bwiza.com/Amakuru acukumbuye
Ahabanza » Kuvuga nabi Perezida Nkurunziza n’Imbonerakure biviriyemo abakozi 3 ba Loni gukumirwa
Amakuru Politiki

Kuvuga nabi Perezida Nkurunziza n’Imbonerakure biviriyemo abakozi 3 ba Loni gukumirwa

Minisiteri y’ububanyi n’amahanga mu Burundi yasohoye itangazo ribuza abakozi batatu b’umuryango w’Abibumbye kwinjira ku butaka bw’u Burundi.

Abo bakozi ni Doudou Diene ukomoka muri Senegale, Lucy Asuagbor ukomoka muri Senegal ndetse na Francoise Hampton wo mu Bwongereza.

Bari mu bayoboye komisiyo ya Loni ishinzwe gukora iperereza ku iyubahirizwa ry’uburenganzira bw’ikiremwamuntu, bakaba baherutse gutunga agatoki Perezida Nkurunziza n’urubyiruko rw’Imbonerakure hamwe n’izindi nzego, ko bagira uruhare mu kubuhutaza.

Iri tangazo ryashyizweho umukono na Minisitiri Ezechiel Nibigira rivuga ko icyo cyegeranyo cyuzuyemo ibinyoma. Bityo rero ngo abo bakozi ba Loni nta hantu na hamwe mu Burundi bemerewe gukandagiza ikirenge, ibyo bita “persona non grata.”

Abatavuga rumwe na Leta bo ntibemeranya n’ibyo Leta ihakana, Depite Fabien Banciryanino avuga ko abaturage bakubitwa bakanabuzwa amahoro.

Yagize ati “Muri komini ya Gihanga, Intara ya Bubanza, mu Burengerazuba bw’u Burundi hashize iminsi 32 nta muturage wemererwa gusohoka no kwidegembya kuva saa kumi n’ebyiri z’umugoroba. Abaturage barakubitwa bagacibwa n’amande, ibyo ni ibintu biteye isoni”.

Nk’uko BBC ibitangaza, iyi raporo yashyizwe hanze ku wa 5 Nzeri 2018, ikaba itunga agatoki inzego zo hejuru, harimo Perezida Nkurunziza, polisi n’Imbonerakure. Iyi raporo ngo ikaba izashyikirizwa inama nkuru y’umutekano ya Loni mu cyumweru gitaha.

 

 

 

Izindi wakunda

Bwiza.com