy’amavuko mu kwezi gushize kwa Kanama 2018 .

Mu itsinda H muri iyi mikino yo gushaka itike yo kwerekeza mu gikombe cya Afurika ikomeje, mu itsinda H, u Rwanda ruraza gucakirana na Cote d’ivoire kuri iki Cyumweru ku isaha ya saa 15:30 kuri Stade Regionale ya Kigali.

 

Izindi wakunda

Bwiza.com